Utumbula 45

Yosefu akujimanyisa kwa vahaja vaki

1 Penapo Yosefu ahotwili lepi kusindimala kangi mumtima waki palongolo ya vandu vevayimili palongolo yaki, akajova kwa lwami luvaha, akajova, "Muhamba kuvala!" Ndi pavi lepi mundu yeyoha mwenumo Yosefu peajimanyis kwa valongo vaki. 2 Yosefu avembili kwa lwami luvaha hati Vamisili vakamyuwana, mewawa vandu va munyumba ya Falao vakamuyuwana. 3 Yosefu akavajovela valongo vaki, "Nene ndi Yosefu. Wu, dadi wangu akona mumi?" Nambu valongo vaki pavayuwini chenicho, vakenyemwiki na kuyogopa neju vahotwili lepi kumyangula.