1 तैखन यहोवाए मीं सेइं ज़ोवं, "ओ नाश भोने बाला मैन्हु, ज़ैन तीं मैल्होरू तैस खा; मतलब इस किताबी खा, तैखन गेइतां इस्राएली लोकन सेइं गल्‍लां केर।"✝ 2 एल्हेरेलेइ मीं आशी खोल्‍लू ते तैनी तै किताब मीं खुवाई। 3 तैखन तैनी मीं सेइं ज़ोवं, "ओ नाश भोने बाला मैन्हु, ई किताब ज़ै अवं तीं देताईं तैस पिच़ा, ते अपनु पेट इस सेइं भर।" ते मीं तै खाई; ते मीं तै मैछ़ेरी ज़ेरि मिट्ठी लग्गी।

4 फिरी तैने मीं सेइं ज़ोवं, "ओ नाश भोने बाला मैन्हु, तू इस्राएली लोकन कां गेइतां तैन्न मेरी गल्‍लां शुना। 5 किजोकि अवं तीं कोन्ची अनोखी बोली या मुश्किल भाषा बैली कौमी कां न भेज़ी, पन तू इस्राएली लोकन कां भेज़ो गातस। 6 अनोखी बोली या मुश्किल भाषा बैली बड़े कौमन कां ज़ैना तेरी गल सेमझ़ी न सकन, तू न भेज़ो गास। इस मां कोई शक नईं अगर अवं तीं एरे लोकन कां भेज़ेथो त तैना तेरी शुनेथे। 7 पन इस्राएली लोक तेरी शुन्ने करां इन्कार केरेले, तैना मेरी भी शुन्ने करां इन्कार केरतन। किजोकि सारे इस्राएली लोक ढीठ ते सखत मनेरोए। 8 हेर, अवं तेरो मन तैन केरे लेई सकत केरताईं। 9 अवं तेरे मने हीरेरू ज़ेरू सखत केरताईं ज़ै चमकते घोड़े करां भी जादे सखत भोते। एल्हेरेलेइ तू तैन करां न डेरां, ते न तैन केरां तुत्तरां हेरतां तेरी हिम्मत ट्लुटे। किजोकि तैना बगावत केरनेबाले घरानेरे आन।" 10 फिरी परमेशरे मीं सेइं इन भी ज़ोवं, "ओ नाश भोने बाला मैन्हु, ज़ेत्रे वचन अवं तीं सेइं ज़ोईं, तैना ध्याने सेइं शुन ते अपने मने मां रख। 11 ते तैन कैदन कां गेइतां, ज़ैना तेरे इस्राएली कौमरे आन, तैन सेइं गल्‍लां केरां ते ज़ोइयां, ‘प्रभु यहोवा इन ज़ोते;’ चाए तैना शुन्न या न शुन्न।"

12 तैखन दर्शने मां परमेशरेरे आत्मा अवं उबरे नेव, ते मीं एप्पु पत्र बड़े गुड़नेरी ज़ेरि उच्‍ची आवाज़ शुनी, "यहोवारे भवने मरां तैसेरी महिमा धने।" 13 ते तैस सेइं साथी तैन जानदारां केरे फंघां केरि आवाज़, ज़ैना एक्‍की होरि सेइं हुरतां थिये, ते तैन सेइं साथी पेइहां केरि आवाज़ ते अक बड़ी गुड़नेरी ज़ेरि आवाज़ शुनी। 14 तैखन परमेशरेरे आत्मा अवं खड़ो केरतां नेव, ते अवं सखत दुखे सेइं भेरतां, ते मने मां ज़लतो जेव; ते यहोवारी शक्ति मीं पुड़ एवरी थी। 15 ते अवं तैन इस्राएली गुलामन कां अव ज़ैना कबार दरियारे बन्ने पुड़ तेलाबीब ड्लाव्वें मां रहते थिये। ते तैड़ी अवं सत दिहाड़न तगर तैन केरे दरमियान परेशान भोइतां बिशोरो राव।

16 सत दिहाड़ना बाद यहोवाए मीं सेइं इन ज़ोवं, 17 "ओ नाश भोने बाला मैन्हु मीं तू इस्राएली लोकां लेई पहरदार* च़ुनोरोस; एल्हेरेलेइ तू मेरी गल शुन्तां, तैन्न मेरे तरफां खबरदारी देइयां।✝ 18 ज़ैखन अवं दुष्टे सेइं ज़ोई, ‘तू ज़रूर मरेलो,’ ते अगर तू तैस खबरदार न केरस, ते न दुष्टे सेइं एरी गल ज़ोस ज़ैस सेइं तै बुरी बत शैरतां ज़ींतो राए, त तै दुष्ट अपने अधर्मे मां फसोरो मेरि गालो, पन तैसेरे मरनेरो लेखो अवं तीं करां नेइलो। 19 पन अगर तू दुष्टे खबरदार केरस, ते तै अपने बुरैई ते बुरे बत्ती करां न फिरे, त तै अपने अधर्मे मां फसोरो मेरि गालो। पन तैसेरे मौतरो ज़िमेवार तू न भोल्हो। 20 एन्च़रे सेइं ज़ैखन धर्मी मैन्हु अपने धार्मिकताई करां फिरतां बुरू कम केरने लगे, ते अवं तैसेरे सामने ठोकर रेखी त तै मेरि गालो, किजोकि तीं तै खबरदार न कियो, एल्हेरेलेइ तै अपने पापे मां फसोरो मेरि गालो। ते ज़ैना धार्मिकतारां कम्मां तैनी कियोरां भोन, तैन केरि खबर न नी गाली, पन तैसेरो मौतरो लेखो अवं तीं करां नेइलो। 21 पन अगर तू धेर्मी एरू ज़ोइतां खबरदारी देस, कि तै पाप न केरे, ते तै पाप केरने करां बेच़ी गाए, त तै खबरदारी कबूल केरनेरे वजाई सेइं ज़रूर ज़ींतो रालो, ते तू भी अपने प्राण बच़ालो।"

22 फिरी मीं तैड़ी यहोवारी हज़ूरी मैसूस की, ते तैने मीं सेइं ज़ोवं, "उठतां मैइदाने मां गा; ते तैड़ी अवं तीं सेइं गल्‍लां केरेलो।" 23 तैखन अवं मैइदाने मां जेव, ते तैड़ी कुन हेरू, कि यहोवारो प्रताप ज़ेरो मीं कबार दरियारे बन्ने पुड़ लेवरो थियो, तेरहो इड़ी भी लेइहोते; ते अवं तुत्तरेरे भारे झुको। 24 तैखन परमेशरेरो आत्मा मीं मां एइतां अवं खड़ो कियो। फिरी तै मीं सेइं ज़ोने लगो, "अपने घरे गा ते दार बन्द केरतां अन्तर बिशोरो रा। 25 ओ नाश भोने बाला मैन्हु, तैना लोक तीं रेस्सन सेइं बेन्धतां रखेले, हेर, तू निस्तां तैन केरे दरमियान गेइ न बटेलो। 26 अवं तेरी ज़िभ तेरे तैलू सेइं खितैनेलो; ज़ैस सेइं तू च़ुप रेइतां तैन केरो डांटने बालो न भोस, किजोकि तैना बगावत केरनेबाले लोक आन। 27 पन ज़ैखन-ज़ैखन अवं तीं सेइं गल्‍लां केरि, तैखन-तैखन तेरू आशी खोलेलो, ते तू तैन सेइं एरू ज़ोइयां, ‘प्रभु यहोवा इन ज़ोते,’ ज़ै शुन्नेरे लेई तियारे तै शुने ते ज़ै तियार नईं तै न शुने, तैना त बगावत केरनेबाले लोक आन।"