2 Kasiimpo miana Filistin apasiapumo suludaduna to apotimbeaka tee manga miana Israel. Wakutuuna tangasaana potimbea sumai, miana Israel amatalomo, tee abhari o suludaduna momatena kera-kera pata rewu mia i nuncana potimbea sumai. 3 Wakutuuna manga suludaduna sumai ambuli i kemana, manga mancuanana miana Israel apogaumo, "Apokia i eo sii o KAWASANA OPU mangataroaka tamatalo minaaka i miana Filistin? Maimo tabhawaaka Sorongana Pojanjiana KAWASANA OPU minaaka i Silo. Ande o soronga sumai apobhawa tee ingkita, ingkita dhaanamo tasalaamati minaaka i manga musuta."

4 ✝ 4:4 Limb. 25:22. Kasiimpo manga incia atumpu pia mia o suludaduna to alingkaaka i Silo tee aala Sorongana Pojanjiana KAWASANA OPUNA Aulataʼalana saangua alamu modhaangiana i bhawona manga kerub.*4:4 kerub: Malaaʼekati igambaraaka mboomo mahaluku mokopani, gambarana kalangana Aulataʼala tee umbaana. Rua miaia anana Eli, siitumo Hofni tee Pinehas aose manga incia abhawa Sorongana Pojanjiana KAWASANA OPU sumai i pokemaa.

5 Sakawana Sorongana Pojanjiana KAWASANA OPU sumai i pokemaana miana Israel, manga incia asambo-sambomo tee apekee momakaa mpuu, sabutuna o dunia akolendu. 6 Wakutuuna o miana Filistin arango suarana sambo-sambo sumai, manga incia apogaumo, "Opea isambo-samboakana manga miana Ibrani*4:6 manga miana Ibrani: Wakutuu zamanina Nabii Samuel, miana Israel indapo asarongi karona "miana Ibrani" maka asarongi karona "miana Israel" atawa "miana Yehuda." Soo manga musuna Israel mosarongina manga incia "miana Ibrani" to aele-eleaka manga incia. sumai?"

Kasiimpo manga incia amataumea, ande o Sorongana Pojanjiana KAWASANA OPU akawamo i pokemaana manga miana Israel. 7 Manga miana Filistin amaekamo tee apogau, "Dhaangia tee manga dewana miana Israel moumbana i pokemaana manga incia!" Manga incia uka apogau, "Tacilakamo roonamo indapo aperna tanamisi giu mboo sii. 8 Tacilakamo! Incema bhemomangatulungina minaaka i limana manga dewa momakaa sii? Manga dewamo incia sumai mopadhana mopekamatena miana Mesir tee sagala giuna balaa i tana matuu i piamo itu. 9 E miana Filistin, pekatangkea o ngangarandata tee tabaranimo tapotimbe mboomo samia umane, ande inda ingkita bhetamembali bhatuana miana Ibrani, mboomo i piamo itu manga incia amembali bhatuata. Rampaakanamo sumai maimo tapotimbeaka mboomo samia hiri mobarani!"

10 Kasiimpo apotimbemo miana Filistin, tee amatalomo miana Israel, sabutuna manga incia apalaiakamo karona i kemana samia-samia. Amaoge mpuu o katalona miana Israel, siitumo talu pulu rewu o tantarana momatena i eo incia sumai. 11 Inda soo incia sumai, maka o Sorongana Pojanjiana KAWASANA OPU uka atorampasi, tee uka rua miaia anana Eli siitumo Hofni tee Pinehas atopekamate.