Gênesis 50

1 ತನ್ನಾ ಜುಜೆನ್ ಅಪ್ಲ್ಯಾ ಬಾಬಾಚ್ಯಾ ತೊಂಡಾ ವರ್‍ತಿ ಡಬ್ಬ್ ಪಡುನ್ ಲೈ ರಡುನ್ ತೆಕಾ ಉಪ್ಪಾ ದಿಲ್ಯಾನ್. 2 ಮಾನಾ ಅಪ್ಲ್ಯಾ ಆಳಾತ್ನಿ ಮಡ್ಯಾಕ್ ನ್ಹಾವಸ್ತಲ್ಯಾಕ್ನಿ ಬಲ್ವುನ್ ಬಾಬಾಚ್ಯಾ ಮಡ್ಯಾಕ್ ಬರ್‍ಯಾ ವಾಸೆಚ್ಯಾ ತೆಲಾನಿ ನ್ಹಾವ್ಸುನ್ ತಯಾರ್ ಕರುಕ್ ಹುಕುಮ್ ದಿಲ್ಯಾನ್, ತೆನಿ ತಸೆಚ್ ಕರ್ಲ್ಯಾನಿ. 3 ಚಾಳಿಸ್ ದಿಸಾಂಚ್ಯಾ ಪತರ್ಬಿ ಬರ್‍ಯಾ ವಾಸೆಚ್ಯಾ ತೆಲಾನಿ ನ್ಹಾವಸ್ತಲಿ ಪದ್ದತ್ ಹೊತ್ತಿ ತಸೆ ಹೊವ್ನ್ ತೆಕಾ ತವ್ಡೆ ದಿಸ್ಬಿ ನ್ಹಾವ್ಸುನ್ ಹೊಲೆ, ಅನಿ ಸತ್ತರ್ ದಿಸ್ ಪತರ್ ಬಿ ಇಜಿಪ್ತಾತ್ ಜಾಕೊಬಾಸಾಟ್ನಿ ರಡ್ಲ್ಯಾನಿ ಅನಿ ದುಕ್ಕಾಚಿ ದಿಸಾ ಆಚರನ್ ಕರ್ಲ್ಯಾನಿ.

4 ದುಕ್ಕಾಚಿ ದಿಸಾ ಕಳದ್ಲ್ಯಾ ಮಾನಾ ಜುಜೆನ್ ಪರೊಹಾಚ್ಯಾ ಘರ್ಚ್ಯಾ ಲೊಕಾಕ್ನಿ ತುಮಿ ದಯಾ ಕರುನ್ ಮಾಜಿ ಗೊಸ್ಟಿಯಾ ಪರೊಹಾಕ್ ಸಾಂಗಾ, 5 ಮಾಜ್ಯಾ ಬಾಬಾನ್ ಮರುಚ್ಯಾ ಪೈಲೆಚ್ ಅಪ್ನಿ ಕಾನಾನ್ ದೆಶ್ಯಾತ್ ತಯಾರ್ ಕರುನ್ ಥವಲ್ಯಾ ಸಮಾದಿತ್ ಅಪ್ಲಿ ಮಾಟಿ ಕರುಚೆ ಮನುನ್ ಶಪತ್ ಕರ್ಸುನ್ಗೆಟಲ್ಯಾನ್, ತಸೆ ಹೊವ್ನ್ ದಯಾ ಕರುನ್ ಮಿಯಾ ಜಾವ್ನ್ ಬಾಬಾಚಿ ಮಾಟಿ ಕರುನ್ ಯೆವ್ಕ್ ಒಪ್ಕಿ ದಿವ್ಚೆ, ಮಾನಾ ಮಿಯಾ ಪರ್‍ತುನ್ ಯೆತಾ ಮಟ್ಲ್ಯಾನ್.

6 ಪರೊಹಾನ್ ಹಿ ಗೊಸ್ಟ್ ಆಯ್ಕುನ್ ಜುಜೆಕ್, "ತುಜ್ಯಾ ಬಾಬಾಕ್ ಗೊಸ್ಟ್ ದಿಲ್ಲ್ಯಾ ಸಾರ್ಕೆ ತಿಯಾ ಜಾವ್ನ್ ಮಾಟಿ ಕರುನ್ ಯೆ" ಮನುನ್ ಒಪ್ಕಿ ದಿಲ್ಯಾನ್.

7 ಜುಜೆ ಅಪ್ಲ್ಯಾ ಬಾಬಾಕ್ ಮಾಟಿ ಕರುಕ್ ಜಾತಾನಾ, ತೆಜ್ಯಾವಾಂಗ್ಡಾ ಪರೊಹಾಚ್ಯಾ ಘರಾಚೆ ಸಗ್ಳೆ ಜಾನಾ ಅನಿ ರಾಜಾಚ್ಯಾ ಘರ್ಚಿ ಮುಖಂಡಾ, ಸಗ್ಳಿಲೊಕಾ ಇಜಿಪ್ತಾಚಿ ಮುಖಂಡಾ, 8 ಅನಿ ಜೊಸೆಪಾಚ್ಯಾ ಘರ್ಚಿ ಸಗ್ಳಿ ಲೊಕಾ ಅನಿ ತೆಚಿ ಭಾವಾ ಗೆಲಿ, ತೆನಿ ಅಪ್ಲಿ ಬಾಯ್ಕಾ ಪೊರಾ ಅನಿ ಜನಾವರಾ ತವ್ಡಿಚ್ ಗೊಶೆನಾತ್ ಸೊಡುನ್ ಗೆಲ್ಯಾನಿ. 9 ಅನಿ ತೆಚ್ಯಾ ವಾಂಗ್ಡಾ ರಥಾ ಅನಿ ಘೊಡ್ಕಿಯಾ ಚಾಲ್ವುತಲಿ ಲೊಕಾಬಿ ಹೊತ್ತಿ, ಅಸೆ ಲೈ ಮೊಟೊ ಲೊಕಾಂಚೊ ತಾಂಡೊಚ್ ತೆಚ್ಯಾ ವಾಂಗ್ಡಾ ಗೆಲೊ.

10 ತೆನಿ ಜೊರ್ದಾನ್ ನ್ಹಯಿಚ್ಯಾ ಪೈಲ್ಯಾನ್ ಹೊತ್ತ್ಯಾ ಅಟಾದ್ ಮನ್ತಲ್ಯಾ ಖಳ್ಯಾತ್ ಯೆವ್ನ್ ಲೈ ರಡ್ಲ್ಯಾನಿ, ಅನಿ ಜಾಕೊಬಾನ್ ಬಾಬಾಸಾಟ್ನಿ ಸಾತ್ ದಿಸಾಚೆ ದುಕ್ಕಾಚೆ ಆಚರನ್ ಕರ್ಲ್ಯಾನ್. 11 ಅಟಾದ್ ಮನ್ತಲ್ಯಾ ಖಳ್ಯಾತ್ ಹೊಲ್ಲೆ ದುಕ್ಕಾಚೆ ಆಚರನ್ ಬಗುನ್ ತ್ಯಾ ಗಾಂವ್ಚ್ಯಾ ಕಾನಾನ್ ಲೊಕಾನಿ, ಇಜಿಪ್ತಾಚ್ಯಾ ಲೊಕಾಕ್ನಿ ಯೆಲ್ಲೆ ಹೆ ದುಕ್ಕಾಚೆ ಆಚರನ್ ಲೈ ವಿಶೆಸ್ ಹಾಯ್ ಮಟ್ಲ್ಯಾನಿ! ಹೆಜ್ಯಾ ವೈನಾ ಜೊರ್ದಾನ್ ನ್ಹಯ್ಚ್ಯಾ ಪೈಲ್ಯಾನ್ ಹೊತ್ತ್ಯಾ ಹ್ಯಾ ಜಾಗ್ಯಾಕ್ ಅಬೆಲ್ ಮಿಚ್ರಯಿಮ್ ಮನುನ್ ನಾವ್ ಪಡ್ಲೆ.

12 ಜಾಕೊಬಾಚ್ಯಾ ಲೆಕಾನಿ ಬಾಬಾಚ್ಯಾ ಹುಕುಮಾ ಸಾರ್ಕೆ ಕರ್ಲ್ಯಾನಿ, 13 ತೆಚಿ ಮಡೆ ಕಾನಾನ್ ದೆಶ್ಯಾಕ್ ಉಕ್ಲುನ್ ನ್ಹೆವ್ನ್ ಮೆಕ್ಬೆಲ್ ಮನ್ತಲ್ಯಾ ಮಾಳ್ ಜಾಗ್ಯಾರ್ ಹೊತ್ತ್ಯಾ ಡೊಂಬಾತ್ ಮಾಟಿ ಕರ್ಲ್ಯಾನಿ, ಮಾಮ್ರೆಚ್ಯಾ ಇದ್ರಾಚೊ ಅನಿ ತೆಚ್ಯಾ ಅಜುಭಾಜುಕ್ ಹೊತ್ತೊ ತೊ ಜೊಗೊ ಅಬ್ರಾಮಾನ್ ಹಿತ್ತಿಯಾಂಚ್ಯಾ ಎಪ್ರೊನಾಕ್ನಾ ಸೆತ್ಯಾಚ್ಯಾ ವಾಂಗ್ಡಾ ಸ್ವತಾಕ್ ಸಮಾದಿಚೊ ಜಾಗೊ ಕರುನ್ ಇಕಾತ್ ಘೆಟಲ್ಯಾನ್. 14 ಬಾಬಾಕ್ ಮಾಟಿ ಕರುನ್ ಹೊಲ್ಯಾ ಮಾನಾ ಜುಜೆ, ತೆಚಿ ಭಾವಾ ಅನಿ ತೆಂಚ್ಯಾ ವಾಂಗ್ಡಾ ಯೆಲ್ಲಿ ಫುರಾ ಲೊಕಾ ಜಾಕೊಬಾಚ್ಯಾ ಮರ್ನಾಚ್ಯಾ ಮಾನಾ ಕರ್ತಲಿ ದಿಸಾ ಕರುಕ್ ಮನುನ್ ಇಜಿಪ್ತಾಕ್ ಫಾಟಿ ಪರ್‍ತುನ್ ಗೆಲೆ.

ಜುಜೆನ್ ಅಪ್ಲ್ಯಾ ಭಾವಾಕ್ನಿ ಗೊಸ್ಟ್ ದಿಲ್ಲೆ

15 ಬಾಬಾ ಮರ್ಲ್ಯಾ ಮಾನಾ ಜುಜೆಚ್ಯಾ ಭಾವಾನಿ ತೊ ಅಮ್ಕಾ ಬರೊ ಕರಿನಸಿಲ್ ಅನಿ ಅಮಿ ತೆಕಾ ಕರಲ್ಯಾ ತರಾಸಾಕ್ ಪರ್‍ತುನ್ ತರಾಸ್ ದಿಯ್ಲ್, ಮನುನ್ ಅಪ್ಲ್ಯಾ ಯೆವ್ಡ್ಯಾತುಚ್ ಬೊಲುನ್ ಘೆಟ್ಲ್ಯಾನಿ. 16 ತಸೆ ಹೊವ್ನ್ ತೆನಿ ಜುಜೆಕ್; ತುಜೊ ಬಾಬಾ ಮರುಚ್ಯಾ ಪೈಲೆ ಅಮ್ಕಾ ಹುಕುಮ್ ದಿಲ್ಲೆ ಕಾಯ್ ಮಟ್ಲ್ಯಾರ್, 17 ಅಮಿ ತುಜಿ ಭಾವಾ ಹೊವ್ನ್ ತುಕಾ ವಾಯ್ಟ್ ಕರಲ್ಲೆ ಖರೆ ಹಾಯ್, ಖರೆ ಅಮ್ಚಿ ಚುಕ್ ಅನಿ ಅಪ್ರಾದಾ ಮಾಪಿ ಕರ್ ಮನುನ್ ಮಾಗಾ ಮಟಲ್ಯಾನ್ ತಸೆ ಹೊವ್ನ್ ಅಮಿ ತುಜ್ಯಾಕ್ಡೆ ಅಮಿ ಕರಲಿ ಚುಕ್ ಕ್ಷಮಾ ಕರ್ ಮನುನ್ ಮಾಗ್ತಾಂವ್, ಮನುನ್ ಸಾಂಗುನ್ ಧಾಡ್ಲ್ಯಾನಿ, ಜುಜೆನ್ ಹಿ ಬೊಲ್ನಿ ಆಯ್ಕುನ್ ರಡ್ಲ್ಯಾನ್.

18 ಅನಿ ಯೆವ್ಡೆಚ್ ನಸ್ತಾನಾ ಭಾವಾ ಸಗ್ಳಿ ಅಪ್ನಿಚ್ ಯೆವ್ನ್ ಜುಜೆಕ್ ಪಾಯ್ ಪಡ್ಲ್ಯಾನಿ, ಅನಿ "ಅಬಕ್ ಅಮಿ ತುಜಿ ಗುಲಾಮಾ" ಮಟ್ಲ್ಯಾನಿ.

19 ಖರೆ ಜುಜೆನ್ ತೆಂಕಾ ಭಿಂವ್ನಕಾಸಿ ಮಿಯಾ ದೆವಾಚ್ಯಾ ಜಾಗ್ಯಾರ್ ಹಾವ್ ಕಾಯ್? 20 ತುಮಿ ತರ್ ಮಾಕಾ ಲುಕ್ಷಾನ್ ಕರುಚೆ ಮನುನ್ ಬಗ್ಲ್ಯಾಸಿ, ಖರೆ ದೆವಾನ್ ಬರೆಚ್ ಹೊವ್ಚೆ ಮನುನ್ ಬಗ್ಲ್ಯಾನ್, ಅನಿ ಹೆಜ್ಯಾ ವೈನಾ ಲೈ ಲೊಕಾಂಚಿ ಜಿವಾ ಹುರ್ಲಿ, ಅನಿ ಆಜ್ ಪತರ್ ಬಿ ತೆ ಕಾಮ್ ಚಲುನ್ಗೆತ್ ಹಾಯ್, 21 ತಸೆ ಹೊವ್ನ್ ತುಮಿ ಉಲ್ಲೆಬಿ ಭಿಂವ್ತಲೆ ನಕ್ಕೊ, ಮಿಯಾ ತುಮಿ ಅನಿ ತುಮ್ಕಾ ಸಮಂದ್ ಪಡಲೆ ಸಗ್ಳೆಬಿ ಬಾಳಗ್ತಾ, ಮನುನ್ ಸಾಂಗುನ್ ತೆಂಚ್ಯಾ ವಾಂಗ್ಡಾ ದಯಾನ್ ಬೊಲ್ಲ್ಯಾನ್.

ಜುಜೆಚೆ ಮರಾನ್

22 ಜುಜೆ ಅನಿ ತೆಚ್ಯಾ ಬಾಬಾಚ್ಯಾ ಕುಟ್ಮಾಚಿ ಲೊಕಾ ಇಜಿಪ್ತಾತ್ ವಸ್ತಿ ರಾಲ್ಯಾನಿ ಜುಜೆ ಎಕ್ಸೆ ಧಾ ವರಿಸ್ ಝಿತ್ತೊ ರಾಲೊ; 23 ಎಫ್ರಾಯಿಮಾಚಿ ಲೆಕಾ ಅನಿ ನಾತ್ರಾ ಬಗಟ್ಲ್ಯಾನ್, ಮನಸ್ಸೆಚೊ ಲೆಕ್ ಮಾಕಿರಾಕ್ಬಿ ಪೊರಾ ಹೊಲ್ಲ್ಯಾ ತನ್ನಾ ತಿ ಪೊರಾ ಜುಜೆಚ್ಯಾ ಹೊಟ್ಯಾತುಚ್ ಮೊಟಿಹೊಲಿ, 24 ಅನಿ ಜುಜೆನ್ ಅಪ್ಲ್ಯಾ ಭಾವಾಕ್ನಿ ಮಾಜೊ ಮರ್ನಾಚೊ ಎಳ್ ಜಗ್ಗೊಳ್ ಯೆಲಾ, ಖರೆ ದೆವ್ ತುಮ್ಕಾ ರಾಕುಕ್ ಖರೆಚ್ ಯೆತಲೊ ಹಾಯ್, ಅಪ್ನಿ ಅಬ್ರಾಮ್, ಇಸಾಕ್ ಅನಿ ಜಾಕೊಬಾಕ್ ದಿತಾ ಮಟಲ್ಯಾ ದೆಶ್ಯಾಕ್ ತುಮ್ಕಾ ಪಾವಸ್ತಾ, ಮಟ್ಲ್ಯಾನ್. 25 ಅನಿ ಜುಜೆನ್ ತ್ಯಾ ಇಜ್ರಾಯೆಲ್‌ಕಾರಾಕ್ನಿ ದೆವ್ ತುಮ್ಕಾ ರಾಕುಕ್ ಯೆತಲ್ಯಾತ್ ಕಾಯ್ಬಿ ಸಂಸೊವ್ ನಾ, ತನ್ನಾ ತುಮಿ ಮಾಜಿ ಹಡ್ಡಾಬಿ ತುಮ್ಚ್ಯಾ ವಾಂಗ್ಡಾ ನ್ಹೆವ್ಚೆ ತಸೆಚ್ ನ್ಹೆತಾಂವ್ ಮನುನ್ ತೆಂಚ್ಯಾಕ್ನಾ ಗೊಸ್ಟ್ ಘೆಟ್ಲ್ಯಾನ್. 26 ಜುಜೆನ್ ಇಜಿಪ್ತಾತ್ ಅಪ್ಲ್ಯಾ ಎಕ್ಸೆ ಧಾವೆಚ್ಯಾ ವರ್ಸಾತ್ ಪ್ರಾನ್ ಸೊಡ್ಲ್ಯಾನ್, ತೆಚ್ಯಾ ಮ್ಹಡ್ಯಾಕ್ ಬರ್‍ಯಾ ವಾಸೆಚ್ಯಾ ತೆಲಾನಿ ನ್ಹಾವ್ಸುನ್ ಎಕ್ ಪೆಟಿತ್ ಘಾಲುನ್ ಥವ್ಲ್ಯಾನಿ.