Isaías 8

Isaiah nynh Ccapaw A Saah

1 Te Bawipaw nynh kae kha, Ccaw zeinawpaw lungphe alepaw phe kheit kha lawkuh lah, a vawlan khe ccungccaw miakaw nynh thaethya lante, "Arangte luade, palou lah," cite asuilan a umpaw "Maher-shalal-hash-baz," kha zeitua, 2 ka hanlan alungzipaw ccaekia lu ning, ranpibawi Uriah te Jeberekhiah ccapaw Zekhariah kha ko hae, yn cipya. 3 Te ka zu kalan ka naeku keiccuze aning tuh ccaawpoi zah ccapaw a saah. Tetuh Bawipaw nynh imua kha Maher-shalal-hash-baz cite min na phu cih, yn cipya; 4 pawccecize imua nynh "Anung, Apang" cite a kothya mawkhe Damaskas kya-e sisua te Samaria khua e luadepaw uccaw kha Assiria siapharan nynh ccaring a cciakhae cih.

5 Bawipaw nynh bua yn hopah zah: 6 E ccungccaw hae nynh daebabi lan a luapaw Shiloah vawkhu e tui kha ry leite, Rezin te Ramaliah ccapaw malang khe rawrite a thyngku hae keiccuze, 7 Bawipaw nynh a thawsaepaw Zufrates Vaw tui alepaw kha mih tungvaw a luasah thin cih, tuh-e tuh Assiria siapharan te a phu-enaw balyn kha nynh thua; tuh-e Vawpi kya-e tuizy te vawkhurae balyn tuh tui aleikuh cih, 8 Judah ram lungkhu langkhe tui alepaw hawte a luathin cih zah, a nging kyacia a vu cih; a dawpaw a sake nynh na ram balyn kha pong a bong cih, pou Immanuel, yn cipya.

9 Ccungccaw hae nanning, thinphangte

um oh lah, pynkheihlan sueluakuh tua oh;

laansawpi um hae paw

nanning balyn, ka bya ngaetua oh,

rhawtuk lan paccynkuh oh lah,

thinphangte um oh;

rhawtuk lan paccynkuh oh lah,

thinphangte um oh!

10 Tuanaw pyakuh kalang oh,

thuasalama tuh-e tuh

accakaepaw lang a tang cih;

khuakhankuh oh,

thuasalama tyn lan khyh,

pawccecize Pachia tuh

kaening kya a um.

11 E ccungccaw hae laanpi kha ka zui khyh nawlan, Bawipaw nynh athungpaw a huhan khate raeringnaw yn pya zah yn hopyapaw tuh: 12 E ccungccaw hae nynh aruh lante khuakhan hae paw miakaw kya umbua nan lah, a ri hae paw kha rihbua nan, siikuh nan.✝8.12-13: 1Pe 3.14-15 13 Thuasalama vaaw Bawipaw amaw rou kha athyaapaw lante na tua cih; amaw raw kha rih lah, siiku tua. 14 Aning tuh hminthyaa athua cih, thuasalama aning tuh Judah te Israel innbyn hae nynh a thykunaw hae paw lung te a khuliakunaw hae paw lungpi lang a tang cih zah, Jerusalem ccungccaw hae hanlan kaang te taphung lang a tang cih.✝8.14-15: 1Pe 2.8 15 Minmin laku e patae tuh a thy a pawkuh cih hae; a khuliakuh cih hae zah a khya cih hae; kaang a kae cih hae zah kyng athua cih hae.

Isaiah Zuitu hae

16 Ka zuitu hae kyakhe hynh-e ccaekiakhannaw hynh khiide lah, e ccangpyanaw hynhte tazeih khiatua. 17 Jakob ciihan kyate a mae a rekuhpaw Bawipaw kha ka doliakuh cih zah, ka ngaehoinaw kha amaw kya ka nung cih.✝8.17: Heb 2.13 18 Dotua, kamaw te Bawipaw nynh yn pyapaw imua hae tuh Zion Mua a umpaw vaaw Bawipaw kyate Israel hae hanlan muisahnaw te syntawnaw lang oun sawpaw nynh kae thua.✝8.18: Heb 2.13 19 Ccungccaw hae nynh, "Kuihdothya hae paw te tarutaru ccohkute chihiinleihthya hae paw kha tuanaw ngiakuh oh; ccungccaw hae nynh mih pachia hae kha thuasah, a hiin hae paw ccelang a chih hae paw kha thuasah ccangpyakunaw te thuiheikunaw kha tuanaw ngiaku lan ccan khyh tou?" cite ae hopah cih oh. 20 Thanccingte, tuhcite a ho hae paw tuh khuadaenaw hoi lan khyh hae! 21 Minmin tuh ram lungkhu khe vuelaw riathae te a khiakuh cih hae; mih vuelaw vae ze mih thinria cih zah, mih siapharan te mih pachia hae kha thya a law cih hae. Mih mae kha a angthung cih hae, 22 tuhkhyhze laekhu lang a dobung cih hae, thuasalama riathaenaw te mohnaw, thinphang ngaethyanaw kyalya kha a muih cih hae; marae zipingpaw mohnaw lungkhu langkhe nohde athua cih hae.