1 अय्यूबे होरि भी अपनि डुग्घी गल्‍लां केरतां ज़ोवं,

2 "भलू भोथू, कि मेरी हालत बीतोरे महीनां केरि ज़ेरी भोथी,

ज़ैन दिहाड़न मां परमेशर मेरी हिफाज़त केरतो थियो,

3 ज़ैखन तैसेरे दीयेरी लौ मेरे दोग्गे पुड़ रहती थी,

ते तैस सेइं लौ मैलतां अवं आंधरे मांमेइं भोइतां च़लतो थियो।

4 तैना त मेरी जुवैनरे दिहाड़े*29:4 जुवैनरे दिहाड़े फलतो फुलतो थिये,

ज़ैखन परमेशरेरी दोस्ती मेरे डेरे पुड़ बांदी भोती थी।

5 तैस वक्ते तगर त सर्वशक्तिमान परमेशर मीं साथी रहतो थियो,

ते मेरे बच्‍चे मेरे च़ेवरे पासन रहते थिये।

6 तैखन अवं अपने पव मलैई सेइं धोथो थियो

ते मेरे चट्टानां मेरे लेई तेलेरी धारां बेगती थी।

7 ज़ैखन-ज़ैखन अवं नगरेरे फाटकेरे पासे च़ेलतां खुल्‍ले ठारी*29:7 खुल्‍ले ठारी ई ठार नगरेरे दिवारारे अन्तर, नगरेरे फाटकेरे नेड़े, ज़ैड़ी नगरेरे प्रशासनेरी एप्पु मांमेइं गलबात भोती थी। मां

अपने बिशनेरी ठार तियार केरतो थियो,

8 तैखन-तैखन जुवान मीं हेरतां छ़ेप्पी गाते,

ते सियाने उठतां खड़े भोइ गाते थिये।

9 हाकिम लोक भी ज़ोने करां रुकी गाते,

ते हथ्थे सेइं आशी बन्द केरतां रखते थिये।

10 प्रधान लोक च़ुप रहते थिये

ते तैन केरि ज़िभ तैलू सेइं लेग्गी गाती थी।

11 किजोकि ज़ैखन कोई मेरी खबर शुनते, तैखन तै मीं धन ज़ोतो थियो,

ते ज़ैखन कोई मीं लातो थियो, तैखन मेरे बारे मां गवाही देतो थियो;

12 किजोकि अवं मद्दतरे लेई फरियाद केरनेबाले गरीब मैन्हु,

ते अनाथ बच्‍चे छुटातो थियो ज़ेसेरो मद्दत केरनेबालो कोई न थियो।

13 ज़ै नाश भोने पुड़ थियो मीं आशिर्वाद देतो थियो,

ते मेरे वजाई सेइं विधवा आनन्दे सेइं गीतां ज़ोती थी।

14 मीं धार्मिकतारो पहनावो लेइतां रख्खो, ते तैने अवं ढेकतां रख्खो;

मेरू न्यायेरू कम मेरे लेई चोगे ते खूबसूरत पेगड़रू कम देंतू थियूं।

15 अवं कांना केरे लेई एछ़्छ़ी,

ते टोन्टे लोकां केरे लेई पव ठहरतो थियो।

16 गरीब लोकां केरो अवं बाजी ठहरतो थियो,

ते ज़ै मेरी पिशानरो न थियो तैसेरे मुकदमेरो हाल अवं पुछ़ ताछ केरतां पतो नेतो थियो।

17 अवं बुरे मैन्हु केरे दंत ट्लोड़तो,

ते तैन केरो शिकार तैन केरे ऐशी मरां थुसोड़तां बच़ातो थियो।

18 तैखन अवं सोचतो थियो, मेरे दिहाड़े रेतरे सिक्‍कां केरे ज़ेरे बेशुमार भोल्हे,

ते अपने घरे मां मेरे प्राण निसेले।

19 मेरू ज़ील पैनेरे पासे फैलू,

ते मेरी डैलड़ी पुड़ ट्लेल सैरी राती पेवरी राली,

20 मेरी इज़्ज़त ज़ेरि थी तेरही बनोरी राली,

ते मेरू धनुष मेरे हथ्थे मां हमेशा नंव्वू भोतू गालू।

21 लोक मेरे पासे कन लेइतां रुकोरे रहते थिये

ते मेरी सलाह शुन्तां च़ुप रहते थिये।

22 ज़ैखन मीं ज़ोइतां झ़ाड़ोरू थियूं, तैखन तैना होरू किछ न थिये ज़ोते,

मेरी गल्‍लां तैन पुड़ झ़ेड़री ज़ेरि बेखती थी।

23 ज़ेन्च़रे लोक बरसांती, तेन्च़रे मीं भी बलगते थिये;

ते तैना अपनु आशी एन्च़रे खोलते थिये ज़ेन्च़रे आखरी बरसांतरे लेई।

24 ज़ैखन तैन्न किछ उमीद न रहती थी तैखन अवं हेसतां तैन्न खुश केरतो थियो;

ते कोई मेरे तुत्तरे बिगैड़ी न थियो सकतो।

25 अवं तैन केरि बत च़ुनतो, ते तैन मां खास भोइतां बिश्शा केरतो थियो,

ते ज़ेरो सेनाई मां राज़ो या शोग केरनेबालन

मां तसल्‍ली देनेबालो भोते, तेन्च़रे अवं रहतो थियो।"