1 Oo Tsaatsɛ Mawu, moo nu ye kue fami ɔ, nɛ o bu ye pɛɛ kpami ɔ tue.

2 Mo ko wo o hɛ mi kɛ laa mi ngɛ ye haomi be nɛ ɔ mi. Moo bu mi tue nɛ o ha mi heto mla. 3 Ejakaa ye ligbi ɔmɛ ngɛ bee kaa la su ku, nɛ ye he mi dɔ la kaa la tɛ mi. 4 Ye tsui nya ngɛ tae, nɛ i pee kaa nga nɛ gbo. Niye ni tete jlo we mi. 5 I kɛmɛ hluu nɛ i ta he lo, nɛ i pee kaa wu. 6 I pee kaa okpoku ngɛ nga nɔ tsitsaa, aloo klomi ngɛ magbɛ nɔ. 7 Ke je jɔ ɔ, i hwɔɛ mahe. I pee kaa otoklii ngɛ tsu yi kpɛti nɛ be fiɛlɔ.

8 Ye he nyɛli ɔmɛ ngɛ ye he fɛu yee, nɛ a ngɛ mi gbiɛe daa je nɛ maa na. 9 La zu ji ye niye ni, nɛ ke i ngɛ nyu nue ɔ, ye vo nyu futuu mi. 10 Ejakaa o na mi abofu nɛ o sake mi kɛ fɔ he. 11 Ye ligbi ɔmɛ ngɛ kaa gbɔkuɛ he nini, nɛ i ngɛ gboe kaa nga. 12 Se Tsaatsɛ, mo ji Neneene Matsɛ ɔ nɛ. O biɛ ngɛ daa kɛ daa.

13 Mo wo o he nɔ nɛ o na Yerusalem mɔbɔ. Be nɛ o to nɛ o maa ye kɛ bua lɛ ɔ su. Be ɔ ji enɛ ɔ nɛ. 14 Ejakaa e gbogbo ɔmɛ a mi tɛ ɔmɛ peeɔ o tsɔli ɔmɛ bua jɔmi, nɛ gbɛjegbɛ ɔmɛ a nɔ bunyuku ɔ peeɔ mɛ mɔbɔ. 15 Mo ha nɛ je mi ma amɛ kɛ a nɔ yeli ɔmɛ tsuo a ye Tsaatsɛ Mawu kɛ e anunyami ɔ gbeye. 16 Be nɛ Yehowa maa ma Yerusalem ekohu ɔ, e maa ba ngɛ e anunyami mi.

17 E maa bu ohiafo ɔmɛ a kue fami tue, ejakaa e ngɛ a he deka. 18 I ngɛ enɛ ɔ ngmae kɛ fɔ si ha yi nɔ bihi nɛ maa ba a, bɔ nɛ pee nɛ mɛ hu a je Tsaatsɛ Mawu yi ngɛ níhi nɛ e tsu ɔmɛ a he. 19 Neneene Tsɛ ɔ plɛ nɛ e hyɛ zugba a kɛ je hiɔwe lokoo. Tsaatsɛ Mawu hyɛ zugba a kɛ je hiɔwe. 20 E nu e nimli ɔmɛ nɛ ngɛ nyɔguɛ yemi mi ɔ a kɛmɛmi, nɛ e ngmɛɛ ni nɛmɛ nɛ a to nɛ a maa gbe ɔ a he, 21 bɔ nɛ pee nɛ a wo Tsaatsɛ Mawu biɛ ta ngɛ Zion nɛ a je e yi ngɛ Yerusalem. 22 Nɛ ma amɛ a nɔ matsɛ ɔmɛ tsuo ma bua a he nya nɛ a ja lɛ.

23 E ku ye he wami nya be mi nɛ ye be sui, nɛ e po ye ligbi ɔmɛ a nɔ. 24 I kpa ngmlaa nɛ i de ke, "Oo Tsaatsɛ Mawu, mo ko kpatu mi! Moo o ngɛ kɛ yaa neneene. 25 Kɛ je blema lokoo nɛ o to je ɔ sisi. O nine nya ni tsumi ji hiɔwe nɛ o bɔ ɔ. 26 A hɛ mi ma kpata, se moo lɛɛ o maa hi si daa. Mɛ tsuo a maa bwɔ nɛ a maa pee kaa tako. O ma tsake mɛ kaa bɔ nɛ a woɔ tade he, nɛ a sakee momo ɔ kɛ fɔɔ he ɔ. 27 Se moo lɛɛ o tsakee we, o ngɛ ja a daa, nɛ o jeha amɛ be nyagbe.

28 O tsɔli a bimɛ be tae, nɛ o maa baa a bibimɛ a yi."