1 SAMUEL 2

Doʼana Hana

1 ✝ 2:1 Luk. 1:46-55. Kasiimpo Hana adoʼa, pogauna,

"KAWASANA OPU apaunde-unde ngangarandaku tee o KAWASANA OPU adhawuaku kakaa.

Muncuku ahina musuku

sababuna iaku kukaunde-unde roonamo katulungimu.

2 Inda dhaangia momangkilona mboomo KAWASANA OPU.

Inda dhaangia mosagaanana, tangkanamo Ingkoo,

inda dhaangia o gunu bhatu mboomo Aulataʼalata.

3 Bholi sadia amalanga bhatangana pogaumu,

bholi dhaangia o pogau mosombo molimbana minaaka i ngangamu

roonamo KAWASANA OPU Momatauna bhari-bharia giu

tee Incia mohaakimuna bhari-bharia pewauna maanusia.

4 Panana manga hiri atokatuki,

maka manga mia momalute amakaamo.

5 Mia momambosu i piamo itu sii-sii aasomo karona to apotibhaaka kinande,

maka o mia momaara i piamo itu sii-sii amalompomo.*2:5amalompomo: Pogau Ibrani amarasai atomaʼanai. Amembali uka akomaʼana aunto o kaarana atawa aponiunto.

Bhawine mokombana i piamo itu sii-sii apalaahirimo pitu mia anaana,*2:5 pitu mia anaana: To miana Israel nomoro tuju agambaraaka saangu giu momondo (kamata Ayb. 1:2; 42:13; Yer. 15:9). Ande tabaca aʼeati 21, sapadhana Hana apalaahiri Samuel, incia apalaahirimo uka talu mia ana umane tee rua mia ana bhawine.

maka o mia mobharina anana i piamo itu, sii-sii amalaumo.

6 KAWASANA OPU apadhadhi tee apekamate maanusia;

Incia apasapo mia i nuncana duniana mia mate tee aangkea minaaka i iwe sumai.

7 KAWASANA OPU apamisikini tee aparangkaea mia;

Incia apekatambe tee apamembali mia atohoromati.

8 Incia aangka mia momisikini minaaka i nuncana ngawuna tana,

tee aangka mia mokakuranga minaaka i nuncana karombu

to apauncuraia apobhawa tee manga lalaki

tee apamembalia akokauncuramakaaka kurusii motohoromati.

Roonamo ariina alamu o pewauana KAWASANA OPU,

tee adhikaakea dunia i bhawona.

9 Bhengkalana manga mia mosaalihi bheajagania,

maka o mia madhaki bheahancuru i nuncana kalalanda

roonamo mencuana aminaaka i kakaamami imembaliakamami takana minaaka i manga musumami.

10 KAWASANA OPU bheapahancuru mia mopotagalina tee Incia.

To manga incia o KAWASANA OPU bheapasapo guntu minaaka i laiana.

KAWASANA OPU bheahaakimu maanusia sakawana i tapana dunia.

Incia bheadhawuaka kakaana to manga raja ipilina

tee apajaea mia ilantina."*2:10 mia ilantina: I nuncana pogau Ibrani, ibarati incia sii uka akomaʼana 'masyiakh.' Ande o maʼanana satotuuna siitumo o mia motominaki to tandana incia o mia mopadhana ipilina Aulataʼala. Al Masi, motosarongiakana uka Isa bin Maryam, minaaka i oni 'masyiakh' (kamata Zab. 2:2; Tul. 4:26-27).