1 एक्सां यहोवारी शक्ति मीं पुड़ अई, ते तैनी अपनि आत्मा मीं मां छ़ेडतां अवं बेइर आनो ते अवं वैदी मां खड़ो कियो; तै वादी हेड्डन सेइं भेरतां थी। 2 तैखन तैनी अवं वैदी मां च़ेवरे पासन घुमाव, ते हेड्डी ज़मीनी पुड़ पेवरी थी ते तैना बेड़ी शुकोरी थी। 3 तैखन यहोवाए मीं पुछ़ू, "ओ नाश भोने बाला मैन्हु, कुन एना हेड्डी ज़ींती भोइ सेखतिन? मीं जुवाब दित्तो, हे परमेशर यहोवा, तूए ज़ानतस।" 4 तैखन तैनी मीं सेइं ज़ोवं, "एन हेड्डन सेइं नबूवत केरतां ज़ो, ‘हे शुकोरी हेड्डव, यहोवारू वचन शुना। 5 परमेशर यहोवा तुसन हेड्डन सेइं एन ज़ोते: हेरा, अवं तुसन मां अपनो शाह छ़डेलो, ते तुसां ज़ींती भोल्ही। 6 अवं तुसन पुड़ सीरां च़ैढ़तां मास च़ाढ़ेलो, ते तुसन अवं चेमड़ी सेइं ढकेलो, ते तुसन मां अवं सांस छ़डेलो, ते तुसां ज़ींती भोल्ही; ते तुसन पतो लग्गेलो कि अवं यहोवा आईं।’"

7 यहोवारे इस हुक्मेरे मुताबिक अवं नबूवत केरने लगो; ते अवं हेजू नबूवत केरतो थियो त अक आवाज़ शुनोने लगी, ते भुंज़ल अव, ते तैना हेड्डी अकोट्ठी भोइतां एक्‍की होरि सेइं ज़ुड़ी जेई। 8 मेरे हेरते-हेरते तैन मां सीरां पैदा भोइ ते मास भी च़ढ़ू, ते तैना बांमेइं चेमड़ी सेइं भी ढेकोई जेई; पन तैन मां सांस न थी। 9 तैखन यहोवाए मीं सेइं ज़ोवं, "ओ नाश भोने बाला मैन्हु, सांसी सेइं नबूवत केरतां ज़ो, हे सांस, परमेशर यहोवा एन ज़ोते कि च़ेवरे पासना एइतां इन मर्रोरेन मां समेई गा, कि एना ज़ींते भोन।" 10 यहोवारे हुक्मेरे मुताबिक मीं नबूवत की, तैखन सांस तैन मां एज्जी जेई, तैखन तैना ज़ींते भोइतां अपने-अपने पव्वन पुड़ खड़े भोइ जे; ते अक बड़ी सेना भोइ जेई।

11 फिरी यहोवाए मीं सेइं ज़ोवं, "ओ नाश भोने बाला मैन्हु, एना हेड्डी सारे इस्राएली लोकां केरि मसाल आन, तैना ज़ोतन, इश्शी हेड्डी शुक्‍की जेई, ते इश्शी उमीद खतम भोइ जेई, ते असां पूरे तरीके सेइं मिटी जेवरेम। 12 एल्हेरेलेइ नबूवत केरतां तैन सेइं ज़ो, परमेशर यहोवा एन ज़ोते: हे मेरे लोकव, अवं तुश्शी कब्रां खोलतां तुसन तैन मरां बेइर कढेलो, ते इस्राएलेरे मुल्खे मां पुज़ेइतां छ़डेलो।✝37:12 यशा. 26:19. 13 एल्हेरेलेइ ज़ैखन अवं तुश्शी कब्रां खोलेलो ते तुसन तैन मरां बेइर कढेलो, तैखन हे मेरे लोकव, तुसन पतो लग्गेलो कि अवं यहोवा आईं। 14 अवं तुसन मां अपनि आत्मा छ़डेलो, ते तुसां ज़ींते भोल्हे, ते तुसन तुश्शे अपने मुल्खे मां बसालो; तैखन तुसन पतो लग्गेलो कि एन यहोवा ज़ोवरूए, ते कियोरू भी आहे, यहोवा एन ज़ोते।"

15 फिरी यहोवाए मीं सेइं ज़ोवं: 16 "ओ नाश भोने बाला मैन्हु, अक लकड़ी एन्हतां तैस पुड़ लिख, ‘यहूदारी ते तैसेरे साथी इस्राएली लोकां केरीए;’ फिरी होरि लकड़ी नेइतां तैस पुड़ लिख, ‘यूसुफेरी मतलब एप्रैमेरी, ते तैसेरे साथी इस्राएली केरि लकड़ी।’ 17 फिरी तैना लेकड़ी एक्‍की होरि सेइं ज़ोड़तां अक केर कि तैना लेकड़ी तेरे हथ्थे मां अक्‍के भोइ गान। 18 ज़ैखन तेरे लोक तीं पुछ़ेले, ‘कि तू असन सेइं न ज़ोलो कि एन सेइं तेरो कुन मतलबे?’ 19 तैखन तैन सेइं ज़ोइयां, परमेशर यहोवा एन ज़ोते: हेरा, अवं यूसुफेरी लेकड़ी ज़ै एप्रैमेरे हथ्थे मांए, ते इस्राएलेरे ज़ैना गोट्ल तैस सेइं साथी आन, तैन सेभन यहूदारी लेकड़ी सेइं ज़ोड़तां अक्‍के लकड़ी बनेइलो; ते दूईये मेरे हथ्थे मां अक्‍के लकड़ी बनेली। 20 ज़ैन लेकड़न पुड़ तू एरू लिखेलो, तैना तैन केरे सामने तेरे हथ्थे मां रान। 21 तैखन तू तैन लोकन सेइं ज़ो, परमेशर यहोवा एन ज़ोते, हेरा, अवं इस्राएली लोकन तैन कौमन मरां केढतां ज़ैन मां तैना च़ले जेवरेन, च़ेवरे पासना अकोट्ठे केरेलो; ते तैन्न तैन केरे अपने मुल्खे मां वापस पुज़ेइलो। 22 अवं तैन्न तैन केरे मुल्ख इस्राएलेरे पहाड़न पुड़ अक्‍के कौम बनेइलो; ते तैन सेभी केरो अक्‍के राज़ो भोल्हो; ते तैना फिरी दूई न राले ते न दूई रियासतन मां बेंटोले। 23 तैना फिरी एपनी मूरती केरे ते भिट्टे कम्मां ते अपने कोन्ची पापेरे वजाई सेइं अपनो आप अशुद्ध न केरेले; पन अवं तैन सेभी बेसती मरां ज़ैन मां तैना पाप केरते थिये, केढतां शुद्ध केरेलो, ते तैना मेरे लोक भोल्हे, ते अवं तैन केरो परमेशर भोल्हो।

24 "मेरे दास दाऊदेरो ज़ेरो तैन केरो राज़ो भोल्हो; ते तैन सेभी केरो अक्‍के पुहाल भोल्हो। ते तैना मेरे हुक्मे पुड़ च़लेले ते मेरे विधन मेनतां तैन केरे मुताबिक च़लेले। 25 तैना तैस मुल्खे मां राले ज़ै मीं अपने दास याकूबे दित्तोरो थियो; ते ज़ैस मां तुश्शे दादे-पड़दादे रहते थिये, तैस्से मां तैन केरां मट्ठां पोट्लड़ां हमेशारे लेई राहेलां, ते मेरो दास दाऊदेरो ज़ेरो राज़ो हमेशा तैन केरो प्रधान रालो। 26 अवं तैन सेइं शैन्तरो करार केरेलो; तै हमेशारो करार भोल्हो; ते तैन अवं ठार देइतां तैन केरि आबादी बधेइलो, ते तैन मां अपनि पवित्र ठार हमेशा बनेइतां रखेलो।✝37:26 भज. 89:3-4. 27 अवं अपनो तेम्बु तैन पुड़ बनेइतां रखेलो; ते अवं तैन केरो परमेशर भोल्हो ते तैना मेरे लोक भोल्हे।✝37:27 प्रका. 21:3. 28 ज़ैखन मेरी पवित्र ठार तैन मां हमेशारे लेई राहेली, तैखन सैरी कौमन पतो लग्गेलो कि अवं यहोवा इस्राएलेरो पवित्र केरनेबालो आईं।"