1 फिरी यहोवाए मीं सेइं ज़ोवं: 2 "ओ नाश भोने बाला मैन्हु, इस्राएलेरे पुहालां* केरे खलाफ नबूवत केरतां तैन सेइं ज़ो, परमेशर यहोवा एन ज़ोते; अफ़सोस इस्राएलेरे तैन पुहालन पुड़ ज़ैना सिर्फ अपनु-अपनु पेट भरतन! कुन पुहालेईं गब्बां केरू पेट न थियूं लोड़तू भरेरू? 3 तुसां लोक चर्भी खातथ, ते उनालां लिगड़ां लातथ ते निगर-निगर जानबर मारथ, पन गब्बन तुस न च़ारथ।✝ 4 तुसेईं कमज़ोरां केरि देखभाल न की, ते न बिमार बज़्झ़ाए ते न ज़खमी केरे ज़खमन पुड़ पट्टी बन्धी; ते न टेपलोरी ते हेरोरि भैड्डां तोप्पी, पन तुसेईं ज़ोरे सेइं ते ज़बरदस्ती अधिकार च़लेवरोए। 5 तैना गब्बां पुहाल केरे न भोनेरे वजाई सेइं तितर-बितर भोआं; ते सब जंगली जानबरां केरो शिकार भोइ जेआं। 6 मेरी भैड्डां छ़ेल्‍ली तितर-बितर भोवरिन; तैना सैरी पहाड़ां केरे उच्‍चे-उच्‍चे टिब्बन पुड़ टेपलोरी थी; मेरी सैरी भैड्डां-छ़ेल्‍ली धेरती पुड़ तितर-बितर भोवरिन, ते न कोई तैन केरो पतो केरतो थियो, ते न कोई तोपतो थियो।

7 "एल्हेरेलेइ, हे पुहालव, यहोवारू वचन शुना: 8 परमेशर यहोवा एन ज़ोते, मीं अपनि कसम, मेरी भैड्डां-छ़ेल्‍ली ज़ैना मैरी जेई, ते मेरी भैड्डां-छ़ेल्‍ली ज़ैना पुहालां केरे न भोनेरी वजाई सेइं जंगली जानबरां केरो शिकार भोइ जेई; एल्हेरेलेइ कि मेरे पुहालेईं मेरी भैड्डां-छ़ेल्‍ली केरो खियाल न रख्खो, ते मेरी भैड्डां-छ़ेल्‍ली केरू पेट न भरू पन अपनु पेट भरू; 9 एल्हेरेलेइ हे पुहालव, यहोवारू वचन शुना, 10 परमेशर यहोवा एन ज़ोते: हेरा, अवं पुहालां केरे खलाफ आईं; ते अवं तैन करां एपनी भैड्डां-छ़ेल्‍ली केरो हिसाब घिन्नेलो, ते अवं फिरी तैन च़ारने न देइलो; तैना फिरी अपनु-अपनु पेट न भेरि बटेले। ते अवं एपनी भैड्डां-छ़ेल्‍ली तैन केरे एशी मरां छुटेइलो, कि तैना अग्रोवं जो तैन केरि खूराक न भोन।

11 "परमेशर यहोवा एन ज़ोते, हेरा, अवं एप्पु एपनी भैड्डां-छ़ेल्‍ली केरो पतो केरेलो ते तैन तोप्पेलो।✝ 12 ज़ेन्च़रे पुहाल एपनी भैड्डां-छ़ेल्‍ली हेरोरि अपने केन्नी मां अकोट्ठी केरते, तेन्च़रे अवं भी एपनी भैड्डां-छ़ेल्‍ली अकोट्ठी केरेलो; अवं तैन सेभी ठारन पुड़ेरां केढतां आनेलो, ज़ैड़ी-ज़ैड़ी तैना बिदलारारे ते बड़े निहारेरे दिहाड़े तितर-बितर भोवरी थी। 13 अवं तैन मुल्खे-मुल्खेरे लोकन मरां केढतां अकोट्ठी केरेलो, ते तैन्ना केरे अपने मुल्खे मां आनेलो; ते इस्राएलेरे पहाड़न पुड़ ते नालन मां ते तैस मुल्खेरे सेभी ठारन मां च़ारेलो। 14 अवं तैन्न रोड़े घासे मां च़ारेलो, ते इस्राएलेरे उच्‍चे-उच्‍चे पहाड़न पुड़ तैन च़रने जो घास मैल्हेलो; तैड़ी तैना रोड़े नीले घासे मां बिशैली, ते इस्राएलेरे पहाड़न पुड़ रोड़े करां रोड़ी ठारी पुड़ च़रेली। 15 अवं एप्पु एपनी भैड्डां-छ़ेल्‍ली केरो पुहाल भोल्हो, ते तैन अवं एप्पु बिशालेलो, परमेशर यहोवा एन ज़ोते।✝ 16 अवं हेरोरि भैड्डां-छ़ेल्‍ली तोपेलो, ते टेपलोरी तोपतां आनेलो, ते ज़ै ज़खमी भोल्ही तैस पट्टी बन्धेलो, ते ज़ैना लिस्सी भोल्ही तैन्न निगर बनेइलो, ते ज़ैना निग्गर ते ताकतबरन तैन नाश केरेलो; अवं तैन केरि पुहाली न्याय सेइं केरेलो।

17 "हे मेरी कन्नी, परमेशर यहोवा तुसन सेइं एन ज़ोते, हेरा, अवं भैड्डी-भैड्डी मां ते हुड़ ते थाव्वन मां न्याय केरताईं।✝ 18 कुन तुस ऐह निकड़ी गल समझ़तथ कि रोड़े घासे मां च़ारथ ते बाकी घास पव्वन हैठ ढ्लेंच़तां छ़डथ; ते कुन तुस ई निकड़ी गल समझ़तथ कि तुसां साफ पानी पीथ ते बाकी पानी खोदलेइतां छ़डथ? 19 कुन मेरी भैड्डां-छ़ेल्‍ली तुश्शे पव्वन सेइं ढ्लेन्च़ोरे घासे च़रन, ते कुन तैना तैन पानी पीन ज़ैन तुसेईं खोदलेइतां छ़डोरूए?

20 "एल्हेरेलेइ परमेशर यहोवा तैन सेइं एन ज़ोते, हेरा, अवं एप्पु निगर ते लिस्सी भैड्डां-छ़ेल्‍ली केरो न्याय केरेलो। 21 किजोकि निग्गर भैड्डां लिस्सी भैड्डन ढ्लैखी सेइं ढ्लैक देइतां ते शिंगेईं सेइं इड़ी तगर मारतथ कि तैना तितर-बितर भोइ गैतिन। 22 एल्हेरेलेइ अवं एपनी भैड्डां-छ़ेल्‍ली छुटेइलो, ते तैना फिरी शिकार न भोल्ही, ते अवं भैड्डी-भैड्डी मां ते छ़ेल्‍ली-छ़ेल्‍ली मां न्याय केरेलो। 23 अवं तैन पुड़ अक एरहो पुहाल रेखेलो ज़ै तैन केरि रोड़ेच़ारे पुहाली केरेलो, तै मेरे दास दाऊदेरो ज़ेरो भोल्हो, तैए तैन च़ारेलो, ते तैए तैन केरो पुहाल भोल्हो।✝ 24 अवं, यहोवा तैन केरो परमेशर भोल्हो, ते तै मेरो दास तैन केरो प्रधान भोल्हो; मीं यहोवा एन ज़ोवरूए।

25 "अवं तैन सेइं शैन्तरो करार केरेलो, ते मुल्खे मरां सारे जंगली जानबर केढतां छ़डेलो ताके मेरी भैड्डां जंगले मां निडर भोइतां रेई सखन, ते बने मां झ़ुलेली। 26 अवं तैन्न अपने पहाड़ेरे आसे-पासेरे ठारन बरकतरी वजा बनेइलो; ते झ़ड़ी ठीक वक्ते पुड़ बखेइलो; ते तै बरकतरी झ़ेड़ी भोल्ही। 27 मैइदानेरे बुट फलेले ते ज़मीन अपनि फसल उगाली, ते तैना अपने मुल्खे मां निडर भोइतां राले; ज़ैखन अवं तैन केरू जुऊं ट्लोड़तां तैन लोकां केरे हथ्थेरां छुटेइलो, ज़ैना तैन करां सेवा करातन, तैखन तैन पतो लग्गेलो कि अवं यहोवा परमेशर आईं। 28 तैना फिरी कौमी-कौमी करां शिकार न बनेले, ते न जंगली जानबर तैन खेइ बटेले; तैना निडर राले, ते तैन कोई न डरालो। 29 अवं तैन केरे लेई फलदार ऊडारां उगेइलो, ते तैना मुल्खे मां फिरी ढ्लुखोरे न मरेले, ते न कौमां-कौमां केरे लोक फिरी तैन केरि निन्दा केरेले। 30 तैखन तैन पतो लग्गेलो कि अवं परमेशर यहोवा तैन सेइं साथी आईं, ते तैना ज़ैना इस्राएली लोकन, तैना मेरे लोक भोल्हे, अवं परमेशर यहोवा एन ज़ोताईं। 31 तुसां त मेरे घासे मां च़रने बैली भैड्डां-छ़ेल्‍ली भोल्ही, तुसां त मेरे लोकथ, ते अवं तुश्शो परमेशर यहोवा आईं, परमेशर यहोवा एन ज़ोते।"