Ezequiel 9

येरुसालेमोहों डोंड

1 फाशोअ तिये माहूं वोडा आवाजोमेहें आअड़ीत कोयो, "होयरोअ आधिकाऱ्यों जिवज्योअ आथोमेहें आरवीइलाअ आथ्यारे लेत इंहीं आवा." 2 तियी वेले सोव माटी, पालामाआ वोल उपर्‍याआ बाअणाअ वाटेएहें जिवज्योअ आथोमेहें आरवीइलाअ आथ्यार लेताज आया; आन तियांआं विसमेहें हुत्राव आंगड़े पोवित, कंबरेमेहें लेखीइलोअ वस्तु आन सोलाल खोत्लू बांदीत एक माटी ओतु; आन ते आखा मायते जात कोइत तांबाआ देवान्याअ जागे जात उबा रोया.

3 ताहां इस्राएलोअ देवोअ महिमा करुब देवदुतोपोअ रोत, जियापोअ तो रोया कोअतुतो, तिया मंदिरोअ ओटापोअ उठीत आयुतो; आन जो कंबरेमेहें लेखीइलोअ वस्तु बांदीत ओतु, तिया हुत्राव आंगड़े पोवल्या माट्योहो आअड़्यू. 4 यहोवा तियाहा कोयो, "या येरुसालेम होयरोअ मायते जात कोइत जेतेहे माअहें तिया खाराब कामोअ वाखरी काहीं काहींइं रोड़्या कोअतेहे, तियांआं निंडाआपोअ निशाणी लागाड़ी दे."

5 ताहां आंय उनाअयाज कोअहो आन तिये बिहीराहा कोयो, "तियांआं फासाड़ी फासाड़ी होयरोम सालीत माअतेज जावा; कोडा पोअ दया मा कोअहा आन किव मा कोअहा. 6 डायहां, जुवान्या, जुवान्यी, हाने पोर्‍ये, बोईं, आखाहा माईंत आरवी द्या, पोन जियाआ निंडाअपोअ ते निशाणी ओय, तियाआ जागे मा जाहा. माआ सोका जागाअहीं रोत सुरुवात कोआ." ताहां तियां डायहांआ जागे रोत सुरुवात कोअयी जे मंदिरोअ हुंबर ओता.

7 फाशोअ तिये तियांहां कोयो, "मंदिरोहो एठो कोआ, आन खोलीही तोड़ोवाअहीं पोइ द्या. साला बाअथे निहां!" ताहां ते निहींत होयरोमेहें माअहें माआ वोल्या.

8 जेहेलाम ते माअताते, आन आंय एखलुज रोत गोयु, ताहां आंय उबडू पोड़ीत आअड़ीत कोयो, "कि ओवे प्रभु यहोवा! केहें तु ताआ जलन येरुसालेमो पोअ कोइत इस्राएलोअ वासात रोल्या आखाहा बी आरवीत देनारु के?"

9 ताहां तिये माहूं कोयो, "इस्राएल आन यहुदाआ घराणाअ पाप जाअखो वादीत गोयोहो, इंहीं जांआं के देस खुनोवाअहीं आन होयर अन्यायो वाअहीं पोआइत गोयो; काहाके तें कोतेहे, ‘यहोवा धरतीही सोड़ी देदीही आन यहोवा किज नाहां पालतू.’ 10 तियाहा कोत तियांपोअ दया ने देखाड़ो आन किव कोओ, पोन आंय तियांआं कामोअ फल तियांआंज मुन्कापोअ आपिहीं."

11 ताहां आंय कि पाल्यो, के जो माटी हुत्रावो आंगड़ो पोवित आन कंबरेमेहें लेखीइलोअ वस्तु बांदीत ओतु, तिये ओं कोत कोइत हाजी बातमी आप्यी, "जेहेलोहो तुमे आदेश आप्यू, तेहेलोज आंय कोअयो."