1 Oo Tsaatsɛ Mawu, moo te si nɛ o gbɛ ye he nyɛli ɔmɛ kɛ fia! Moo fie mɛ kɛ ho! 2 Moo nyɛɛ a se kaa la su ku nyɛɛ kɔɔhiɔ se ɔ. Mo ha nɛ a hɛ mi nɛ kpata kulaa kaa hwo gbaku nɛ sile ngɛ la mi. Mo ha nɛ yi mi wali ɔmɛ a hɛ mi nɛ kpata ngɛ o hɛ mi.

3 Se dalɔ nɛ nya. E bua nɛ jɔ nɛ e nya. 4 Nyɛ la nɛ nyɛ je Tsaatsɛ Mawu yi. Nyɛ wo nyɛ gbi nɔ nɛ nyɛ la kɛ je e yi, nɔ nɛ nyɛɛ bɔ kuu mi ɔ. Yehowa ji e biɛ. Oo, nyɛ nya ngɛ e hɛ mi. 5 Lɛ ji awusahi a tsɛ; e yeɔ yalɔyihi a sane haa mɛ, ejakaa e ngɛ klɔuklɔu. 6 E haa nɔ nɛ be nɔ ko ɔ naa weku, nɛ e jeɔ nihi nɛ a wo mɛ tsu mi nɛ a ngɛ lae kɛ bua jɔmi ɔ. Se atuã tsɔli ɔmɛ lɛɛ hwɔ maa ye mɛ nɛ a maa na nɔ́.

7 Oo Tsaatsɛ Mawu, be mi nɛ o kpaka o nimli ɔmɛ kɛ gu nga a nɔ ɔ 8 zugba hoso nɛ Hiɔwe si. Sinai Yoku ɔ huanya ngɛ o hɛ mi, mo Israel Mawu ɔ. 9 Oo Tsaatsɛ Mawu, o ha nɛ nyu ba nɛ ngɛ o zugba a nɔ fuu, e ha zugba a hi nɛ e ba ni. 10 Lejɛ ɔ ji he nɛ o nimli ɔmɛ hi, ejakaa lejɛ ɔ ji he nɛ o ngɔ kɛ ha mɛ kaa a we, be mi nɛ a ngɛ fimi mi ɔ.

11 Tsaatsɛ Mawu wo gbi. Yihi babauu hwɔ lele kɛ bua jɔmi ke, 12 "Ta amɛ nɛ ba tua wɔ nɛ a kpata wa hɛ mi ɔ, a gbɛ fia!" Yi ɔmɛ nɛ a si ngɛ se ɔ dla ta ni ɔmɛ. 13 Nyɛɛ hyɛ bɔ nɛ a he ngɛ kpɛe kɛ june nɛ a ha ngɛ ta a mi ɔ. A he fɛɛ he ngɛ kpɛe kaa lahuɛ he tsɛli. 14 Mawu gbɛ a he nyɛli ɔmɛ kɛ fia kaa bɔ nɛ kɔɔhiɔ gbɛɛ ba gbigbli kɛ fiaa ngɛ Zalmon hue tso ɔmɛ a mi ɔ.

15 Oo Basan yoku nguahi! 16 Oo Basan yoku gagahi nɛ ngɛ fɛu! Mɛni he je nɛ nyɛ ngɛ Zion Yoku ɔ hunga jee, he nɛ Mawu hla nɛ e maa hi kɛ ya neneene ɔ? 17 Tsaatsɛ Mawu hia kɛ e he bɔfohi babauu kɛ je Sinai Yoku ɔ nɔ kɛ ho e Sɔlemi We klɔuklɔu ɔ mi ya ngɛ Zion Yoku ɔ nɔ. 18 E kpaka nihi babauu nɛ a nuu mɛ ɔ kɛ kuɔ yoku ɔmɛ. E ngɔ nike níhi nɛ e na amɛ kɛ ha nyumuhi, nihi tete nɛ a ji atuã tsɔli ngɛ be ko nɛ be ɔ mi ɔ. Tsaatsɛ Mawu maa hi wa kpɛti ngɛ hiɛ ɔ.

19 E ji anunyami Mawu! Lɛ nɛ e tlooɔ wa tlomi ɔmɛ daa, nɛ e heɔ wa yi wami hulɔ.

20 E jeɔ wɔ! E kpɔɔ wɔ kɛ jeɔ gbenɔ mi. 21 Se e maa ku e he nyɛli ɔmɛ dukuduku, ejakaa a jɔɔ we a fɔ yemi ni ɔmɛ peemi, nɛ a ngmɛɛ we a kuɛ mi timi ni peemi ni ɔmɛ a he. 22 Tsaatsɛ Mawu de ke, "I ma kpale mɛ kɛ je Basan kɛ ba ekohu, i ma kpale ye we bi ɔmɛ kɛ je wo ɔ sisi lokoo kɛ ba ekohu; 23 konɛ nyɛ kpata nyɛ he nyɛli ɔmɛ a hɛ mi. Nɛ nyɛɛ ngɔ a muɔ kɛ kpa nyɛ nanehi a he, nɛ nyɛ gbehi a ye mɛ."

24 Tsaatsɛ Mawu, ye Matsɛ ɔ, kɛ e se nyɛɛli ɔmɛ yaa e sihi he klɔuklɔu ɔ. 25 Lali nyɛɛ e hɛ mi, la poli ngɛ e se, nɛ yiwi nɛ ngɛ akasawa fiae nyɛɛ kpɛti. 26 Nyɛ ha nɛ nihi tsuo nɛ ngɛ Israel ɔ a je Mawu yi, lɛ ji Israel yemi kɛ bualɔ. 27 Benyamin wɛtso wayo ɔ maa nyɛɛ hɛ mi. Yuda matsɛmɛ kɛ nimeli kɛ Zebulun kɛ Naftali matsɛmɛ maa nyɛɛ se tutuutu. 28 Oo Tsaatsɛ Mawu, mo wlua o he, nɛ o tsɔɔ o kpɔ mi he wami, ejakaa o tsu ni nguahi kɛ ha wɔ.

29 Je mi matsɛ ɔmɛ ngɔ a nike ni ɔmɛ kɛ ma o Sɔlemi We ɔ ngɛ Yerusalem. 30 Oo Neneene Tsɛ, mo ka wa he nyɛli ɔmɛ a hɛ mi. Moo jɔɔ a he nɛ o ha a ngɔ a akɔblee ɔmɛ kɛ ba. Moo gbɛ nihi nɛ nyaa ta hwumi he ɔ kɛ fia. 31 Mizraim maa ngɔ dadehi nɛ he jua wa kɛ ba kɛ. Etiopia ma kpa e ninehi a mi nɛ e maa sɔle kɛ je Mawu yi. 32 Oo, nyɛ zugba a nɔ matsɛmɛ, nyɛ la kɛ ha Tsaatsɛ Mawu; nyɛ la nɛ nyɛ je e yi. 33 Lɛ ji nɔ nɛ nyɛɛ ngɛ Hiɔwe blema a, nɔ nɛ woɔ gbi ngɛ bɔ kuu ɔ mi ɔ.

34 Mawu nɔ ji he wami! A naa e agbo jemi ɔ ngɛ Israel; e he wami ɔ kle ngɛ hiɔwe. 35 Israel Mawu ɔ he ngɛ gbeye ngɛ e sihi he klɔuklɔu ɔ. E haa e we bimɛ he wami. A je Tsaatsɛ Mawu yi!