1 ✝ 7:1 2Sam. 6:2-4; 1Taw. 13:5-7. Jadi o raʼeatina Kiryat-Yearim aumba aala Sorongana Pojanjiana KAWASANA OPU tee abhawea i nuncana bhanuana Abinadab modhaangiana i bhawona kabumbu. Kasiimpo apatotapuaka anana mokosaroakana Eleazar to mojaganina Sorongana Pojanjiana KAWASANA OPU sumai.

2 Sorongana Pojanjiana KAWASANA OPU sumai amboore i Kota Kiryat-Yearim kera-kera o kangengena rua pulu tao. I wakutuu incia sumai uka bhari-bharia miana Israel agora tee apemeliliaka KAWASANA OPU. 3 Kasiimpo apogaumo Nabii Samuel tee bhari-bharia miana Israel, "Ande ingkomiu gaumiu umbuli usomba KAWASANA OPU tee mpuu-mpuuna incamiu, ingkomiu tabeana ubhanaka manga barahalana lipu mosagaanana tee manga patuna dewi Astoret*7:3 dewi Astoret: Dewi kasuburu isombana miana Kanaan iabhina mboomo bhawinena manga dewa Baal, dewa isombana manga lipu i saripina Israel. (Kamata Hab. 2:13; 1Raj. 11:33; 2Raj. 23:13). minaaka i tanga-tangamiu. Pasaraakaakamea o ngangarandamiu i KAWASANA OPU tee usombamo tangkanamo tee Incia, sumaimo Incia bheapabebasikomiu minaaka i limana miana Filistin." 4 Jadi manga miana Israel abhanakamo manga patuna dewa Baal tee patuna dewi Astoret tee manga incia soo asomba KAWASANA OPU.

5 Kasiimpo Samuel apogau, "Romusakamea bhari-bharia miana Israel i Kota Mizpa, roonamo iaku bhekudoʼa i KAWASANA OPU to ingkomiu." 6 Sumaimo manga incia aporomusakamo i Mizpa, tee atambu uwe kasiimpo alalia to tandana pasombaa i aroana KAWASANA OPU. I eo incia sumai manga incia apoasa iwe sumai tee apogau, "Ingkami takodosamo tee KAWASANA OPU." Nabii Samuel uka amembali haakimu mokapalaina miana Israel i Kota Mizpa.

7 Wakutuuna miana Filistin arango lele ande o miana Israel aporomusaka i Kota Mizpa, amajumo lima miaia rajana miana Filistin sumai tee aumbati miana Israel. Giu incia sumai arangoa miana Israel, sabutuna manga incia amaekamo to apoaroaka miana Filistin. 8 Pogauna miana Israel i Nabii Samuel, "Bholi uunto mangadoʼaaka i KAWASANA OPU o Aulataʼalata, mamudhaakana mangapasalaamati minaaka i limana miana Filistin." 9 Rampaakanamo sumai o Nabii Samuel aalamo sambaa anana dumba modhaangiana modudu, kasiimpo apasombaakea to kurubani tunua i KAWASANA OPU. Nabii Samuel aemani tulungi i KAWASANA OPU to miana Israel, tee o doʼana sumai aperangoia KAWASANA OPU.

10 Wakutuuna Samuel tangasaana apasaraakaaka kurubani tunua sumai, aumbamo miana Filistin to apoewangiaka miana Israel. Maka i eo incia sumai o KAWASANA OPU apakacau tee apabingu miana Filistin tee suarana guntu momakaa mpuu, sabutuna manga miana Filistin amatalomo tee miana Israel. 11 Kasiimpo alimbamo manga miana Israel minaaka i Kota Mizpa tee apajere tee apekatalo miana Filistin sakawana i Bet-Kar.

12 Kasiimpo Samuel aala saangu bhatu tee adhikaia i polotaana Kota Mizpa tee Sen*7:12 Sen: I nuncana pogau Ibrani akomaʼana "nginci," tee amembali sarona kota inda imatauta sii-sii, atawa amembali uka to sarona saangu kabumbu. tee asarongiakea Eben-Haezer,*7:12 Eben-Haezer: Maʼanana i nuncana pogau Ibrani Bhatu Katulungi. pogauna, "Sakawana iwe sii o KAWASANA OPU mangatulungi." 13 Mboomo sumai o miana Israel apekatalo miana Filistin tee kangengena dhadhina Nabii Samuel, manga incia indamo apendua uka to apesuaiki i lipuna Israel. 14 Bhari-bharia kota mopadhana italona tee ialana manga miana Filistin minaaka i Kota Ekron sakawana i Kota Gat apambulimea pendua i miana Israel. Mboomo sumai o miana Israel apotibhaakea pendua manga tana modhaangiana i saripina manga kotana, kasiimpo miana Israel tee miana Amori*7:14 miana Amori: Miana Amori aposala tee miana Filistin. Roonamo miana Amori satotuuna manga mia momboorena i atina Tana Kanaan, i tanga-tangana manga gunu modhaangiana i Tana Kanaan, tee uka i sawetana timbuna Umala Yordan. Manga incia mokokuasana i manga lipu incia sumai i wakutuuna miana Israel indapo arampasia, sainamo miana Filistin amboore i saripina tawo i Tana Kanaan. Tee kananeana miana Amori atosarongimo miana Kanaan. Kamata Bhaa. 15:16. apomalapemo.

15 Samuel amembali haakimu mokapalaina miana Israel saʼumurua dhadhina. 16 Incia satao-satao alingka atiingi Kota Bait-El, Kota Gilgal, tee Kota Mizpa, tee amembali haakimuna miana Israel i bhari-bharia tampa incia sumai. 17 Sapadhana incia sumai o Samuel ambulimo pendua i bhanuana i Kota Rama. Iwe sumai incia ahaakimu parakarana manga miana Israel tee abhangu saangu tampana tunuana kurubani to KAWASANA OPU.