1 Oo Tsaatsɛ Mawu, mo kpɔ mi kɛ je ye he nyɛli ɔmɛ a dɛ mi. Moo bu ye he nɛ hɛ mi kpatali nɛ ɔmɛ a nine nɛ ko su ye nɔ. 2 Moo baa ye yi nɛ o kpɔ mi kɛ je dikali kɛ nɔ gbeli nɛ ɔmɛ a dɛ mi. 3 A wo ka nɛ a tane ye yi. Oo, Tsaatsɛ Mawu, dikali kpanakuhi kpe kɛ wo ye he, nɛ pi yayami ko nɛ i pee hulɔ. 4 Se kɛ ɔ, a ngɛ hlae nɛ a kpata ye hɛ mi. Tsaatsɛ Mawu, mo wo o he nɔ nɛ o ye kɛ bua mi. 5 Lɔ ɔ he je ɔ, oo Yehowa, tahi a Mawu, Israel Mawu, o hɛ nɛ tsiɛ nɛ o gbla yayami peeli ɔmɛ tsuo a tue. Mo ko na dikali yayami peeli nɛ ɔmɛ mɔbɔ. 6 A baa daa gbɔkuɛ nɛ a ba hwɔɔ wɔ. A hii si poe ngɛ ma a mi kaa gbehi. 7 A kpaa ngmlaa nɛ a tuɔ munyu basabasa kɛ siɔ Mawu, nɛ a susuu kaa nɔ ko be nue. 8 Se Tsaatsɛ Mawu, o muɔɔ mɛ, nɛ o yeɔ mahi nɛ jaa wɔ ɔmɛ a he fɛu.

9 Oo Neneene Tsɛ, Mo nɔ nɛ o haa mi he wami, i ma la kɛ je o yi, ejakaa mo ji ye wesa he. 10 Ye Mawu suɔmi nɛ e kɛ suɔ mi ɔ tsakee we. E ma ba ye kɛ bua mi nɛ i ma ye ye he nyɛli ɔmɛ a nɔ kunimi. 11 Mo ko tane a yi, ejakaa e kɛ we nɛ ye ma mi bi ɔmɛ a hɛ jee kikɛmɛ a tue gblami nɛ ɔ nɔ; se mohu ha nɛ a didaa ngɛ o he wami ɔ nya nɛ o si mɛ si; mo ji wa he pulelɔ. 12 A ji he nɔ woli, nɔ gbiɛli kɛ lakpa yeli sɔuu, lɔ ɔ he je ɔ, o nine nɛ su a nɔ. 13 Mo kpata a hɛ mi ngɛ mi mi fumi mi, mo kpata a hɛ mi kɛ ya si a be mɛ nae hu, konɛ nimli adesahi a le kaa Tsaatsɛ Mawu ji nɔ nɛ yeɔ Israel nɔ kɛ ya si zugba a nyagbe hehi kulaa. 14 A kpaleɔ kɛ baa daa gbɔkuɛ kɛ ngmlaa kaa gbehi, nɛ a hii ma a mi kpae. 15 A kpaa si kɛ hlaa niye ni, nɛ a ha we nɛ a nu nɔ́, ke a tɔɛ.

16 Se ami lɛɛ, i ma la daa mɔtu kɛ je o he wami kɛ o mɔbɔ nami ɔ yi, ejakaa mo ji ye laami he kɛ ye wesa he ngɛ ye fimi be mi. 17 Oo Neneene Tsɛ, Mo nɔ nɛ haa mi he wami, ma la kɛ je o yi, ejakaa mo ji ye wesa he kɛ mɔbɔ nalɔ.