Ezequiel 23

दूई वेश्या बेइनां

1 फिरी यहोवाए मीं सेइं ज़ोवं, 2 "ओ नाश भोने बाला मैन्हु, दूई कौन्शां*23:2 कौन्शां मतलब सारो इस्राएल थी, ज़ैना सेक्‍की बेइनां थी। 3 तैना अपने बचपने करां लेइतां वेश्यारू कम मिस्र मुल्खे मां केरने लेग्गी; छोट्टी उमरी मां तैन केरि छैती ट्लेइ जेई। 4 तैन कुइयन मरां बेड्डी कुइयरू नवं ओहोला, ते तैसारी निकड़ी बेइनरू नवं ओहोलीबा थियूं। तैना दूईये मेरी भोइ जेई, ते तैन केरां मट्ठां कुइयां भोआं। तैन केरे नंव्वन मरां ओहोला त सामरिया ते ओहोलीबा यरूशलेमे।

बड्डी बेइन, सामरिया

5 "ओहोला ज़ैखन मेरी थी, तैखन भी तै व्यभिचार केरनेबाली भोइतां अपने दोस्तन पुड़ आशक़ भोने लगी ज़ैना तैसारे पड़ोसी अश्शूरी थिये। 6 तैना त सारे नीलां लिगड़ां लाने बाले खूबसूरत जुवान, अधिकारी ते प्रधान थिये, ते घोड़न पुड़ सुवार थिये। 7 एल्हेरेलेइ ओहोला तैन्ने सेइं व्यभिचार कियो, तैना सब अश्शूरी अधिकारी थिये ते ज़ैन पुड़ तै आशक़ भोइ, तैसेरे मूरतन सेइं तै अशुद्ध भोइ। 8 ज़ै व्यभिचार तैसां मिस्र मुल्खे मां शिखोरो थियो, तै भी तैसां न शारो, किजोकि जुवैनी मां मैन्हेइं तैस सेइं कुकर्म कियो, ते तैसारी छैती ट्लेइ, ते तने-मने सेइं तैस सेइं व्यभिचार कियोरो थियो। 9 एल्हेरेलेइ मीं तै तैन्ने अश्शूरी दोस्तां केरे हवाले की ज़ैन पुड़ तै आशक़ भोवरी थी। 10 अश्शूरी लोकेईं तै नग्गी की, तैनेईं तैसारां मट्ठां कुइयां थुसोड़तां तै तलवारी सेइं कत्ल केरतां छ़डी; एस तरीके तै तैन केरे हथ्थे सज़ाह भुगतां कौन्शन मां बड़ी मुशूर भोइ जेई।

निकड़ी बेइन, यरूशलेम

11 "तैसारी निकड़ी बेइनां ओहोलीबा एन सब किछ हेरतां भी तै आशक़ भोइतां व्यभिचार केरने मां एपनी बेइनी करां भी जादे बेधी जेई। 12 तै अपने अश्शूरी पुड़ोसन पुड़ आशक़ भोती थी, ज़ैना सारे खूब रोड़ां लिगड़ां लाने बाले ते घोड़ां केरे सुवार मन पसंद, नौजुवान अधिकारी ते हर किसमेरे प्रधान थिये। 13 तैखन मीं हेरू कि तै भी अशुद्ध भोइ जेई; तैन दूईये बेइनां केरि अक्‍के चाल थी। 14 पन ओहोलीबा बड़ी जादे व्यभिचार केरती जेई; ते ज़ैखन तैसां दिवारी पुड़ तसवीरां लेही, ज़ैना लाल रंगे सेइं बनेवरी कसदी मड़दां केरि थी, 15 ज़ैनेईं लख्खे मां कमर बन्द ते दोग्गे पुड़ रंगदार पेगड़ी लेवरी थी, तैना सारे कसदी ज़र्म ठार मतलब बाबेलेरे लोकां केरे रीती पुड़ प्रधाना केरे रूपे पुड़ थिये, 16 तैखन तैसां ज़ेरे तैना लाहे तै तैन पुड़ आशक़ भोइ ते तैन कां कसदी केरे मुल्खे मां दूत भेज़े। 17 एल्हेरेलेइ बाबेलेरे मड़द तैस सेइं साथी झ़ुल्‍ले, ते तैस सेइं व्यभिचार केरतां तै अशुद्ध की; ते ज़ैखन तै तैन सेइं अशुद्ध भोइ जेई, तैखन तैसारो मन तैन करां फिरी जेव। 18 फिरी भी तै बेपरद भोती जेई ते व्यभिचार केरती जेई, तैखन मेरो मन तैस करां फिरी जेवरो थियो, तेन्च़रे तैसारी बेइनी करां भी फिरी जेव। 19 फिरी भी ओहोलीबा मिस्र मुल्खे मां अपने बचपनेरे दिहाड़े याद केरतां ज़ैखन तै वेश्यारू कम केरती थी, ते बड़ो व्यभिचार केरती राई; 20 ते एरे दोस्तन पुड़ आशक़ भोइ, ज़ैन केरो अंग गधां केरो ज़ेरो थियो, ते तैन केरो वीर्य घोड़ां केरो ज़ेरो थियो। 21 तू अपने बचपनेरे तैस महापापे याद केरतिस ज़ैखन मिस्री लोक तेरी छैती दबाते थिये।"

यरूशलेमे पुड़ न्याय

22 एल्हेरेलेइ हे ओहोलीबा, परमेशर यहोवा तीं सेइं एन ज़ोते: "हेर, अवं तेरे दोस्तन उभैरतां ज़ैन करां तेरो मन फिरी जेवरोए च़ेवरे पासना तेरे खलाफ आनेलो। 23 मतलब बाबेलेरे ते सब कसदी लोकन, ते पकोद, शोया ते कोआरे लोकन; ते तैन सेइं साथी सब अश्शूरी लोकन ज़ैना सारे घोड़ां केरे सुवार ते खूबसूरत जुवान अधिकारी, ते कही किसमां केरे मुशूर, प्रधान ते नामी मड़द आन। 24 तैना लोक हथियार, रथ, छकड़े ते मुल्खे-मुल्खेरे लोकां केरि सेना एन्हतां तीं पुड़ हमलो केरेले; ते ढाल, फरी ते टोप लेइतां तेरे खलाफ च़ेवरे पासना घेरेले; ते अवं तैन केरे हथ्थे न्याय केरनेरू कम सौंफेलो, ते तैना अपने-अपने नियमेरे मुताबिक तेरो न्याय केरेले। 25 अवं अपनो क्रोध तीं पुड़ भड़कालो, तैस जलजलाहटी सेइं तैना तीं सेइं बर्ताव केरेले। तैना तेरू नक ते कन कट्टेले, ते तेरो ज़ै कोई ज़ींतो रालो तै तलवारी सेइं मारो गालो। तैना तेरां मट्ठां कुइयां थुसोड़तां नेले, ते तेरो ज़ै भी बच़ोरो रालो, तै अग्गी सेइं भस्म भोइ गालो। 26 तैना तेरां लिगड़ां भी खोलेले, ते तेरे कीमती गेहने भी लुटतां नेले। 27 एस तरीके सेइं अवं तेरो महापाप, ते ज़ैन वेश्यारू कम तीं मिस्र मुल्खे मां शिखोरू थियूं, तैस भी तीं करां छुटेइलो, एड़ी तगर कि फिरी तैन केरे पासे न तकेली ते न मिस्र मुल्खे फिरी कधे याद केरेली। 28 किजोकि प्रभु यहोवा तीं सेइं एन ज़ोते: हेर, अवं तीं तैन केरे हथ्थे सौंफेलो ज़ैन सेइं तू बैर रखतिस ते ज़ैन करां तेरो मन फिरी जेवरोए; 29 ते तैना तीं सेइं बैर रेखतां बर्ताव केरेले, ते तेरी सारी कमाई नेले, ते तीं नग्गे केरतां छ़डेले, ते तेरी जान नग्गी केरनेरे वजाई सेइं तेरो व्यभिचार ते महापाप बांदो भोइ गालो। 30 एना कम्मां तीं सेइं एल्हेरेलेइ कियां गालां किजोकि तू गैर कौमन पत्ती व्यभिचार केरनेबाले कौन्शरी ज़ेरि भोइ जेई, ते तैन केरि मूरती केरि पूज़ा केरतां अशुद्ध भोइ जेई। 31 तू एपनी बेइनरी चाली पुड़ च़लोरिस; एल्हेरेलेइ अवं तेरे हथ्थे मां तैसारो ज़ेरो क्रोधेरो कुटोरो देइलो। 32 प्रभु यहोवा एन ज़ोते, एपनी बेइनरे कुटोरे मरां तीं पीनू पेनूए ज़ै डुग्घो ते बिल्‍लोए; तेरी हासी ते मज़ाक बनाव गालो, किजोकि एस कुटोरे मां बड़ू किछ लेग्गी बटते। 33 तू मसत भोल्ही ते दुखे सेइं छेकोली। तू अपनि बेइन सामरियारे कुटोरे, मतलब डर ते बेरान पीतां छकेली। 34 तू तैस मरां निच़ोड़तां पीली, ते तैसेरे केपरी भी च़ापेली ते एपनी छैती ज़खमी केरेली; किजोकि मीएं एन ज़ोवरूए, प्रभु यहोवा एन ज़ोते। 35 तीं अवं ज़ै बिसरोरोइं ते अपनु तुत्तर मीं करां फिरवं, एल्हेरेलेइ तू हुनी अपने महापाप ते व्यभिचारेरो भार छ़ू, परमेशर यहोवा एन ज़ोते।"

दूईये बेइन्न परमेशरेरी सज़ाह

36 यहोवाए मीं सेइं ज़ोवं, "ओ नाश भोने बाला मैन्हु, कुन तू ओहोला ते ओहोलीबारो न्याय केरेलो? त फिरी तू तैन्न तैन केरे भिट्टे कम्मां केरे बारे मां तैन खबरदार केर। 37 किजोकि तैनेईं व्यभिचार कियोरोए, ते तैन केरे हथ्थन खून लगोरोए; तैनेईं एपनी मूरतन सेइं व्यभिचार कियोरोए, ते अपने बच्‍चे ज़ैना मेरे पैदा भोवरे थिये, तैना मूरती केरे सामने भस्म भोनेरे लेई च़ाढ़ोरेन। 38 फिरी तैनेईं मीं सेइं एरहो बर्ताव भी कियो कि तैस्से सेइं साथी मेरी पवित्र ठार भी अशुद्ध केरतां छ़डी ते मेरी थैकरी दिहैड़ी अपवित्र कियोरेन। 39 तैना अपने बच्‍चे तैन मूरती केरे सामने बलि च़ैढ़तां तैस दिहाड़े मेरी पवित्र ठार अपवित्र केरनेरे लेई तैस मां च़ेलि जेई। हेर, तैनेईं एस किसमेरू कम मेरे भवने मां गेइतां कियोरूए। 40 तैनेईं दूरेरां मैन्हु कुजाए, ते तैना च़ले भी आए। तैन केरे लेई तू निहेइतां धोइतां एछ़्छ़न मां कजल ते गेहनो लेइतां; 41 तू एक्‍की शानदार पलंघे पुड़ बिश्शी जेई; ते तेरे सामने अक मेज़ रख्खोरी थी, ज़ैस पुड़ तीं मेरो धूप ते मेरो तेल रखोरो थियो। 42 तैखन तैस सेइं साथी अक बे फिक्र भीड़री शोर शुनोई, ते तैन आम लोकन सेइं जंगले मरां कुजेवरे शराबी लोक भी थिये; ते तैनेईं तैन दूईये बेइनां केरे हथ्थन मां बंगां लुवेई ते दोग्गन पुड़ खूबसूरत ताजां रखां।

43 "तैखन ज़ै व्यभिचार केरते-केरते बुढी भोइ जेवरी थी, तैसारे बारे मां ज़ोने लगो, हुनी त तैना तैस्से सेइं व्यभिचार केरेले। 44 किजोकि तैना तैस कां एन्च़रे जे ज़ेन्च़रे लोक वेश्याई कां गातन। तेन्च़रे तैना ओहोला ते ओहोलीबा नंव्वेरी पापी कौन्शन कां जे। 45 ते धर्मी लोक व्यभिचार केरनेबाले कौन्शां ते खूनी केरे काबल न्याय केरन; किजोकि तैना व्यभिचार केरनेबैली आन, ते तैन केरे हथ्थन मां खून भी लगोरोए।"

46 एल्हेरेलेइ परमेशर यहोवा एन ज़ोते: "अवं अक बड़ी भीड़ तैन पुड़ च़ैढ़तां चढ़ाई करेइलो; तैन अवं एरे केरेलो कि तैना दरबदर फिरेली ते लुट्टी गैली। 47 तैस भीड़रे लोक तैन पुड़ घोड़ेईं बैइतां तैन्न एपनी तलवारी सेइं कटेले, ते फिरी तैन केरे मट्ठन कुइयन कत्ल केरतां घरां भी अग लेइतां भस्म केरतां छ़डेले। 48 एस तरीके अवं महापापे मुल्खे मरां दूर केरेलो, ते सैरी कौन्शां शिक्षा हासिल केरतां तुश्शो ज़ेरो महापाप केरने करां बेच़ोरी रहेली। 49 तुश्शे सारे महा पापेरी सज़ाह तुसन मैल्हेली; ते तुसन ज़रूर एपनी मूरती केरे पापेरी सज़ाह मैल्हेली; ते तैखन तुसन पतो लग्गेलो कि अवं परमेशर यहोवा आईं।"