1 Hyɛ bɔ nɛ Tsaatsɛ Mawu kle ha! E sa kaa wa je e yi babauu. E sihi he ji Zion Yoku ɔ nɔ ngɛ Yerusalem. 2 Hyɛ bɔ nɛ e ngɛ fɛu! Zion Yoku ɔ ji je ɔ tsuo bua jɔmi he. E fɔɔ si ngɛ Yerusalem Jɔ mi blɔ lokoo. Lejɛ ɔ ji Matsɛ ngua a sihi he.

3 Mawu nitsɛ ji Yerusalem he bulɔ. 4 Zugba a nɔ matsɛ ɔmɛ tsuo ba kpe nɛ a hyɛ ma a ha. 5 Se nɔ́ nɛ a na a ha a nya kpɛ a he nɛ a kpale a sɛ kɛ fo. 6 A ye gbeye nɛ a pee yeyeeye kaa yo nɛ nu kɔɔmi. 7 Ejakaa Mawu kpataa ta hwumi lɛ nguahi tete a hɛ mi hɛ ngmɛfia. 8 Bɔ nɛ wa nu wa Mawu nɛ ji hiɔwe tatsɛ ɔ e ma a anunyami he ɔ, ja a ji bɔ nɛ wɔ nitsɛmɛ wa ba na. Mawu to Yerusalem si kɛ yaa neneene.

9 Tsaatsɛ Mawu, o Sɔlemi We ɔ ji he nɛ wa susuu o mi mi jɔmi kɛ o suɔmi he ngɛ. 10 Oo Neneene Tsɛ, bɔ nɛ a le o biɛ ngɛ zugba a tsuo nɔ ɔ, ja a nɔuu a je ɔ o yi ngɛ he fɛɛ he, ngɛ o yi wami hemi nɛ gbɛ fia je ɔ tsuo nɔ ɔ he. 11 Mo nya, oo Yerusalem! Yuda bi, nyɛ nya, ejakaa nyagbe mi ɔ, Mawu ma ha nɛ a ye nyɛ sane ha nyɛ ngɛ dami nya. 12 Nyɛ ya hyɛ ma a ha. Nyɛɛ bɔle lɛ kɛ kpe nɛ nyɛɛ kane e sãu ɔmɛ saminya. 13 Nyɛɛ hyɛ e gbogbo ɔmɛ nɛ nyɛɛ kpa matsɛ we ɔmɛ a mi konɛ nyɛɛ sɛɛ ha nyɛ bimɛ.

14 Ejakaa Mawu agbo nɛ ɔ ji wa Mawu kɛ yaa neneene. Lɛ ji wa blɔ tsɔɔlɔ kɛ yaa si wa ma gbo.