Provérbios 2

Akamaro k’ubwenge

1 Mwana wanje, niwakira amajambo yanje,

ukazigama ivyo ndakwihanikiriza,

2 ugatega ugutwi amajambo y’ubwenge,

ugashira umutima wawe ku gutahura,

3 ugahamagara ubwenge,

ukaririra ugutahura,

4 ukabirondera nk’uwurondera ifeza

canke ubutunzi buhishijwe,

5 ico gihe uzomenya kwubaha Uhoraho ico ari co,

kandi uzogira ugutahura kuvuye ku Mana.

6 Kuko Uhoraho ni we atanga ubwenge,

kandi mu kanwa kiwe ni ho hava ubumenyi n’ugutahura.