Gênesis 16

ಹಾಗಾರ್ ಅನಿ ಇಸ್ಮಾಯೆಲ್

1 ಅಬ್ರಾಮಾಚಿ ಬಾಯ್ಕೊ ಸಾರಾಕ್ ಪೊರಾ ನತ್ತಿ ತಿಕಾ ಎಕ್ ಇಜಿಪ್ತಾಚಿ ಹಾಗರ್ ಮನ್ತಲ್ಯಾ ನಾವಾಚಿ ಆಳ್ ಹೊತ್ತಿ. 2 ತನ್ನಾ ಸಾರಾನ್ ಅಬ್ರಾಹಾಮಾಕ್, ದೆವಾನ್ ಮಾಕಾ ತರ್ ಪೊರಾ ದಿವ್ಕ್ ನಾ, ತಿಯಾ ಮಾಜಿ ಆಳ್ ಹಾಗಾರಾವಾಂಗ್ಡಾ ಮಿಳ್ ಅನಿ ತಿಚ್ಯಾಕ್ನಾ ಹೊತಲ್ಯಾ ಪೊರಾನಿ ಮಿಯಾ ಕುಟುಂಬ್ ಭಾಂದುನ್ಗೆತಾ ಮಟ್ಲಿನ್. 3 ಅಬ್ರಾಮ್ ಕಾನಾನ್ ದೆಶ್ಯಾತ್ ಯೆವ್ನ್ ಧಾ ವರಿಸ್ ಹೊಲ್ಲ್ಯಾ ತನ್ನಾ ಸಾರಾನ್ ಅಪ್ಲೊ ಅಬ್ರಾಹಾಮಾಕ್ ಅಪ್ಲಿ ಇಜಿಪ್ತಾಚಿ ಆಳ್ ಹಾಗರಾಕ್ ತೆಚಿ ಬಾಯ್ಕೊ ಕರುನ್ ದಿಲಿನ್. 4 ತೊ ಹಾಗರಾಕ್ ಮಿಳ್ಳೊ, ಅನಿ ತಿ ಅಬ್ರಾಮಾಕ್ನಾ ಪೊಟಾನ್ ರಾಲಿ ತೆ ತಿಕಾ ಕಳಲ್ಯಾ ತನ್ನಾ ತಿಚ್ಯಾ ಯಜಮಾನಿಕ್ ಮಾನ್ ದಿಯ್ನಾ ಹೊಲಿ.

5 ತನ್ನಾ ಸಾರಾನ್, "ಮಾಜ್ಯಾ ತರಾಸಾಕ್ ಕಾರನ್ ತಿಯಾಚ್, ಅತ್ತಾ ತಿ ಪೊಟಾನ್ ರಾವ್ಕ್ ಮಿಯಾಚ್ ತುಕಾ ದಿಲೊ ಖರೆ ತಿ ಮಾಕಾ ಮಾನ್ ದಿ ನಾ ಹೊಲಾ, ಮಾಕಾ ಅನಿ ತುಕಾ ಸರ್ವೆಸ್ಪರ್ ದೆವುಚ್ ಝಡ್ತಿ ಕರುಂದಿತ್" ಮಟ್ಲಿನ್.

6 ತನ್ನಾ ಅಬ್ರಾಮಾನ್, "ತಿಯಾ ಹಾಗಾರಾಚಿ ಯಜಮಾನಿ, ತುಕಾ ಪಾಜೆ ತಸೆ ತಿಯಾ ತಿಕಾ ಕರ್ಲ್ಯಾರ್ ಹೊತಾ," ಮನುನ್ ಸಾರಾಕ್ ಸಾಂಗ್ಲ್ಯಾನ್, ತನ್ನಾಚ್ಯಾನ್ ಸಾರಾನ್ ಹಾಗಾರಾಕ್ ತರಾಸ್ ದಿವ್ಕ್ ಶುರು ಕರ್‍ಲಿನ್, ಹಾಗರಾ ಥೈತ್ನಾ ಪಳುನ್ ಗೆಲಿ.

7 ಶುರಾ ಮನ್ತಲ್ಯಾ ಗಾಂವಾಕ್ ಜಾತಲ್ಯಾ ವಾಟೆಕ್ ಎಕ್ ಭಾಂಯ್ ಹೊತ್ತಿ, ತ್ಯಾ ಭಾಂಯಿಕ್ಡೆ ಸರ್ವೆಸ್ಪರಾಚ್ಯಾ ಧುತಾನ್ ಹಾಗರಾಕ್ ಭೆಟುನ್, 8 ಹಾಗರಾ, ಸಾರಾಚಿ ಆಳ್ ತಿಯಾ ಖೈತ್ನಾ ಯೆಲೈ?

ಅನಿ ತಿಯಾ ಖೈ ಜಾವ್ಲೆಯ್ ಮನುನ್ ಇಚಾರ್‍ಲ್ಯಾನಿ, ತನ್ನಾ ಹಾಗರಾನ್, "ಮಾಜ್ಯಾ ಯಜಮಾನಿಕ್ ಸೊಡುನ್ ಪಳುನ್ ಜಾವ್ಕ್ ಲಾಗ್ಲಾ" ಮನುನ್ ಜಾಬ್ ದಿಲಿನ್.

9 ತನ್ನಾ ದೆವ್ ಧುತಾನ್, "ಸಾರಾ ತುಜಿ ಯಜಮಾನಿ ನೈ ಕಾಯ್? ತಿಯಾ ತಿಚ್ಯಾಕ್ಡೆ ಪರ್‍ತುನ್ ಜಾ ಅನಿ ತಿಚ್ಯಾ ಹಾತಿಖಾಯ್ಲ್ ರಾ" ಮನುನ್ ಸಾಂಗ್ಲ್ಯಾನ್. 10 ಮಾನಾ ದೆವ್ ಧುತಾನ್, "ಹಾಗಾರಾ ತುಜಿ ಪಿಳ್ಗಿ ಮೆಜುಕ್ ಹೊಯ್ನಸಲ್ಲಿ ತವ್ಡಿ ಲೈ ಹೊಯ್ ಸಾರ್ಕೆ ಕರ್ತಾ" ಮಟ್ಲ್ಯಾನ್. 11 ಮಾನಾ ದೆವ್ ಧುತಾನ್ ತಿಕಾ,

ಹಾಗರಾ ತಿಯಾ ಅತ್ತಾ ಪೊಟಾನ್ ಹಾಸ್; ತುಕಾ ಎಕ್ ಲೆಕ್ ಉಪಾಜ್ತಾ, ತೆಕಾ ತಿಯಾ ಇಸ್ಮಾಯೆಲ್ ಮನುನ್ ನಾವ್ ಥವ್; ತುಜೊ ಕಸ್ಟ್ ಸರ್ವೆಸ್ಪರಾನ್ ಆಯಿಕ್ಲಾ ಮನುನ್ ಸಾಂಗ್ಲ್ಯಾನ್.

12 ಅನಿ ಇಸ್ಮಾಯೆಲ್ ಡಂಗ್ಳಿತ್ಲ್ಯಾ ಗಾಡ್ವಾ ಸಾರ್ಕೊ ಭಿರ್ಸ್ ಅನಿ ಸ್ವತಂತ್ರ್ ಹೊವ್ನ್ ರ್‍ಹಾತಾ, ಅನಿ ತೊ ಹರಿ ಎಕ್ಲ್ಯಾಕ್ ಅನಿ ಹರ್ ಎಕ್ಲೊ ತೆಕಾ ವಿರೊದ್ ಹೊವ್ನ್ ರ್‍ಹಾತಾತ್, ಅನಿ ಅಪ್ನಾಚ್ಯಾ ಸಗ್ಳ್ಯಾ ಭಾವಾಂಚ್ಯಾಕ್ನಾ ದುರ್ ರ್‍ಹಾತಾ, ಮನುನ್ ಸಾಂಗುನ್ ಥೈತ್ನಾ ಗೆಲೊ.

13 ಹಾಗಾರಾನ್ ಸರ್ವೆಸ್ಪರ್ ದೆವಾನ್ ಮಾಜ್ಯಾ ವಾಂಗ್ಡಾ ಬೊಲ್ಲಾ ಮನುನ್ ಅನಿ ಮಾಜ್ಯಾ ವಿಶಯಾತ್ ಚಿಂತ್ಲಾ ಮನುನ್ ತ್ಯಾ ಜಾಗ್ಯಾಕ್ "ಮಾಕಾ ಬಗ್ತಲೊ ದೆವ್" ಕಶ್ಯಾಕ್ ಮಟ್ಲ್ಯಾರ್, "ಮಾಕಾ ಬಗ್ತಲ್ಯಾಕ್ ಮಿಯಾ ಬಗಟ್ಲೊ" ಮನುನ್ ನಾವ್ ಥವ್ಲಿನ್.

14 ಕಾದೆಶ್ ಅನಿ ಬೆರಿದಿಯಾಚ್ಯಾ ಮದ್ದಿ ರ್‍ಹಾತಲ್ಯಾ ಹ್ಯಾ ಭಾಂಯಿಕ್ ಮಾಕಾ ಬಗಟಲ್ಲೊ ಜಿವಿತಾಚ್ಯಾ ಭಾಂಯಿಕ್ ಲಹೈರೊಯಿ ಮನುನ್ ನಾವ್ ಥವ್ಲ್ಯಾನ್.

15 ಮಾನಾ ಹಾಗರಾನ್ ಅಬ್ರಾಮಾಚ್ಯಾ ಲೆಕಾಕ್ ಜಲಮ್ ದಿಲಿನ್, ಅಬ್ರಾಮಾನ್ ಹಾಗರಾಕ್ ಉಪಾಜಲ್ಲ್ಯಾ ಝಿಲ್ಗ್ಯಾಕ್ ಇಸ್ಮಾಯೆಲ್ ಮನುನ್ ನಾವ್ ಥವ್ಲ್ಯಾನ್. 16 ಹಾಗರಾನ್ ಇಸ್ಮಾಯೆಲಾಕ್ ಜಲಮ್ ದಿಲ್ಲ್ಯಾ ತನ್ನಾ ಅಬ್ರಾಹಾಮಾಕ್ ಆಂಯ್ಸೆರ್ ಸಾ ವರಿಸ್ ಹೊಲ್ಲೊ ರ್‍ಹಾತಾ.