Nnwẹr kw'Ozenga 2

Ẹmmaana ch’Mosẹs

1 Ny’ogbe nwo, wa ojinọng wanẹ kw’ofon k’efona ch’Lẹvi ọtọk kwanọng kw’obir ofona ny’efona ndo. 2 Kwanọng nwo okwu otima ibhọr, ọmaan ojinọngnwa. Ch’oze bẹ́, nnwa nwo ojibh-ojibh, ọtọk-ẹ odubh k’aphe attaan. 3 Ch’okwu oze bẹ́, ọdọk kẹ mokpo odubh, ọtọk-ẹ oyika k’ikariba s’matim ettimma ayok, matima ibaar akpa amma p’ikariba njo maphyir, pira notinẹ sẹ, od-osok z’agwagwa p’araangakonga. 4 Ọgbaanọkka kw’nnwa nwo k’ẹpanọng, obe z’ororo okker-ẹ bẹ́, oze odik kw’im’oyin ọmaana nnwa nwo.

5 Ny’ogbe nwo, ominanwa kw’Phero obina, oyin esigbobha z’ọraanga. Aminava p’ad-ator-ẹ, matọn azenga ny’araangakonga. Ominanwa kw’Phero oze ikariba njo ny’ottem kw’agwagwa mbo. Ọtọhm ominanwa wanẹ kwẹ bẹ́, od-odunga ochen-ẹ. 6 K’ose kw’owong ikariba njo, oze ọbhanwa kw’od-obhom ẹmọng z’ẹtaanga. Okwo ọsẹ-ẹ z’ettem maa, oben bẹ́, "Nnwa nwoma ode oHiburu-nwa wanẹ."

7 Nya o, ọgbaanọkka kw’nnwa nwo k’ẹpanọng ọbọbh ominanwa kw’Phero bẹ́, "Ma, nd-nyerẹ oHiburu-kwanọng wanẹ okwu ọrọk nnwa nwoma ọnang-ọ yirẹ?"

8 Ominanwa kw’Phero ọpọhn-ẹ bẹ́, "Iye e, zọhng yerẹ!" Minna kw’ofon od-oyerẹ ọkka kw’ọbhanwa nwo. 9 Ominanwa kw’Phero oben-ẹ bẹ́, "Tọka ọbhanwa nwoma, zọhng rọk-ẹ nang-m. Kaam m’mkpọ-ọ akpuka." Minna kw’kwanọng nwo ọtọk ọbhanwa nwo ọd-ọrọk. 10 K’ogbe kw’nnwa nwo ikk’okwura, ọtọk-ẹ ochena ominanwa kw’Phero mach’nnwa kwẹ. Ọkpẹ-ẹ, Mosẹs*2.10 Mosẹs k’eHiburu oyinẹ ọttọhk mach’ewonga k’asi., oben bẹ́, "Nwong-ẹ z’asi."