1 Oo Neneene Tsɛ, ye bua jɔ ye he, nɛ i pee klaalo nɛ ma je o yi! I ma la kɛ je o yi nɛ i ma nya ngɛ o hɛ mi.

2 Oo, i ma te si makɛ mla nɛ ma la kɛ saku. 3 Oo Neneene Tsɛ, i ma je o yi ngɛ nimli a kpɛti. I ma la kɛ je o yi kɛ kpa mahi a nɔ. 4 Ejakaa o suɔmi kle kɛ ho hiɔwe ya, bɔ nɛ juɛmi sui he, nɛ o anɔkuale yemi su bɔ kuu ɔmɛ a mi tɔɔ. 5 O anunyami ɔ kle pe hiɔwe, nɛ e ha zugba a nɔ tsuo. 6 Moo bu o suɔmi bi ɔ ngmlaa kpami ɔ tue, nɛ o ba kɛ he wami nɛ o ba je mi.

7 Tsaatsɛ Mawu wo si kɛ je e sihi he klɔuklɔu ɔ, nɛ lɔ ɔ ha nɛ ye bua jɔ. E wo si kaa e maa ngɔ Sekem zugba a kulaa kɛ Sukot Dɔbo ɔ kɛ ha wɔ. 8 E de ke, "Gilead ɔ ye nɔ́ i, nɛ i ma ngɔ kɛ ha nyɛ; nɛ i ma ngɔ Manase hu kɛ piɛ he ha nyɛ. Ye yi pɛɛ ji Efraim zugba a, nɛ Yuda ji ye matsɛ tso. 9 Moab ji ye dɛ fɔmi nɔ́, nɛ Edom nɔ nɛ i jeɔ ye tokota kɛ pueɔ. Nɛ i ma po kunimi yemi ose ngɔ pue Filisti bi ɔmɛ a nɔ."

10 Mɛnɔ ma kpaka mi kɛ ya ma nɛ a fia gbogbo kɛ bɔle lɛ ɔ mi? Mɛnɔ ma kpaka mi kɛ ya Edom?

11 Tsaatsɛ Mawu, anɛ o ngmɛɛ wa he kɛ fɔ si lo? O nyɛɛ we wa hɛ mi kɛ yɛ ta a lo? 12 Moo ye kɛ bua wɔ nɛ waa kɛ wa he nyɛli ɔmɛ nɛ hwu ta, ejakaa nɔmlɔ he wami sui he ko. 13 Ke Tsaatsɛ Mawu ye kɛ bua wɔ ɔ, wa maa pee kã, nɛ wa ma tsu nyakpɛ ni nguahi. Lɛ nɛ e maa naa wa he nyɛli ɔmɛ a nɔ.