ମସାତି ଜଲମ୍
1 ଇଦାଂପାଚେ ଲେବି ଲାତ୍ରାଉବ୍ଜାତି ରୱାନ୍ ମାନାୟ୍ ହାଲ୍ଜି ଲେବି ଲାତ୍ରାତାଂ ର ଗାଡ଼୍ଚେଙ୍ଗ୍ ବିବା କିତାନ୍ । 2 ତାପାଚେ ହେ କଗ୍ଲେ ଏସ୍ପିସ୍ତି ର ମାଜ଼ି ଗାଟାଆତାତ୍; ଆରେ, କାଡ଼୍ଦେଂ ବେସି ହଲ୍ନାକା ହୁଡ଼୍ଜି ହେଦେଲ୍ ତାଂ ତିନି ମାସ୍ ପାତେକ୍ ଡ଼ୁକ୍ଚି ଇଡ଼୍ତାତ୍ । 3 ତାପାଚେ ଆରେ ଡ଼ୁକ୍ଚି ଇଡ଼୍ଦେଂ ଆଡ଼୍ୱାଦାଂ ହେଦେଲ୍ ର ଟପା ରଚି କିଜ଼ି ଚିଣ୍ଡା ଚିକ୍ଲା କାସ୍ଦି କଣ୍ଡିତ ଚିକାଣ୍ ଆରି ଦୁପ୍ନି କତ୍ତି ତା ବିତ୍ରେ ହେ କାଡ଼୍ଦେଂ ଇଡ଼୍ଜି ନାଗୁଡ଼୍ ଦାରା ବଡ଼ାଆନିତ ଇଡ଼୍ତାତ୍ । 4 ଆରେ, ତାଦାଂ ଇନା ଦସା ଆନାତ୍, ହେଦାଂ ହୁଡ଼୍ନି କାଜିଂ ତା ତଣ୍ଦେହି ଦେହା ନିଲ୍ଚି ମାଚାତ୍ ।
5 ତାପାଚେ ପାରତି ଗାଡ଼୍ହି ଏସ୍ ଇବେଦେଂ ନାଗୁଡ଼୍ତ ୱାତାତ୍, ହେଦେଲ୍ ଆଡ଼ିଏଣି ନାଗୁଡ଼୍ ଗୁଟିତ ବୁଲାଜ଼ି ମାଚିକ୍ । ଇବେ ହେଦେଲ୍ ବଡ଼ାଆନି ର ପେଡ଼ି ହୁଡ଼୍ଜି ହେଦାଂ ତାହିୱାଦେଂ ତା ହଲ୍ୟାଣିକାଂ ପକ୍ତାତ୍ । 6 ରାଜା ଗାଡ଼୍ହି ପେଡ଼ି ଜେସି ହେ କାଡ଼୍ଦେଂ ହୁଡ଼୍ତାତ୍; ଆରେ ହୁଡ଼ା, ହେବେ ହେ କାଡ଼୍ଦେ ଆଡ଼୍ବିସ୍ ମାଚାନ୍; ତାପାଚେ ହେଦେଲ୍ କାର୍ମା ଆଜ଼ି ଇଚାତ୍, "ଇୱାନ୍ ରୱାନ୍ ଏବ୍ରିୟ କାଡ଼୍ଦେ ।" 7 ହେଏଚେକାଡ଼୍ଦ ତା ତଣ୍ଦେହି ପାର ଗାଡ଼୍ହିଂ ଇଚାତ୍ । "ଆନ୍ ହାଲ୍ଜି ନି କାଜିଂ ଇ କାଡ଼୍ଦେଂ ଉଟିକିନି କାଜିଂ ଜେ ଏବ୍ରିୟ କଗ୍ଲେକ୍ ବିତ୍ରେ ରଞ୍ଜେଲ୍ କଗ୍ଲେଂ କୁକ୍ଚି ତାହିୱାନାଂ ?" 8 ହେବେ ପାର ଗାଡ଼୍ହି ଇଚାତ୍, "ହାଲା;" ଲାଗିଂ ଗାଡ଼୍ଚେ ହାଲ୍ଜି କାଡ଼୍ଦେ ତେହିଂ କୁକ୍ଚି ତାହିୱାତାତ୍ । 9 ଲାଗିଂ ପାର ଗାଡ଼୍ହି ତାଙ୍ଗେଙ୍ଗ୍ ଇଚାତ୍, "ଏନ୍ ଇ କାଡ଼୍ଦେଂ ଅଜ଼ି ନା କାଜିଂ ମାୟ୍ଉଟ୍ପା; ଆନ୍ ନିଂ ବୁତି ହିଦ୍ନାଂ;" ଲାଗ୍ ହେ କଗ୍ଲେ କାଡ଼୍ଦେଂ ଅଜ଼ି ପହା କିତାତ୍ । 10 ଇଦାଂପାଚେ କାଡ଼୍ଦେ ଗାଜାଆତିଲେ, ହେଦେଲ୍ ତାଂ ଅଜ଼ି ପାର ଗାଡ଼୍ହିଂ ହିତାତ୍ । ପାଚେ କାଡ଼୍ଦେ ତା ମେହି ଆତାନ୍ । ଲାଗିଙ୍ଗ୍ ତା ତର୍ ମସା ହିତାତ୍; ଇନାକିଦେଙ୍ଗ୍କି ହେଦେଲ୍ ଇଚାତ୍, "ଆନ୍ ଇୱାନିଙ୍ଗ୍ ଏଜ଼ୁଙ୍ଗ୍ତାଂ ହପ୍ତାଂନ୍ନା ।"
ମସାତି ମିଦିୟନ୍ତ ହନ୍ତାନ୍
11 ଦିନ୍ହାଚିପାଚେ ମସା ଗାଜା ଆତି ପାଚେ ଦିନେକ୍ ହେୱାନ୍ ଜାର୍ ଟଣ୍ଡାହିର୍ ତାକେ ହାଲ୍ଜି ବଜ୍ ପିଣ୍ଡ୍ନାକା ହୁଡ଼୍ତାନ୍; ଆରେ, ରୱାନ୍ ମିସରିୟା ତା ତଣ୍ଡାହି ତାକେଣ୍ଡା ରୱାନ୍ ଏବ୍ରିୟା ମାଟ୍କିନାକା ହୁଡ଼୍ତାନ୍ । 12 ଇଦାଂ କାଜିଙ୍ଗ୍ ମସା ଇନିଆନି ହୁଡ଼୍ଜି ଇନେରିଂ ହୁଡ଼୍ୱାଦାଂ ହେ ମିସରିୟାତିଂ ଅସ୍ତି ବାଲ୍ୟାତ ମୁଚ୍ଚାନ୍ । 13 ଆର ନାଜିଂ ମସା ବାର୍ତ ହାଲ୍ଜି ରିଆର୍ ଏବ୍ରିୟାଙ୍ଗ୍ କେତ୍ପାନାକା ହୁଡ଼୍ଜି ଦସି ମାନାୟ୍ତିଂ ଇଚାନ୍, "ଏପେଙ୍ଗ୍ ଜାର୍ ଟଣ୍ଡେନିଂ ଇନାକିଦେଂ ମାଟ୍କିନାଦେରା ?"
14 ପାଚେ ମୁଡ଼୍ଦାକାନ୍ ଇଚାନ୍, "ଇନେର୍ ନିଙ୍ଗ୍ ମା ଜପି ରାଜା ଆରି ବିଚାର୍ କାର୍ୟା କିଜ଼ି ବାଚିକିତ୍ନ୍ନା ?" ଏନେଙ୍ଗ୍ ଇନେସ୍ କି ହେ ମିସରିୟା ମାନାୟ୍ତିଂ ଅସ୍ତାୟ୍, "ହେ ଲାକେ ନାଙ୍ଗ୍ ଅସ୍ତେଦେଂ ମାନ୍କିନାୟା ? ପାଚେ ମସା ପାଣ୍ଡ୍ରା ଆଜ଼ି ଇଚାନ୍, ଇ କାତା ୱିଜ଼ାର୍ ପୁଚାର୍ଣ୍ଣା ।" 15 ଇଦାଂପାଚେ ପାର ଇ ବେରଣ୍ ୱେନ୍ଞ୍ଜି ମସାଙ୍ଗ୍ ଅସ୍ତେଙ୍ଗ୍ ସେସ୍ଟା କିତାନ୍ । ମାତର୍ ମସା ପାର ମୁମ୍ଦାଂ ହନ୍ଚି ମିଦିୟନ୍ ଦେସ୍ତ ବାହାକିଦେଂ ହାଲ୍ଜି ର କୁଇ କଚଣ୍ତ କୁଚ୍ଚାନ୍ । 16 ମିଦିୟନିୟନି ମାପ୍ରୁହେବାକିନାକାନ୍ତି ସାତ୍ ଜାଣ୍ ଗାଡ଼୍ଚେକ୍ ମାଚିକ୍; ହେୱେକ୍ ହେ ବାହାତ ୱାଜ଼ି ଲାତ୍ରାହି ମେଣ୍ଡାକାଂ ଏଜ଼ୁଙ୍ଗ୍ ଉଟିକିନି କାଜିଂ ଏଜ଼ୁଙ୍ଗ୍ ଉନ୍ଦି କୁଣ୍ଡିତ ବାର୍ତି କିତିକ୍ । 17 ଇଦାଂପାଚେ ମେଣ୍ଡାଗଡ଼ିୟାର୍ ୱାଜ଼ି ହେୱେକାଂ ପେସ୍ଦେଂ ଲାଗାତାର୍, ମାତର୍ ମସା ନିଙ୍ଗ୍ଜି ହେୱେକାଂ ସାଇଜ କିଜ଼ି ହେୱେକ୍ ମେଣ୍ଡାକାଂ ଏଜ଼ୁଙ୍ଗ୍ ଉଟ୍ତାନ୍ । 18 ଇଦାଂପାଚେ ହେୱେକ୍ ଜାର୍ ଲାତ୍ରାହି ରୁୟେଲ ତାକେ ହାଚିକ୍, ହେୱାନ୍ ହେୱେକାଂ ୱେନ୍ବାତାନ୍, "ନେଞ୍ଜେଙ୍ଗ୍ ଏପେଙ୍ଗ୍ ଏଚେକ୍ ବେଗି ଇନେସ୍ ୱାତାଦେର୍ ?"
19 ତାପାଚେ ହେୱେକ୍ ଇଚିକ୍, "ରୱାନ୍ ମିସରିୟାନି ମାନାୟ୍ ମେଣ୍ଡାଗଡ଼ିୟାର୍ କେଇଦାଂ ମାଙ୍ଗେଙ୍ଗ୍ ରାକ୍ୟା କିତ୍ତାନ୍, ଆରେ, ମା କାଜିଂ ଏଜ଼ୁଙ୍ଗ୍ ଉନ୍ଦି ମେଣ୍ଡାକାଂ ଏଜ଼ୁଂ ଉଟ୍ପାତାନ୍ ।"
20 ଲାଗିଂ ହେୱାନ୍ ଜାର୍ ଗାଡ଼୍ହିକାଂ ଇଚାନ୍, "ହେୱାନ୍ ଇମେତାକେ ? ଏପେଙ୍ଗ୍ ତାଙ୍ଗେଙ୍ଗ୍ ଇନାକିଦେଂ ପିସ୍ସି ୱାତାଦେର୍ ? ହେୱାନିଙ୍ଗ୍ କୁକାଟ୍; ହେୱାନ୍ ମା ହୁଦାଂ ତିନାନ୍ ।" 21 ଇଦାଂପାଚେ ମସା ହେ ଜିଦ୍ର ଲାହାଂ ବାହା କିଦେଂ ରାଜି ଆତାନ୍; ଆରେ, ହେ ମସାତି ଲାହାଂ ଜାର୍ ଗାଡ଼୍ହି ସିପ୍ପରାତିଂ ବିବା ହିତାନ୍ । 22 ଇଦାଂପାଚେ ହେ କଗ୍ଲେ ବପା ହିମ୍ଣା ଗାଟାଆତାତ୍, ମସା ତା ତର୍ ଗେର୍ସମ୍ ହିତାନ୍; ଇନାକିଦେଂକି ହେୱାନ୍ ଇଚାନ୍, "ଆନ୍ ବିଦେସ୍ତାଂ ୱାଜ଼ି ବାହା କିତାଂନା ।" 23 ବେସି କାଡ଼୍ ପାଚେ ମିସର୍ନି ରାଜା ହାତାନ୍, ଆରେ, ଇସ୍ରାଏଲ୍ ହିମ୍ଣାଂ ହଲ୍ୟା କାମାୟ୍ କାଜିଂ ଦୁକ୍ଦୁକାଜ଼ି ଆରି ଆଡ୍ବାତାର୍ ଆରି ହଲ୍ୟା କାମାୟ୍ କାଜିଂ ହେୱାର୍ତି ଆଡ୍ବାନାକା ଇସ୍ୱର୍ ତାକେ ହାଚାତ୍ । 24 ଲାଗିଙ୍ଗ୍ ପର୍ମେସ୍ୱର୍ ହେୱାର୍ତି ଆଡ଼୍ବିନି କାଟ୍ ୱେଚାନ୍, ଆରେ ଅବ୍ରାହାମ୍ ଆରି ଇସ୍ହାକ୍ ଆରି ଜାକୁବ କିତି ତା ନିୟମ୍ ଏତୁ କିଜ଼ି, 25 ପର୍ମେସ୍ୱର୍ ଇସ୍ରାଏଲ୍ ହିମ୍ଣାଂ କାଜିଂ ହୁଡ଼୍ତାନ୍ ଆରି ହେୱାର୍ତି ଦୁକ୍ ପୁଚାନ୍ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)