3 Abulahamu akagundama mbaka pahi, ndi Chapanga akamjovela, 4 "Nivika lilaganu lenili na veve, yati uvya dadi wa vandu va milima yamahele. 5 Yati ukemiwa lepi kavili lihina laku Abulahamu, nambu yati ukemelewa lihina laku Ibulahimu, muni nikukitili kuvya wa dadi wa vandu va milima yamahele. 6 Yati nikukita uvya na chiveleku chamahele neju, kwa veve yati nikita vandu va milima yamahele na pagati yavi vangi vivya vankosi."

7 Yati nitimilisa lilaganu langu na veve, viveleku vyaku na viveveleku vyavi vyoha magono goha gangali mwishu, kavili yati nivya Chapanga waku na Chapanga wa viveleku vyaku. 8 Yati nikuvapela mulima uwu wemwitama ngati vayehe uvya waku magono goha, ndi mulima woha wa Kanaani uvya waku magono goha gangali mwishu, na nene yati nivya Chapanga winu.

9 Kangi Chapanga akamjovela Ibulahimu, "Veve yikugana ulikamula lilaganu langu, veve wamwene, na viveleku vyaku, pamonga ndava ya viveleku vyevibwela. 10 Lenili ndi lilaganu leukulikamula pagati yangu na veve pamonga na viveleku vyaku. Kila mgosi pagati yinu yikumgana adumuliwa jandu. 11 Yati mwidumuliwa jandu na yeniyo ndi yati yivya ulangisu wa lilaganu langu na nyenye.