1 Nyɛ la la he kɛ ha Tsaatsɛ Mawu. Nyɛ je ɔ tsuo nyɛ la. 2 Nyɛ la kɛ ha Neneene Tsɛ ɔ, nyɛ je e biɛ ɔ yi. Nyɛɛ jaje e yi wami hemi ɔ he sane daa ligbi.

3 Nyɛɛ fiɛ e anunyami ni tsumi ɔmɛ ngɛ je ɔ mi he fɛɛ he. Nyɛɛ jaje e nyakpɛ ni ɔmɛ a he sane kɛ tsɔɔ nɔ tsuaa nɔ. 4 Ejakaa Mawu kle pe bɔ nɛ a ma nyɛ kale, nɛ e sa yi jemi babauu. Lɛ pɛ e sa nɛ a ja ngɛ mawu ɔmɛ kulaa a kpɛti. 5 Ejakaa amagahi kɛkɛ ji ma amɛ a mawu kpa amɛ; se wa Mawu ɔ ji nɔ nɛ bɔ hiɔwe. 6 Anunyami kɛ agbo jemi ngɛ e he; he wami kɛ he fɛu ngɛ e We ɔ.

7 Oo, nyɛ je ɔ tsuo nyɛ de ke Mawu kɛkɛ nɛ e hɛ mi ngɛ anunyami, nɛ e he wa. 8 Nyɛɛ ngɔ anunyami nɛ sa kɛ ha lɛ! Nyɛɛ ngɔ nyɛ bɔ sami ni ɔmɛ kɛ ba e We ɔ nɛ nyɛ ba ja lɛ. 9 Nyɛ sɔmɔ Tsaatsɛ Mawu ngɛ klɔuklɔu peemi mi. Nyɛ je ɔ tsuo nyɛ he nɛ kpokpo ngɛ e hɛ mi. 10 Nyɛ de je ɔ tsuo ke Yehowa ngɛ matsɛ yee! E ngɛ je ɔ nɔ yee. A be e he wami ɔ nyɛe maa gbe. E maa kojo je ɔ tsuo ngɛ dami nya.

11 Hiɔwe nɛ nya, nɛ zugba a bua nɛ jɔ; nɛ wo ɔ kɛ e mi nɔ fɛɛ nɔ a tsɔɔ e anunyami ɔ. 12 Nyɛ je e yi ngɛ zugba amɛ nɛ ngɛ ni baeɔ he, ejakaa e tsɔɔ bɔ nɛ Mawu kle ha. Tsohi nɛ ngɛ hue mi ɔ tsuo a huanya nɛ a je e yi. 13 Ejakaa Tsaatsɛ Mawu ma nɛ e ba kojo je ɔ; e maa kojo nimli ɔmɛ ngɛ dami kɛ anɔkuale mi.