ಉತ್ಪತ್ತಿ 29

ಜಾಕೊಬ್ ಲಾಬಾನಾಚ್ಯಾ ಘರಾಕ್ ಪಾವ್ಲೊ

1 ಮಾನಾ ಜಾಕೊಬ್ ಚಲುನ್ಗೆತ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ಲ್ಯಾ ದೆಸಾಕ್ ಜಾವ್ನ್ ಪಾವ್ಲೊ, 2 ತನ್ನಾಚ್ ತೆಕಾ ತ್ಯಾ ಡಂಗ್ಳಿತ್ ಎಕ್ ಭಾಂಯ್ ದಿಸ್ಲಿ, ಅಬಕ್ ಥೈ ತ್ಯಾ ಬಾಂಯ್ಚ್ಯಾ ಜಗ್ಗೊಳ್ ತಿನ್ ಶೆಳಿಯಾಂಚೆ ತಾಂಡೆ ಬಸುನ್ ಹೊತ್ತೆ, ತ್ಯಾ ಭಾಂಯ್ಚೆ ಪಾನಿ ಶೆಳಯಾಕ್ನಿ ಫಿವ್ಸಿತ್, ತ್ಯಾ ಭಾಂಯಿ ವರ್‍ತಿ ಧಾಪಲ್ಲೊ ಗುಂಡೊ ಮೊಟೊ ಹೊತ್ತೊ. 3 ಥೈ ಫುರಾ ಶೆಳಿಯಾ ಗೊಳಾ ಹೊವ್ನ್ ಯೆಲ್ಲ್ಯಾ ತನ್ನಾ ಭಾಂಯಿ ವೈಲೊ ಗುಂಡೊ ಢಕ್ಲುನ್ ಕಾಡುನ್ ಶೆಳಿಯಾಕ್ನಿ ಪಾನಿ ಪಾಜ್ವುನ್ ಪರ್‍ತುನ್ ದಾಪುನ್ ಥೈತ್.

4 ಜಾಕೊಬಾನ್ ತೆಂಕಾ, "ಭಾವಾನೊ ತುಮಿ ಕಲ್ಯಾ ಗಾಂವ್ಚೆ?" ಮನುನ್ ಇಚಾರ್‍ತಾನಾ ತೆನಿ ,

"ಅಮಿ ಹಾರಾನ್ ಮನ್ತಲ್ಯಾ ಗಾಂವ್ಚೆ" ಮಟ್ಲ್ಯಾನಿ.

5 ತನ್ನಾ "ನಾಹೊರಾಚೊ ನಾತು ಲಾಬಾನಾಚಿ ತುಮ್ಕಾ ಒಳಕ್ ಹಾಯ್ ಕಾಯ್?" ಮನುನ್ ಇಚಾರ್‍ತಾನಾ, "ವಳಕ್ತಾಂವ್" ಮನುನ್ ಜವಾಬ್ ದಿಲ್ಯಾನಿ.

6 "ತೆನಿ ಸಗ್ಳೆ ಆರಾಮ್ ಕಾಯ್?" ಮನುನ್ ಇಚ್ಯಾರ್ತಾನಾ "ಹೊಯ್ ತೆನಿ ಆರಾಮ್ ಹಾತ್ ಅಬಕ್ ತೆಚಿ ಲೆಕ್ ರಾಖೆಲ್ ಶೆಳಿಯಾಂಚ್ಯಾ ವಾಂಗ್ಡಾ ಯೆವ್ಲಾ" ಮಟ್ಲ್ಯಾನಿ.

7 ತನ್ನಾ ಜಾಕೊಬಾನ್, "ಶೆಳಿಯಾಕ್ನಿ ಪಾನಿ ಫಿವ್ಸುನ್ ಚಾರ್ವುಕ್ ಕಶ್ಯಾಕ್ ಸೊಡಿನ್ಯಾಸಿ? ಅಜುನ್ ದಿಸ್ ಬುಡುಕ್ ಲೈ ಎಳ್ ಹಾಯ್; ಶೆಳಿಯಾಕ್ನಿ ಗೊಳಾ ಕರ್ತಲೊ ಎಳ್ ಹೊವ್ನಾ" ಮಟ್ಲ್ಯಾನ್.

8 ತನ್ನಾ ತೆನಿ "ಸಗ್ಳೆ ಜಾನಾ ಶೆಳಿಯಾ ರಾಕ್ತಲ್ಯಾನಿ ಗೊಳಾ ಹೊವ್ನ್ ಭಾಂಯಿ ವರ್‍ತಿ ಧಾಪಲೊ ಗುಂಡೊ ಕಾಡಿ ಪತರ್ ಪಾನಿ ಫಿವಸ್ತಲೆ ನಾ, ತೊ ಗುಂಡೊ ಸರಕಲ್ಲ್ಯಾ ತನ್ನಾಚ್ ಶೆಳಿಯಾಕ್ನಿ ಪಾನಿ ಫಿವ್ಸುತಾಂವ್", ಮಟ್ಲ್ಯಾನಿ.

9 ಜಾಕೊಬ್ ಅಜುನ್ ತೆಂಚ್ಯಾ ವಾಂಗ್ಡಾ ಬೊಲುನ್ಗೆತ್ ರ್‍ಹಾತಾನಾಚ್ ಶೆಳಿಯಾ ರಾಕುಂಗೆತ್ ರಾಹೆಲ್ ಅಪ್ಲ್ಯಾ ಬಾಬಾಚಿ ಶೆಳಿಯಾ ಹಾಂಬ್ಡುನ್ ಘೆವ್ನ್ ಯೆವ್ನ್ ಪಾವ್ಲಿ. 10 ಅಪ್ಲೊ ಮಾವ್ಳೊ ಲಾಬಾನಾಚಿ ಲೆಕ್ ರಾಖೆಲ್ ಅನಿ ತೆಚಿ ಶೆಳಿಯಾ ಬಗಟಲ್ಲೊ ತಸೊಚ್ ಜಾಕೊಬಾನ್ ಭಾಂಯಿಚ್ಯಾ ಜಗ್ಗೊಳ್ ಜಾವ್ನ್ ಗುಂಡೊ ಸರ್ಕುನ್ ಮಾವ್ಳ್ಯಾಚ್ಯಾ ಶೆಳಿಯಾಕ್ನಿ ಪಾನಿ ಫಿವ್ಸುಲ್ಯಾನ್.

11 ಅನಿ ಜಾಕೊಬಾನ್ ರಾಖೆಲಾಕ್ ಉಪ್ಪಾ ದಿಲ್ಯಾನ್; ಅನಿ ಮೊಟ್ಯಾನ್ ರಡ್ಲ್ಯಾನ್,

12 ಅಪ್ನಿ ತಿಚ್ಯಾ ಬಾಬಾಚೊ ಭಾಚೊ, ರೆಬೆಕಾಚೊ ಲೆಕ್ ಮಟ್ಲ್ಯಾನ್, ರಾಖೆಲಾನ್ ಲಗ್ಗುನಾ ಪಳುನ್ಗೆತ್ ಜಾವ್ನ್ ಹಿ ಖಬರ್ ಅಪ್ಲ್ಯಾ ಬಾಬಾಕ್ ಸಾಂಗ್ಲಿನ್. 13 ಲಾಬಾನಾನ್ ಅಪ್ಲೊ ಭಾಚೊ ಯೆಲ್ಲಿ ಖಬರ್ ಆಯ್ಕುನ್ ತೆಕಾ ಭೆಟುಕ್ ಮನುನ್ ಪಳುನ್ಗೆತ್ ಗೆಲೊ, ಅನಿ ಜಾಕೊಬಾಕ್ ಯಾಂಗ್ ಮಾರುನ್ ಉಪ್ಪಾ ದಿವ್ನ್, ಘರಾಕ್ ಬಲ್ವುನ್ ನ್ಹೆಲ್ಯಾನ್, ಜಾಕೊಬಾನ್ ಹೊಲ್ಲಿ ಖಬರ್ ಫುರಾ ಲಾಬಾನಾಕ್ ಸಾಂಗ್ಲ್ಯಾನ್. 14 ಲಾಬಾನಾನ್ "ತಿಯಾ ಖರೆಚ್ಬಿ ಮಾಜ್ಯಾ ರಗ್ತಾಚೊ ಸಮಂದಿಕ್ " ಮಟ್ಲ್ಯಾನ್ ಜಾಕೊಬ್ ತೆಚ್ಯಾ ವಾಂಗ್ಡಾ ಎಕ್ ಮ್ಹೈನೊ ಪತರ್ ವಸ್ತಿ ರಾಲೊ.

15 ಎಕ್ ದಿಸ್ ಲಾಬಾನಾನ್ ತಿಯಾ ಮಾಜೊ ಸಮಂದಿಕ್ ಮನುನ್ ತುಜ್ಯಾಕ್ಡೆ ಫುಕೊಟ್ ಕಾಮ್ ಕರುನ್ ಘೆತಲೆ ಬರೆ ನೈ; ತುಜ್ಯಾ ಕಾಮಾಕ್ ಕಾಯ್ ಪಗಾರ್ ದಿವ್ಚೆ ಸಾಂಗ್? ಮನುನ್ ಇಚಾರ್‍ಲ್ಯಾನಿ. 16 ಲಾಬಾನಾಕ್ ದೊನ್ ಲೆಕಿಯಾ ಹೊತ್ತಿ ಥೊರ್ಲಿಚೆ ನಾವ್ ಲೆಯಾ ಅನಿ ಧಾಕ್ಲಿಚೆ ನಾವ್ ರಾಖೆಲ್. 17 ಲೆಯಾಚೆ ಡೊಳೆ ತಿರ್ಸೆ ಹೊತ್ತೆ ಅನಿ ರಾಖೆಲ್ ಅಂಗಾನ್ ಅನಿ ನಾಕಾ ಡೊಳ್ಯಾನಿ ಲೈ ಸುಂದರ್ ಹೊತ್ತಿ.

18 ಜಾಕೊಬಾಕ್ ರಾಖೆಲಾ ವರ್‍ತಿ ಪ್ರೆಮ್ ಹೊಲ್ಲೊ ಅನಿ ತೆನಿ "ತುಜಿ ಧಾಕ್ಲಿ ಲೆಕ್ ರಾಖೆಲಾಕ್ ಲಗಿನ್ ಹೊವ್ಕ್ ಸಾಟ್ನಿ ತುಜೆಕ್ಡೆ ಸಾತ್ ವರಿಸ್ ಕಾಮ್ ಕರ್ತಾ" ಮಟ್ಲ್ಯಾನ್.

19 ಲಾಬಾನಾನ್ "ತಿಯಾ ಮಾಜೆಕ್ಡೆಚ್ ರಾ ತಿಕಾ ದುಸ್ರ್ಯಾಕ್ನಿ ದಿತಲ್ಯಾ ಕಿಂತಾ ತುಕಾಚ್ ದಿತಲೆ ಬರೆ" ಮಟ್ಲ್ಯಾನ್.

20 ತಸೆಚ್ ಜಾಕೊಬಾನ್ ರಾಖೆಲಾಸಾಟ್ನಿ ಸಾತ್ ವರಿಸ್ ಪತರ್ ಕಾಮ್ ಕರ್ಲ್ಯಾನ್ ತಿಚೆ ವರ್‍ತಿ ತೆಕಾ ಲೈ ಪ್ರೆಮ್ ಹೊತ್ತ್ಯಾ ಸಾಟ್ನಿ ತೆಕಾ ಉಲ್ಲಿಚ್ ದಿಸಾ ಕಾಮ್ ಕರಲ್ಲ್ಯಾ ಸಾರ್ಕೆ ದಿಸ್ಲೆ.

21 ಮಾನಾ ಜಾಕೊಬಾನ್ ಮಾಜಿ ಕಾಮಾಚಿ ದಿಸಾ ಸರ್ಲಿ ತುಜ್ಯಾ ಲೆಕಿಕ್ ಮಾಕಾ ಲಗಿನ್ ಕರುನ್ ದಿ ಮಟ್ಲ್ಯಾನ್. 22 ತನ್ನಾ ಲಾಬಾನಾನ್ ಗಾಂವ್ಚ್ಯಾ ಸಗ್ಳ್ಯಾ ಲೊಕಾಕ್ನಿ ಬಲ್ವುನ್ ಲಗ್ನಾಚೆ ಜೆವಾನ್ ಘಾಟ್ಲ್ಯಾನ್. 23 ಖರೆ ರ್‍ಹಾತ್ ಹೊಲ್ಲ್ಯಾ ತನ್ನಾ ಲಾಬಾನಾನ್ ಅಪ್ಲಿ ಥೊರ್ಲಿ ಲೆಕ್ ಲೆಯಾಕುಚ್ ಜಾಕೊಬಾಕ್ಡೆ ಬಲ್ವುನ್ ಹಾನ್ಲ್ಯಾನ್ ಅನಿ ಜಾಕೊಬ್ ತಿಚ್ಯಾ ವಾಂಗ್ಡಾ ಮಿಳ್ಲೊ. 24 ಅನಿ ಲಾಬಾನಾನ್ ಅಪ್ಲಿ ಲೆಕ್ ಲೆಯಾಕ್ ಜಿಲ್ಬಾ ಮನ್ತಲಿ ಆಳ್ ದಿಲ್ಯಾನ್. 25 ಜಾಕೊಬಾಕ್ ಸಕ್ಕಾಳಿ ಬಗ್ತಾನಾ ತಿ ಲೆಯಾ ಮನುನ್ ಕಳ್ಳೆ, ಅನಿ ತೆನಿ ಮಿಯಾ ಕಾಮ್ ಕರಲೆ ರಾಖೆಲಾ ಸಾಟ್ನಿ , ತಿಯಾ ಅಸೆ ಕಶ್ಯಾಕ್ ಕರ್‍ಲೆ ? ಮಾಕಾ ಕಶ್ಯಾಕ್ ಪಸ್ವುಲೆಯ್? ಮನುನ್ ಲಾಬಾನಾಕ್ ಇಚಾರ್‍ಲ್ಯಾನಿ.

26 ತನ್ನಾ ಲಾಬಾನಾನ್ ಥೊರ್ಲ್ಯಾ ಲೆಕಿಕ್ ಹುರ್ವುನ್ ಘೆವ್ನ್ ಧಾಕ್ಲ್ಯಾ ಲೆಕಿಕ್ ಲಗಿನ್ ಕರುನ್ ದಿತಲಿ ಅಮ್ಚ್ಯಾ ಹಿತ್ತೆತ್ಲಿ ಪಜ್ಜತ್ ನಾ, 27 ಥೊರ್ಲಿಚ್ಯಾ ವಾಂಗ್ಡಾ ಲಗ್ನಾಚಿ ಸಾಸ್ತರಾ ಸಗ್ಳಿ ಸಾರುನ್ಗೆ ಮಾನಾ ಅನಿ ಪರ್‍ತುನ್ ಸಾತ್ ವರಿಸ್ ಕಾಮ್ ಕರ್‍ತೆ ಹೊಲ್ಯಾರ್ ದಾಕ್ಲ್ಯಾ ಲೆಕಿಕ್ಬಿ ಲಗಿನ್ ಕರುನ್ ದಿತಾ ಮಟ್ಲ್ಯಾನ್.

28 ಜಾಕೊಬಾನ್ ಹೆಕಾ ಒಪ್ಪುನ್ ಥೊರ್ಲಿ ವಾಂಗ್ಡಾ ಲಗ್ನಾಚಿ ಸಾಸ್ತರಾ ಸಾರ್ಲ್ಯಾನ್ , ಮಾನಾ ಲಾಬಾನಾನ್ ಅಪ್ಲಿ ಧಾಕ್ಲಿ ಲೆಕ್ ರಾಹೆಲಾಕ್ ತೆಕಾ ಲಗಿನ್ ಕರುನ್ ದಿಲ್ಯಾನ್. 29 ಅಪ್ಲ್ಯಾಚಿ ಆಳ್ ಬಿಲ್ಹಾಕ್, ಅಪ್ನಾಚ್ಯಾ ಲೆಕಿಕ್ ಆಳ್ ಕರುನ್ ದಿಲ್ಯಾನ್. 30 ಜಾಕೊಬ್ ರಾಹೆಲಾ ವಾಂಗ್ಡಾ ಮಿಳ್ಲೊ ತಿಕಾ ಲೆಯಾ ಕಿಂತಾಬಿ ಲೈ ಪ್ರೆಮ್ ಕರ್ಲ್ಯಾನ್, ಅನಿ ತಿಕಾ ಲಾಗುನ್ ಅನಿ ಸಾತ್ ವರಿಸ್ ಲಾಬಾನಾಚಿ ಸೆವಾ ಕರ್ಲ್ಯಾನ್.

ಜಾಕೊಬಾಕ್ ಪೊರಾ

31 ಅಸೆ ರ್‍ಹಾತಾನಾ ಜಾಕೊಬಾಕ್ ಲೆಯಾಚ್ಯಾ ವರ್‍ತಿ ಪ್ರೆಮ್ ಕಮ್ ಹೊಲೊ, ಹೆ ಬಗುನ್ ಸರ್ವೆಸ್ಪರ್ ದೆವಾನ್ ತಿಕಾ ಪೊಟಾನ್ ರ್‍ಹಾತಲೆ ಆಶಿರ್ವಾದ್ ದಿಲ್ಯಾನ್, ಅನಿ ರಾಹೆಲ್ ವಾಂಜ್ಡಿ ಹೊವ್ನ್ ರಾಲಿ. 32 ಲೆಯಾ ಪೊಟಾನಿ ರ್‍ಹಾವ್ನ್ ಲೆಕಾಕ್ ಜಲಮ್ ದಿಲಿನ್, ಸರ್ವೆಸ್ಪರ್ ದೆವಾನ್ ಮಾಜೊ ತರಾಸ್ ಬಗ್ಲ್ಯಾನ್ ಅನಿ ಮಾಜೊ ನ್ಹೌರೊ ಮಾಕಾ ಹೆಜ್ಯಾನ್ ಫಿಡೆ ಪ್ರೆಮ್ ಕರ್ತಾ ಮನುನ್ಗೆವ್ನ್ ತ್ಯಾ ಲೆಕಾಕ್ ರುಬೆನ್ ಮನುನ್ ನಾವ್ ಥವ್ಲಿನ್. 33 ತಿನಿ ಅನಿಬಿ ಪೊಟಾನಿ ರ್‍ಹಾವ್ನ್ ಲೆಕಾಕ್ ಜಲಮ್ ದಿಲಿನ್, ಮಾಕಾ ನ್ಹೌರೊ ಸಮಾ ಬಗಿ ನಸಿ ತೆ ಕಳುನ್ ಸರ್ವೆಸ್ಪರ್ ದೆವಾನ್ ಮಾಕಾ ಲೆಕ್ ದಿಲಾ ಮನುನ್ ತೆಕಾ ಸಿಮೆಯೊನ್ ಮನುನ್ ನಾವ್ ಥವ್ಲಿನ್. 34 ಅನಿಬಿ ಪೊಟಾನಿ ರ್‍ಹಾವ್ನ್ ಲೆಕಾಕ್ ಜಲಮ್ ದಿವ್ನ್ ಮಾಜ್ಯಾ ನ್ಹವ್ರ್ಯಾಕ್ ತಿನ್ ಲೆಕಾಕ್ನಿ ಜಲಮ್ ದಿಲೊ ಅತ್ತಾತರಿಬಿ ಅಮಿ ಎಕ್ ಹೊತಲಾಂವ್ ಮನುನ್ ತೆಕಾ ಲೆವಿ ಮನುನ್ ನಾವ್ ಥವ್ಲಿನ್. 35 ಅನಿಬಿ ಪರ್‍ತುನ್ ಪೊಟಾನಿ ರ್‍ಹಾವ್ನ್ ಲೆಕಾಕ್ ಜಲಮ್ ದಿವ್ನ್ ಅತ್ತಾ ಸರ್ವೆಸ್ಪರ್ ದೆವಾಚಿ ಸ್ತುತಿ ಕರ್ತಾ ಮನುನ್ ತೆಕಾ ಜೆಹುದಾ ಮನುನ್ ನಾವ್ ಥವ್ಲಿನ್, ಮಾನಾ ತಿಕಾ ಪೊರಾ ಹೊತಲಿ ಬಂದ್ ಹೊಲೆ.