ಉತ್ಪತ್ತಿ 26

ಇಸಾಕ್ ಗೆರಾರ್‍ಹಾತ್ ವಸ್ತಿ ಕರ್‍ತಲೆ

1 ಅಬ್ರಾಹಾಮಾಚ್ಯಾ ಎಳಾರ್ ಯೆಲ್ಲೊ ಬರ್‍ಗಾಲ್ ಅನಿ ಪರ್‍ತುನ್ ಕಾನಾನ್ ದೆಸಾತ್ ಯೆತಾ, ತನ್ನಾ ಇಸಾಕಾನ್ ಗೆರಾರಿತ್ ರ್‍ಹಾತಲ್ಯಾ ಪಿಲಿಸ್ಟಿ ಯಾಂಚೊ ರಾಜಾ ಅಬಿಮೆಲೆಕಾಕ್ ಭೆಟುಚೆ ಮನುನ್ ಗೆಲೊ. 2 ಸರ್ವೆಸ್ಪರ್ ದೆವಾನ್ ಇಸಾಕಾಕ್ ದರ್ಶನ್ ದಿವ್ನ್ ತಿಯಾ ಇಜಿಪ್ತ್ ದೆಸಾಕ್ ಜಾವ್ನಕ್ಕೊ ಮಿಯಾ ಸಾಂಗ್ತಲ್ಯಾ ದೆಸಾತ್ ಜಾವ್ನ್ ರಾ. 3 ಅನಿ ತುಜ್ಯಾ ವಾಂಗ್ಡಾ ರ್‍ಹಾವ್ನ್ ತುಕಾ ಆಶಿರ್ವಾದ್ ದಿತಾ ಅನಿ ತುಜೊ ಬಾಬಾ ಅಬ್ರಾಹಾಮಾಕ್ ಸಾಂಗಲ್ಯಾ ಸಾರ್ಕೆ ತುಕಾ ಅನಿ ತುಜ್ಯಾ ಪಿಳ್ಗಿಕ್ ಹ್ಯೊ ದೆಶ್ ದಿತಾ ಮಟ್ಲ್ಯಾನ್. 4 ಅನಿ ಮಿಯಾ ಮಳ್ಬಾಚ್ಯಾ ಚುಕ್ಕಿಯಾಂಚ್ಯಾ ತವ್ಡೆ ಪಿಳ್ಗಿ ದಿತಾ, ಅನಿ ತುಜ್ಯಾ ಪಿಳ್ಗಿಕ್ ಹ್ಯೊ ಶಾಹಾರ್ ದಿತಾ, ತುಜ್ಯಾ ವೈನಾ ಜಿಮ್ನಿ ವೈಲ್ಯಾ ಸಗ್ಳ್ಯಾ ಸಂತಾನಾಕ್ನಿ ಆಶಿರ್ವಾದ್ ಗಾವ್ತಾ. 5 ಕಶ್ಯಾಕ್ ಮಟ್ಲ್ಯಾರ್ ಅಬ್ರಾಹಾಮಾನ್ ಮಾಜ್ಯಾ ಗೊಸ್ಟಿಕ್ ಮಾನ್ ದಿಲ್ಯಾನ್, ಅನಿ ಮಾಜಿ ಹುಕುಮಾ ಅನಿ ನಿಯಮಾಕ್ನಿ, ಮಾನ್ ದಿವ್ನ್ ಚಲಲ್ಲ್ಯಾ ವೈನಾ ಮಟ್ಲ್ಯಾನ್.

6 ತೆಚ್ಯಾ ವೈನಾ ಇಸಾಕ್ ಗೆರಾರಿತ್ ವಸ್ತಿ ರಾಲೊ. 7 ಮಾನಾ ತ್ಯಾ ಜಾಗ್ಯಾರ್ ಹೊತ್ತಿ ಲೊಕಾ ಸಗ್ಳಿ ರೆಬೆಕ್ಕಾಚ್ಯಾ ವಿಶಯಾತ್ ಇಸಾಕಾಚ್ಯಾಕ್ಡೆ ಇಚಾರಿತ್ ತನ್ನಾ ಇಸಾಕಾನ್ ತಿ ಲೈ ಸುಂದರ್ ಹೊತ್ತ್ಯಾ ಸಾಟ್ನಿ ಅಪ್ನಾಕ್ ಮಾರುನ್ ರೆಬೆಕ್ಕ್ ಕಾಡುನ್ ಘೆವ್ನ್ ಜಾತಾತ್ ಮನುನ್ ಬ್ಹಿವ್ನ್, "ತಿ ಮಾಜಿ ಭೆನ್ " ಹೊವ್ಚೆ ಮಟ್ಲ್ಯಾನ್. 8 ಮಾನಾ ಇಸಾಕ್ ಥೈ ರ್‍ಹಾವ್ನ್ ಲೈ ದಿಸಾ ಹೊಲ್ಲ್ಯಾ ಮಾನಾ ಎಕ್ ದಿಸಿ ಇಸಾಕ್ ಅನಿ ತೆಚಿ ಬಾಯ್ಕೊ ರೆಬೆಕ್ಕಾ ತೆನಿ ದೊಗೆಬಿ ಮಿಳುನ್ ಹೊತ್ತೆ ಪಿಲಿಶ್ಟಾಚೊ ರಾಜಾ ಅಬಿಮೆಲೆಕಾನ್ ಕಿಡಿಕಿತ್ನಾ ಬಗ್ಲ್ಯಾನ್, 9 ತನ್ನಾ ಅಬಿಮೆಲೆಕಾನ್ ಇಸಾಕಾಕ್ ಬಲ್ವುಕ್ ಲಾವ್ನ್,

"ಹಿ ತುಜಿ ಬಾಯ್ಕೊ ನ್ಹಯ್, ತಿಯಾ ಹಿ ಭೆನ್ ಮನುನ್ ಕಶ್ಯಾಕ್ ಸಾಂಗಲೆಯ್? ತನ್ನಾ ಇಸಾಕಾನ್ , ತಿ ಬಾಯ್ಕೊ ಮನುನ್ ಸಾಂಗ್ಲ್ಯಾರ್ ತಿಚ್ಯಾ ವೈನಾ ಮಾಜೊ ಜಿವ್ ಕಾಡ್ತಾತ್ ಮನುನ್ ಚಿಂತಲ್ಲೊ" ಮಟ್ಲ್ಯಾನ್.

10 ಮಾನಾ ಅಬಿಮೆಲೆಕಾನ್, "ತಿಯಾ ಅಸೆ ಕಾಯ್ ಕರ್ಲೆ? ಅಮ್ಚ್ಯಾತ್ ಹೊತ್ತೊ ಕೊನ್ ತರ್ಬಿ ಘೊಮಾನುಸ್ ತುಜ್ಯಾ ಬಾಯ್ಕೊಕ್ ಮಿಳುಕ್ ಅವ್ಕಾಸ್ ಕರುನ್ ದಿಲ್ಲೆ ಸಾರ್ಕೆ ಹೊಯ್ ಹೊತ್ತೆ ನ್ಹಯ್?, ತಿ ಲೈ ಮೊಟಿ ಚುಕ್ ಹೊಯ್ ಹೊತ್ತಿ" ಮಟ್ಲ್ಯಾನ್. 11 ಮಾನಾ ಅಬಿಮೆಲೆಕಾನ್ ಅಪ್ಲ್ಯಾ ಲೊಕಾಕ್ನಿ, "ಜೆ ಕೊನ್ ತರ್ ಎಕ್ಲ್ಯಾನ್ ಹ್ಯಾ ಮಾನ್ಸಾಕ್ ಅನಿ ಹೆಚ್ಯಾ ಬಾಯ್ಕೊಕ್ ಕಾಯ್ ತರಾಸ್ ದಿಲ್ಲೆ ಹೊಲ್ಯಾರ್ ತೆಂಕಾ ಮರ್ನಾಚಿ ಶಿಕ್ಷ್ಯಾ ಚುಕಲ್ಲಿ ನಾ" ಮನುನ್ ಹುಕುಮ್ ದಿಲ್ಯಾನ್.

12 ಸರ್ವೆಸ್ಪರ್ ದೆವಾನ್ ಇಸಾಕಾಕ್ ಲೈ ಆಶಿರ್ವಾದ್ ದಿಲ್ಯಾನ್, ಅನಿ ಇಸಾಕಾನ್ ತ್ಯಾ ಜಾಗ್ಯಾರ್ ಬ್ಹಿ ಫೆರಲ್ಯಾಕಿಂತಾ ಎಕಾಕ್ ಸೆಂಬರ್ ಪಟ್ಟ್ ಜಾಸ್ತಿ ಗಾವ್ಲೆ; 13 ಮಾನಾ ತೊ ದಿಸಾನ್ ದಿಸ್ ಲೈ ಆಸ್ತಿವಂತ್ ಹೊವ್ನ್ ಲೈ ಸಾವ್ಕಾರ್ ಹೊವ್ಗೆತ್ ಗೆಲೊ.

14 ಅನಿ ತೆಚ್ಯಾಕ್ಡೆ ಲೈ ಜನಾವರಾ ಅನಿ ಆಳಾ ಲೈ ಹೊತ್ತಿ ಬಗುನ್ ಪಿಲಿಸ್ಟಿಯಾಂಚ್ಯಾ ಲೊಕಾಂಚ್ಯಾ ಪೊಟಾತ್ ಆಗ್ ಪಡ್ಲಿ. 15 ತನ್ನಾ ಅಬ್ರಾಹಾಮ್ ಝಿತ್ತೊ ಹೊತ್ತ್ಯಾ ತನ್ನಾಚ್ ಅಬ್ರಾಹಾಮಾಚ್ಯಾ ಸೆವಕಾನಿ ಖಂಡಲ್ಲಿ ಭಾಂಯಾ ಪಿಲಿಸ್ಟಿಯಾನಿ ಮಾಟಿ ಗಾಲುನ್ ಮುಜ್ವುಲ್ಯಾನಿ .

16 ತನ್ನಾ ಅಬಿಮೆಲೆಕಾನ್, "ಇಸಾಕಾಕ್ ತಿಯಾ ಅಮ್ಚ್ಯಾನ್ ಆಸ್ತಿತ್ ಲೈ ಮೊಟೊ ಹೊಲೈ, ತಸೆ ಹೊವ್ನ್ ಹ್ಯೊ ದೆಶ್ ಸೊಡುನ್ ಜಾ" ಮಟ್ಲ್ಯಾನ್. 17 ಮಾನಾ ಇಸಾಕ್ ತ್ಯಾ ಗಾಂವಾತ್ನಾ ಜಾವ್ನ್ ಗೆರಾರಿಚ್ಯಾ ಕೊಳ್ಳಾತ್ ಝೊಪ್ಡೆ ಭಾಂದುನ್ ಘೆವ್ನ್ ಥೈಚ್ ವಸ್ತಿ ರಾಲೊ.

18 ಮನಾ ಅಬ್ರಾಹಾಮಾಚೆ ಮರಾನ್ ಹೊಲ್ಲ್ಯಾ ತನ್ನಾ ಇಸಾಕಾನ್ ಪಿಲಿಸ್ಟಿಯಾನಿ ಮುಜ್ವಲ್ಲಿ ಭಾಂಯಾ ಪರ್‍ತುನ್ ಕಾಡುನ್ ತೆಂಕಾ ಅಪ್ಲ್ಯಾ ಬಾಬಾನ್ ಥವಲ್ಲಿಚ್ ನಾವಾ ಥವ್ಲ್ಯಾನ್.

19 ಮಾನಾ ಇಸಾಕಾಚ್ಯಾ ಸೆವಕಾನಿ ತ್ಯಾ ಬಾರಿಕ್ಲ್ಯಾ ಝರೊವಾಚ್ಯಾ ಜಗೊಳುಚ್ ಎಕ್ ಭಾಂಯ್ ಕಾಡಲ್ಯಾನಿ ತನ್ನಾ ತ್ಯಾತುರ್ ತೆಂಕಾ ಪಾನಿ ಗಾವ್ಲೆ. 20 ಖರೆ ತ್ಯಾ ಭಾಯಚ್ಯಾ ಪಾಯಾತ್ ಗೆರಾರಿಚ್ಯಾ ಕೊಳ್ಳಾತ್ ಗೊರಾ ಬಕ್ರಿಯಾರಾಕ್ತಲ್ಯಾನಿ, ಇಸಾಕಾಚ್ಯಾ ಗೊರಾ ಬಕ್ರಿ ರಾಕ್ತಲ್ಯಾಂಚ್ಯಾ ವಾಂಗ್ಡಾ, ಹೆ ಪಾನಿ ಅಮ್ಕಾ ಸಂಮದ್ ಪಡಲ್ಲಿ ಮನುನ್ ವಾದ್ ಕರ್ಲ್ಯಾನಿ , ಇಸಾಕಾನ್ ತ್ಯಾ ಭಾಂಯಿಕ್ "ಎಸೆಕ್" ಮನುನ್ ನಾವ್ ಥವ್ಲ್ಯಾನ್.

21 ಅನಿ ಇಸಾಕಾಚ್ಯಾ ಸೆವಕಾನಿ ಅನಿ ಎಕ್ ಭಾಂಯ್ ಖಂಡ್ಲ್ಯಾನಿ, ತ್ಯಾ ಭಾಂಯಿಚ್ಯಾ ವಿಶಯಾತ್ ಬಿ ಲೊಕಾನಿ ವಾದ್ ಕರ್ಲ್ಯಾನಿ ತೆಚ್ಯಾ ವೈನಾ ಇಸಾಕಾನ್ ತ್ಯಾ ಭಾಂಯಿಕ್ "ಸಿಟ್ನಾ" ಮನುನ್ ನಾವ್ ಥವ್ಲ್ಯಾನ್, ಸಿಟ್ನಾ ಮಟ್ಲ್ಯಾರ್ ದುಶ್ಮನ್ಕಿ. 22 ಮಾನಾ ಇಸಾಕಾನ್ ಥೈತ್ನಾ ಜಾವ್ನ್ ದುಸ್ರಾಕ್ಡೆ ಅನಿ ಎಕ್ ಬಾಯ್ ಖಂಡ್ಲ್ಯಾನ್ ಖರೆ ತ್ಯಾ ಬಾಯಿಚ್ಯಾ ವಿಶಯಾತ್ ಕೊನ್ಬಿ ವಾದ್ ಕರುಕ್ ಯೆವ್ಕನಾತ್ ತಸೆ ಹೊವ್ನ್ ತೆನಿ ಸರ್ವೆಸ್ಪರ್ ದೆವಾನ್ ಅಮ್ಕಾ ಹೊ ಮಾಳ್ ಜಾಗೊ ದಿಲಾ, ಅಮಿ ಹ್ಯಾ ಜಾಗ್ಯಾ ವರ್‍ತಿ ವಾಡ್ವಳ್ಕಿ ಹೊಲ್ಯಾಂವ್ ಮನುನ್ ತ್ಯಾ ಭಾಂಯಿಕ್ "ರೆಹೊಬೊತ್" ನಾವ್ ಥವ್ಲ್ಯಾನ್.

23 ಮಾನಾ ಇಸಾಕ್ ಥೈತ್ನಾ ಬೆರ್ಶೆಬಾಕ್ ಗೆಲೊ. 24 ತ್ಯಾ ರಾತ್ತಿನ್ ಸರ್ವೆಸ್ಪರ್ ದೆವಾನ್ ಇಸಾಕಾಕ್ ದರ್ಶನ್ ದಿವ್ನ್, "ಮಿಯಾ ತುಜೊ ಬಾಬಾ ಅಬ್ರಾಹಾಮಾಚೊ ದೆವ್, ಮಿಯಾ ತುಜಾ ವಾಂಗ್ಡಾ ರ್‍ಹಾತಾ, ತಿಯಾ ಬ್ಹಿಂವ್ ನಕ್ಕೊ, ಮಿಯಾ ತುಕಾ ಆಶಿರ್ವಾದ್ ದಿತಾ, ಅನಿ ಮಿಯಾ ತುಜ್ಯಾ ಪಿಳ್ಗಿಕ್ ವಾಡ್ವುತಾ, ಮಿಯಾ ಮಾಜ್ಯಾ ಸೆವಕ್ ಅಬ್ರಾಹಾಮಾಚ್ಯಾ ಸಾಟ್ನಿ ಹೆ ಕರುಲ್ಲಾ" ಮಟ್ಲ್ಯಾನ್. 25 ತೆಚ್ಯಾ ವೈನಾ ಥೈ ಇಸಾಕಾನ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದುನ್ ಸರ್ವೆಸ್ಪರ್ ದೆವಾಕ್ ಆರಾದನ್ ಕರ್ಲ್ಯಾನ್, ಮಾನಾ ತೆಚ್ಯಾ ಸೆವಕಾನಿ ಥೈ ಅನಿ ಎಕ್ ಭಾಂಯ್ ಖಂಡ್ಲ್ಯಾನಿ ಅನಿ ಇಸಾಕ್ ಥೈ ಎಕ್ ಝೊಪ್ಡೊ ಭಾಂದುನ್ಗೆವ್ನ್ ರಾಲೊ.

ಇಸಾಕ್ ಅನಿ ಅಬಿಮೆಲೆಕಾಚೆ ಕರಾರ್

26 ತನ್ನಾ ಅಬಿಮೆಲೆಕ್ ಇಸಾಕಾಕ್ ಭೆಟುಕ್ ಮನುನ್ ಅಪ್ಲೊ ಸಲಹಾ ದಿನಾರೊ ಅಹುಜ್ಜತ್ ಅನಿ ಸೆನಾಧಿಪತಿ ಫಿಕೊಲ್ ಹೆಂಕಾ ಬಲ್ವುನ್ ಘೆವ್ನ್ ಗೆರಾರಿತ್ನಾ ಯೆಲೊ. 27 ತನ್ನಾ ಇಸಾಕಾನ್ , ತುಮಿ ಮಾಕಾ ಕುಸ್ಡೆ ಪಾನಾನಿ ಮಾಕಾ ಧಾಡುನ್ ದಿವ್ನ್ ತುಮಿ ಅತ್ತಾ ಕಶ್ಯಾಕ್ ಮಾಕಾ ಬಗುಕ್ ಮನುನ್ ಯೆಲೈ? ಮಟ್ಲ್ಯಾನ್.

28 ತನ್ನಾ ತೆನಿ ತೆಕಾ, ದೆವ್ ತುಜ್ಯಾ ವಾಂಗ್ಡಾ ಹಾಯ್ ಮನ್ತಲೆ ಮಾಕಾ ಅತ್ತಾ ಕಳುನ್ ಯೆಲಾ, ತನ್ನಾ ಮಿಯಾ ಅನಿ ತಿಯಾ ಎಕ್ ಕರಾರ್ ಕರುನ್ ಘೆಂವ್ವಾ. 29 ಅನಿ ಅಮಿ ತುಕಾ ಕಾಯ್ಬಿ ಬುರ್ಸೆ ಕರಿನಸ್ತಾನಾ ಧಾಡುನ್ ದಿಲ್ಲ್ಯಾಂವ್ ಕಿ ನಾ? ತಸೆ ಮನುನ್ ತಿಯಾಬಿ ಅಮ್ಕಾ ಕಾಯ್ಬಿ ಕರಿನಾ ಮನುನ್ ಅಮ್ಕಾ ಭಾಶ್ ದಿ, ಅಮಿ ತುಮ್ಕಾ ದುರ್ ಧಾಡುನ್ ದಿಲ್ಯಾರ್ಬಿ ಸಮಾಧಾನಾನ್ ಧಾಡುನ್ ದಿಲಾಂವ್, ಅನಿ ಅತ್ತಾ ವಾಂಗ್ಡಾ ಸರ್ವೆಸ್ಪರ್ ಹಾಯ್ ಅನಿ ತುಕಾ ಆಶಿರ್ವಾದ್ ಕರುಕ್ ಲಾಗ್ಲಾ, ಮಟ್ಲ್ಯಾನ್. 30 ಇಸಾಕಾನ್ ತೆಂಚ್ಯಾ ಸಾಟ್ನಿ ಮೊಟೆ ಜೆವಾನ್ ತಯಾರ್ ಕರ್ಲ್ಯಾನ್, ತೆನಿ ಜೆವ್ನ್ ಖಾವ್ನ್ ಫಿಲ್ಯಾನಿ. 31 ಮಾನಾ ದುಸ್ರೆ ದಿಸಿ ಸಕ್ಕಾಳಿ ತೆನಿ ದೊಗೆಬಿ ಎಕಾ ಮೆಕಾಕ್ ಕರಾರ್ ಕರುನ್, ಜಾವ್ನ್ ಯೆತಾಂವ್ ಮನುನ್ ಸಾಂಗುನ್ ಗೆಲೆ.

32 ತ್ಯಾ ದಿಸಿ, ಇಸಾಕಾಚ್ಯಾ ಸೆವಕಾನಿ ಯೆವ್ನ್, ತೆನಿ ಖಂಡಲ್ಯಾ ಭಾಂಯಿಚ್ಯಾ ವಿಶಯಾತ್, "ಅಮ್ಕಾ ಭಾಂಯಿತ್ ಎಕ್ ಝರೊ ಗಾವ್ಲಾ" ಮನುನ್ ಸಾಂಗ್ಲ್ಯಾನಿ. 33 ಇಸಾಕಾನ್ ತ್ಯಾ ಶಾರಾಕ್ ಬೆರ್ಶೆಬಾ ಮನುನ್ ನಾವ್ ಥವಲ್ಯಾ ಸಾರ್ಕೆ ತ್ಯಾ ಭಾಂಯಿಕ್ "ಶಿಬಾ" ಮನುನ್ ನಾವ್ ಥವ್ಲ್ಯಾನ್, ತ್ಯಾ ಗಾಂವಾಕ್ ಅಜುನ್ ಪತರ್ಬಿ ಬೆರ್ಶೆಬ್ ಮನುನ್ ಬಲ್ವುತಾತ್.

ಎಸಾವಾಚಿ ಬಾಯ್ಕಾ ಭಾಯ್ಲ್ಯಾ ದೆಶಾಚಿ

34 ಚಾಳಿಸ್ ವರ್ಸಾ ಹೊಲ್ಲ್ಯಾ ಮಾನಾ ಎಸಾವಾನ್ ಹಿತ್ತಿಯಾಂಚ್ಯಾ ದೊನ್ ಬಾಯ್ಕಾಕ್ನಿ ನಗಿನ್ ಹೊಲೊ, ತೆಂಚ್ಯಾತ್ ಎಕ್ಲಿ ಬೆರಿಯಾಚಿ ಲೆಕ್ ಜುಡಿತಾ, ಅನಿ ಎಕ್ಲಿ ಎಲೊನಾಚಿ ಲೆಕ್ ಬಾಸೆಮತ್. 35 ಇಸಾಕ್ ಅನಿ ರೆಬೆಕ್ಕಾಕ್ ಹ್ಯಾ ಲಗ್ನಾ ವಯ್ನಾ ಮನಾಕ್ ಲೈ ಬೆಜಾರ್ ಹೊಲೆ.