1 Oo Mawu, kaa bɔ nɛ kuma yee nga mi lohwe ngɛ sapu mi ɔ, ja a pɛ nɛ o he kuma ngɛ mi yee. 2 O he kuma ngɛ mi yee, mo Mawu hɛ kalɔ. Mɛni be mi ma na o hɛ mi? 3 Ya fomi nɔ kɛkɛ se i ngɛ nyɔ kɛ pia, nɛ i ngɛ pɛɛ kpae ke o ye kɛ bua mi, be mi nɛ ye he nyɛli ngɛ ye he fɛu yee. A ngɛ mi bie ke, "Jije o Mawu ɔ ngɛ?"

4 Ye susuma, mo na he nɔ kami! Tse o kai be ko nɛ be ɔ? Be nɛ o nyɛɛ nihi fuu a hɛ mi kɛ yaa Sɔlemi We ɔ ya sɔmɔɔ ngɛ gbijlɔ ligbi nɔ kɛ bua jɔmi kɛ Mawu yi jemi la a? 5 Mɛni ba nɛ aywilɛho nu mi kikɛ ɔ? Mɛni he je nɛ i hao ngɛ ye mumi mi tɔɔ nɛ ɔ? Wo o hɛ kɛ fɛ Mawu nɔ! I ma la kɛ je e yi ekohu ngɛ e yemi kɛ buami ɔ he. 6 Ami ji nɛ ɔ nɛ, ye ni pee mɔbɔ. Se kɛ ɔ, i ma susu mo Mawu o mi jɔmi kɛ ha zugba nɛ ɔ he, he nɛ Yordan Pa a bee ngɛ, kɛ he nɛ Hemon kɛ Miza yoku ɔmɛ ngɛ ɔ. 7 Haomi kɛ aywilɛho ba na mi kaa bɔ nɛ oslɔke kuɔ kɛ pueɔ nɔ nɔ ɔ.

8 Se kɛ ɔ, Tsaatsɛ Mawu jeɔ e suɔmi kpo kɛ tsɔɔ mi daa, nɛ nyɔ mi tsuo i laa e la amɛ kɛ faa kue ha Mawu nɛ haa mi wami ɔ.

9 "Oo Tsaatsɛ Mawu, ye he piɛlɔ, mɛni he je nɛ o hɛ je ye nɔ? Mɛni he je nɛ i ngɛ nɔ́ nae kikɛ ɔ ngɛ ye he nyɛli a dɛ mi?" 10 Ye he fɛu nɛ a ngɛ yee ɔ, kɛ ye hɛ mi si nɛ a ngɛ puee ɔ ha nɛ i hao. A ngɛ mi bie ke, "Jije o Mawu ɔ ngɛ lo?" 11 Se, oo ye klaa, o kɔni mi nɛ ko jɔ. Nɛ o juɛmi nɛ ko tsake. Moo hyɛ Mawu blɔ. Ejakaa i le kaa i ma na he blɔ kɛ je e yi ekohu ngɛ níhi nɛ e pee ha mi ɔ he. Lɛ ji ye yemi kɛ bualɔ! Lɛ ji ye Mawu.