1 Oo Tsaatsɛ Mawu, wɔ jali ɔmɛ kpɔ̃ o zugba a. A wo o Sɔlemi We klɔuklɔu ɔ he mu, nɛ Yerusalem plɛ ma doku. 2 O sɔmɔli ɔmɛ a gbogboehi pee niye ni kɛ ha lohwe pɛlitsɛhi, nɛ o nimli klɔuklɔu ɔmɛ a gbogboehi plɛ lohwe nane eywiɛtsɛhi a ngma. 3 He nyɛli ɔmɛ pue a muɔ si ngɛ Yerusalem kɛ bɔle si kaa nyu, nɛ nɔ ko be nɛ maa pu mɛ. 4 Wa pee nihi nɛ wa he guɛ gbo kɛ ha wa kasa mi bimɛ, nɛ wa pee he fɛu yemi kɛ muɔ nɔ́ kɛ ha nihi nɛ bɔle wɔ ɔ.

5 Oo Yehowa, mɛni be o ma na wɔ mi mi fumi kɛ ya si? Kɛ yaa neneene lo? Anɛ o hunga jemi ɔ maa tso kaa la kɛ ya si hɛ nɔ kami tsuo maa ta lo? 6 Mo je o mi mi fumi ɔ kɛ pue wɔ jali nɛ li mo ɔ a nɔ, kɛ mahi nɛ tsɛ we o biɛ ɔ. 7 Ejakaa a kpata o ma Israel hɛ mi, nɛ a butu we fɛɛ we. 8 Oo, koo bu wɔ fɔ ngɛ wa sa a yayami ɔmɛ a he! Moo ye kɛ bua wɔ ngɛ o mi mi jɔmi kɛ mɔbɔ nami ɔ he, ejakaa a ba wɔ si kulaa. 9 Moo ye kɛ bua wɔ, Tsaatsɛ Mawu, wa yi wami helɔ! Moo ye kɛ bua wɔ ngɛ o anunyami biɛ ɔ he. Oo, mo kpɔ wɔ nɛ o ngɔ wa yayami ɔmɛ kɛ ke wɔ. 10 Mɛni he je wɔ jali ɔmɛ na he blɔ maa ye wa he fɛu nɛ a bi ke, "Jije a Mawu ɔ ngɛ?" Nihi nɛ kpata o nimli ɔmɛ a hɛ mi ɔ, moo pee mɛ kɛ to nane mi, nɛ nɔ fɛɛ nɔ nɛ na. 11 Moo bu nihi nɛ a wo mɛ tsu mi ɔ a kɔmɔ yemi ɔ tue. Nɛ ngɛ o he wami nɛ kle ɔ nya a, mo kpɔ ni nɛmɛ nɛ a bu mɛ gbenɔ fɔ ɔ. 12 Oo Tsaatsɛ Mawu, moo to mahi nɛ ngɛ mo ahlua bɔe ɔ nane mi ngwɔ he kpaago.

13 Nɛ wɔ o nimli kɛ o to lɛlɛɛ ɔmɛ ɔ, wa maa na mo si kɛ ya neneene, nɛ wa ma je o yi kɛ ya yi nɔhi kulaa.