1 Samwẹl 19

11 Saul ọtọhm ajinọng pẹ bẹ́, mad-abaana Devid z’ikẹ k’ọsọhm mfha mafhẹ-ẹ k’ekpebha. Okenaka, Mikal kw’ode kwanọng kw’Devid, oben-ẹ bẹ́, "Ó̱de ina arọbhọ, akaam akpen pọ m’erungọ nda, ophyinẹ mm’afhọ-ọ ọfhọ o!" 12 Nya o, Mikal ọkkaana Devid ozenga k’ọmma kw’ofum ọsaka, ọrọbh ọnaanga. 13 Minna kw’Mikal ọtọk ọkpata, orurọ ny’ebin, obubh-ẹ ibara, obir ọnan-ẹ eso k’avu-phyabha.

14 K’ogbe kw’Saul ọtọhm ajinọng pẹ bẹ́, mabọk Devid, Mikal obenẹ bẹ bẹ́, "Ọmmẹ-ẹ ọmma."

15 Nya o, Saul obir ọtọhm ajinọng mbo, oben bẹ bẹ́, "Màtin-ẹ ny’ebin chẹ chen-m, mfhẹ-ẹ." 16 K’ose kw’ajinọng mbo madimẹ z’ẹtaanga, maze ọkpata nwo ny’ebin ch’ọnan eso ny’avu-phyabha.

17 Saul oben Mikal bẹ́, "Osempira abọhr-m, awọhkọ ọwawunanọng kwaam ọrọbh?"

Mikal ọpọhn-ẹ bẹ́, "Kẹ oben-m bẹ́, ‘Ini kaam ọbọhk atte nnọbh, m’mfhọ-ọ.’ "

18 Minna kw’Devid ọrọbhọ ọnaanga, od-okebha Samwẹl z’Rama, otek-ẹ okpenamkpen f’Saul ikk’ẹ ọsa. Kẹ ọttara Samwẹl machina z’Naiyọt, mad-aruk za.