Ezequiel 39

गोगोअ हार

1 "फाशोअ ए मोनवीइ पोऱ्या, गोगोअ विरुद्दाम भविश्यवाणी कोइत एहें को, ए गोग, रोश, मेशेक आन तुबलोअ मुख्या पुडारी, यहोवा देव एहें कोहे, आंय ताआ विरुद्दाम होय. 2 आंय ताहूं एकी नवी वाटेए वोल फिरवीत लेत आविहीं, पाला माआ वोल दुर सेटे रोत इस्राएलोअ डोगोपोअ लेत आविहीं. 3 तिहीं आंय ताआ बांगाड़्या आथोमेऱ्यीइ तोंद्ली आन हाजाड़्या आथोमेऱ्येए बिलखे निसे तोड़ीत पाड़ीहीं. 4 तु, ताआ सेयनिक आन ताअरीइ आखी जुदा जुदा टोला आखा इस्राएलोअ डोगोपोअ लड़ायीम मोइत जाहा; आंय ताहूं माहां खानारा सिड़ाआ खाणो आन रानठ्या जनवारोअ हावोज कोइ देहीं. 5 तु बारथे मोकला रानोम मोइत पोड़ीत रोही, काहाके आंय यहोवा देव एहें कोहो, एहें कोत देव कोहे. 6 आंय मागोगोम आन बेटोपोअ पोलाख्या रोनारा माअहूंम आग लागाड़ीहीं; आन तियांहां मुंदू जाय के आंय यहोवा होय. 7 आंय माआ इस्राएलोअ विसमेहें माआ सोको नाव प्रगट कोअहीं, आन तिहीं रोत माआ सोको नाव एठो ने ओवुहूं देंव, ताहां दुन्याहां मुंदू जाय के आंय यहोवा इस्राएलोअ सोकू देव होंव.

8 "पाला, जों मी कोयोहो तों ओवुहूं कोअहे, एहें यहोवा देव कोहे. 9 ताहां इस्राएल देसोअ होयरोम रोनारे माहें बारथे निहे, ढाल, फरी, तोंद्लीन बिलखे, डेंगाऱ्यी आन डाफे याहां लाकड़ुउ होस आग पेटाड़े, ओं हांत वोरह्ये जाआं साले. 10 तें पेटाड़ीइलोअ काजे लाकड़े जंगलोमेहें ने होदे जाय आन रानोमेहें लाकड़े ने वाडे जाय; काहाके तियांपोअ पेटाड़ीइलोअ काजे जाअखीलेहे आथ्यारे रोय. जियां पेल तियांहां लुट्येते तियांहां ओमे तें लुटे, एहें कोत यहोवा देव कोहे."

गोगोहो ओजीइलोअ

11 "जेहेलाम ओं आखो ओवे तेहेलाम आंय या गोगोहो इस्राएलोम दिही उगताआ वोल्यीइ मोल्या दोऱ्याआ जागऱ्यीइ ‘वाटाराआ बार’ माहोंण कोत आपीहीं. तिहीं गोग आन तियाआ आखा सेयनिकोहो ओजे पाड़े, आन तिया जागाहा ‘हामोन-गोगोअ बार’ कोत नाव पोड़े. 12 देश सोकू कोइलोअ काजे इस्राएलवाले तियांहां हांत मोयना जाआं ओजे पाड़्याज कोए. 13 देसोमेऱ्येए आखे माअहें तियांहां डाटीइलोअ काम कोए; आंय माआ महिमा प्रगट कोअहीं, तेहेलाम तियांआं बी नाव वोडो ओवे, एहें यहोवा देव कोहे. 14 ते हांत मोयना सेलात जाय, तिहींइं फाटी रोत गोयेय तें मोल्ये तोड़े होदी होदीइ ओजे पाड़ीइलोअ काजे माहुंहूं निवड़ीत कोइत पुरा देसोम मोकले, ताहां तें माअहें पुरु देस सोकू कोए. 15 होदनारे होद्याज कोए तेहेलाम एखाहा माहुंउं आटको जोड़्यो, ताहां ओजनारे तियांहां हामोन-गोग यी जागेहे लेत जात ओजे पाड़े तेहें काजे तिहीं निशाणी कोइत मिके. 16 एका होयरोअ नाव बी हामोना एहें कोत मिके, एहें कोइत पुरो देस सोकाली देय.

17 "फाशोअ मोनवीइ पोऱ्या, यहोवा प्रभु एहें कोहे: तु आखा बाती बातीइ सिड़ाहांन जनवारोहों हादेए, तियांहां को, ‘मी जों या डोगोपोअ तुमाआ काजे गाराहा कोअयोहो, तुमू टोलू वोलीत इंहीं आवा, यी जागेहे तुमुहूं जास्ती वोडो माहुंउं गाराहा आप्योहो, आवा माहां खावान रक्त पिवा! 18 तुमू बाहादिरोअ माहां खाहा, जें आखे मेडान, बोकड़ा आन डोगराआ होस बाशानोमेहें तियार कोअल्याआ होस मोइत पोड़ीत रोयेहे, आन धरतीपोऱ्याआ आधिकाऱ्योअ रक्त पिहा. 19 आंय जों तियार कोअहो तों सरबीवालो माहां खाय खाय तुमू थाकीत जाहा आन रक्त पिय पिय झिंगवात जाहा. 20 तुमू या गाराहाम रोत कोड़ा आन तियांपोअ बोहनाराआं आन, सेयनिकोओं आन लोड़ाय कोअनाराआं माहां खात कोइत ताराअहा. आंय यहोवा प्रभु ओं कोयोहो.’"

इस्राएलोअ नोवील थापना

21 "आंय देसो देसोअ माअहूंम माआ महिमा प्रगट कोअहीं, मी कोअल्ये न्यायोअ कामे आन दुस्मोनोअ विरुद्द वापरीइल्यी माआ ताकत तें देखीत लेय. 22 तेदिहीं रोत इस्राएलोअ माअहें जांइत लेय के आंयज तियांआं देव होय. 23 बिहीरा देसोवाला माअहुंहूं बी मुंदू जाय के इस्राएलवाले गुलामीम तियांआं पापोअ वाखरी गोयेते. तियां माआ विरुद्द काम कोअल्यो कोत आंय तियांआं वोल रोत सोब मुउड़ीत लेदीते. तियांआं दुस्मोनोहों तियांहां ठावकाज हारवुहूं देदा, तिहींवाअहीं माआ माअहें तारवाइ वाअहीं मोइत गोये. 24 तियांआं सोगदाय आन खाराब कामोअ वाखरी मी तियांआं वोल रोत सोब मुउड़ीत लेदीते."

25 तियाहा काजे यहोवा देव कोहे, "पोन आंय याकोबोअ पोऱ्याहां गुलामीम रोत बाअथे काडीहीं, फाशुउ आंय तियांहां पान्गाड़ीहीं, आंय माआ नाव सोको मिकीहीं. 26 ताहां तियां माआ विरुद्द कोअल्या ठोगोअ कामोअ तियांहां लाज आवे; तिहीं रोत तें होकेहे रोने वोले, आन तियांहां कोडो बी धमकी ने देय. 27 जाहां आंय तियांहां राज्या राज्यामेहें विसमेहें रोत वालीत लेतावहीं, आन तियां दुस्मोनोअ देसोम रोत टोलू वालीहीं, ताहां जाअखीलाहा देसोअ नजरेमेहें आंय पवित्र ठरिहीं. 28 ताहां तियांहां मुंदू जाय के यहोवा आमाआ देव होय. काहाके मीज तियांहां गुलामीम जाय तेहें काजे मोकल्ये, आन फाशेए तियांहां टोलू कोइत वापिस तियांआं देसोम आवुहूं देदे. 29 आंय इस्राएलोपोअ माआ आत्मा ओली देहीं, तिहीं रोत तियांहां केदिहीं बी सेटे ने कोओ. एहें कोत यहोवा देव कोहे."