Êxodo 20

Asana ijobh p’Ibinọkpaabyi

1 Minna kw’Ibinọkpaabyi ọgbaakẹ idik nja maphyir, oben bẹ́:

2 "Kaam wọ nde Ọvaar Ibinọkpaabyi kwabọnga, kw’otim bọnga obina z’Ijip, ọrọbha bọnga z’izek s’ebira.

3 "M’ọttọhk ọdọk-ọdọk kakpobha kw’ọkpanẹ kaam.

4 "M’okerim kw’ọttọhk kpenamkpen kasi, ode z’ẹrọng, obir ode m’izek, wanẹma z’asi p’aning z’izek ẹtaanga. 5 M’nso kàraka anang bẹ, m’bẹ kàbira akpobha, okurọ bẹ́, kaam Ọvaar Ibinọkpaabyi kwabọnga, nde Ibinọkpaabyi kw’oyen ottemma. Kaam nd-nnang iva irem k’mpyibha s’ab’otte ọmaana s’ab’ọkka, k’epemaanitor ittaan, ọmaana epemaanitor nna s’anọng p’awun-m. 6 Okenaka, ayok p’ayen ọdaakẹ amaan-m, mabir akpobha asana paam, kaam nd-nkọhka ọdaakẹ kwaam nnang epemaanitor k’nnọhna-k’nnọhna

7 "M’eche ch’Ọvaar Ibinọkpaabyi, kw’ode Ibinọkpaabyi kwabọnga kàtima k’elulukiden, okurọ bẹ́, ọnọng kw’otim eche chẹ k’elulukiden, Ọvaar Ibinọkpaabyi kẹ mòbina ọnang.

8 "Màjima Ẹwọhngkwokawu, masok chẹ ẹwur-owur. 9 Màsi itọhm sabọnga maphyir k’iwu ichadanẹ. 10 Ṉ́nòde ewu ndo ch’ettong ichenọmfa, ẹwọhngkwokawu ch’Ọvaar Ibinọkpaabyi kwabọnga dọ nya. Ọnọng oning ọtọhm osi ny’ewu ndo, zaabẹ́ ode kọ, obir ode ojinọngnwa kwọ, wanẹma kwanọngnwa kwọ, wanẹma abira pọ k’ejinọng ọttara k’ẹpanọng, wanẹma etirakpo pyọ, wanẹma akikennọng p’arukọ ny’ẹkọma chọ. 11 Kaam Ọvaar Ibinọkpaabyi ntim iwu ichadanẹ nsi ẹrọng ọmaana izek, ọttara araangadim, ọmaana ekpo maphyir py’ening ny’ẹtaanga kwabẹ. Otum ny’ewu ch’ettong ichenọmfa, nkwoka ọwọhng. Ofona nya, kaam Ọvaar Ibinọkpaabyi ndo ewu ndo, nsok chẹ bẹ́, ewur-owur.

12 "Màkpobha ab’atte, ọttara ab’akka, mfha maruk akpen p’adum-odum ny’izek s’kaam Ọvaar Ibinọkpaabyi m’nnang bọnga.

13 "M’ọnọng kàfhọ.

14 "M’kwanọng kw’oyok ábẹ̀ kàyima.

15 "M’orubh kàfhu.

16 "M’nttẹsẹ kw’oyok kàbe k’ẹfọra-den.

17 "M’ọsọhm kw’oyok ichen kakkerẹ, ozeng k’kwanọng kwẹ, wanẹma abira pẹ k’ejinọng ọttara k’ẹpanọng, wanẹma etirakpo pyẹ, wanẹma ọttọhk kpenamkpen f’oyen k’akpen."

18 K’ogbe kw’anọng p’Israẹl maze ẹbhaangkpon ch’ẹd-ẹmanẹ ẹwọr, mabir abhaanga ẹmọng ch’enyisa, ọttara ose kw’egbe ndo nede izizong-izizong, ojora ọbọka bẹ, mafọnọ bẹ́ tikitikitiki. Ofona nya, mabe z’ororo, 19 maben Mosẹs bẹ́, "Kọ zeng mmo gbaak odik nang mina, mina mm’oyong-ọ itọhng oyonga. Kàchera bẹ́, Ibinọkpaabyi ozeng mmo ọgbaak odik ọnang mina, mfha moning ope."

20 Mosẹs ọpọhna bẹ bẹ́, "Oning bọnga ojor. Ibinọkpaabyi okenka okwu bẹ́, oyoma bọnga, mfha ojora f’Ibinọkpaabyi osi bọnga mabhum mpyibha osisi."

21 Anọng mbo mabe z’ororo mach’mabe nya. Mosẹs kẹ-kẹ ozenga ọnyọma orungibanga nwo kw’Ibinọkpaabyi oning.

Asana p’amaan akpata ọmaana ija-byi

22 Nya o, Ọvaar Ibinọkpaabyi oben Mosẹs bẹ́, "Tek anọng p’Israẹl bẹ́, ‘Bọnga oyenẹ nkk’aza bẹ́, kaam nning z’ẹrọng mgbaak odik nnang bọnga. 23 M’kaam kakpobha ọmaana akpata p’matim silva, wanẹma gol, asi.

24 " ‘Bọnga mm’asi ija-byi s’ididọhbh manang-m. Nya kw’mafọhnọ nja sabọnga anang-m: nja s’ẹkwọmọ, ọmaana s’eforgbaka, ozeng k’arọkimaan, ọmaana avugboka, ttara adamogbodo. Ibyi kpenamkpen s’nsi bẹ́, anọng akpobha eche chaam, kaam m’nsaka, nkwu nsi bọnga ittabọhng nya. 25 Ó̱de matim ata asi ija-byi saam, m’ata p’madok-odoka katima, okurọ bẹ́, óde matim ata p’madok-odoka, mm’akibhẹ sẹ okibhẹ. 26 M’abhikakpa k’ija-byi saam kasi, mfha maning erinikwum chabọnga k’iyaan abharẹ.’ "