ਯਿਰਮਿਯਾਹ 50

ਬਾਬੇਲ ਬਾਰੇ ਇੱਕ ਸੁਨੇਹਾ

1 ਇਹ ਉਹ ਸ਼ਬਦ ਹੈ ਜੋ ਯਾਹਵੇਹ ਨੇ ਯਿਰਮਿਯਾਹ ਨਬੀ ਦੁਆਰਾ ਬਾਬੇਲ ਅਤੇ ਕਸਦੀਆਂ ਦੀ ਧਰਤੀ ਬਾਰੇ ਬੋਲਿਆ ਸੀ:

2 "ਕੌਮਾਂ ਵਿੱਚ ਦੱਸੋ ਅਤੇ ਘੋਸ਼ਣਾ ਕਰੋ,

ਇੱਕ ਝੰਡਾ ਖੜ੍ਹਾਂ ਕਰੋ ਅਤੇ ਇਸਦਾ ਐਲਾਨ ਕਰੋ;

ਕੁਝ ਵੀ ਪਿੱਛੇ ਨਾ ਰੱਖੋ, ਪਰ ਆਖੋ,

‘ਬਾਬੇਲ ਉੱਤੇ ਕਬਜ਼ਾ ਕੀਤਾ ਜਾਵੇਗਾ;

ਬੇਲ ਸ਼ਰਮਿੰਦਾ ਹੋਵੇਗਾ,

ਮਰੋਦਾਕ ਦਹਿਸ਼ਤ ਨਾਲ ਭਰਿਆ ਹੋਇਆ ਹੈ।

ਉਸ ਦੀਆਂ ਮੂਰਤੀਆਂ ਨੂੰ ਸ਼ਰਮਸਾਰ ਕੀਤਾ ਜਾਵੇਗਾ

ਅਤੇ ਉਸ ਦੇ ਬੁੱਤ ਦਹਿਸ਼ਤ ਨਾਲ ਭਰੇ ਹੋਏ ਹਨ।’

3 ਉੱਤਰ ਤੋਂ ਇੱਕ ਕੌਮ ਉਸ ਉੱਤੇ ਹਮਲਾ ਕਰੇਗੀ

ਅਤੇ ਉਸਦੀ ਧਰਤੀ ਨੂੰ ਉਜਾੜ ਦੇਵੇਗੀ।

ਕੋਈ ਵੀ ਇਸ ਵਿੱਚ ਨਹੀਂ ਰਹੇਗਾ;

ਲੋਕ ਅਤੇ ਜਾਨਵਰ ਦੋਵੇਂ ਭੱਜ ਜਾਣਗੇ।

4 "ਉਹਨਾਂ ਦਿਨਾਂ ਵਿੱਚ, ਉਸ ਸਮੇਂ," ਯਾਹਵੇਹ ਦਾ ਵਾਕ ਹੈ,

"ਇਸਰਾਏਲ ਦੇ ਲੋਕ ਅਤੇ ਯਹੂਦਾਹ ਦੇ ਲੋਕ ਇਕੱਠੇ

ਆਪਣੇ ਪਰਮੇਸ਼ਵਰ ਨੂੰ ਲੱਭਣ ਲਈ ਰੋਦੇ ਹੋਏ ਆਉਣਗੇ।

5 ਉਹ ਸੀਯੋਨ ਦਾ ਰਸਤਾ ਪੁੱਛਣਗੇ

ਅਤੇ ਉਸ ਵੱਲ ਮੂੰਹ ਕਰਨਗੇ।

ਉਹ ਆਉਣਗੇ ਅਤੇ ਆਪਣੇ ਆਪ ਨੂੰ ਇੱਕ ਸਦੀਵੀ ਨੇਮ

ਵਿੱਚ ਯਾਹਵੇਹ ਨਾਲ ਬੰਨ੍ਹ ਲੈਣਗੇ

ਜੋ ਭੁੱਲਿਆ ਨਹੀਂ ਜਾਵੇਗਾ।

6 "ਮੇਰੇ ਲੋਕ ਭੁੱਲੀਆ ਹੋਈਆਂ ਭੇਡਾਂ ਵਾਗੂੰ ਹਨ;

ਉਹਨਾਂ ਦੇ ਚਰਵਾਹਿਆਂ ਨੇ ਉਹਨਾਂ ਨੂੰ ਕੁਰਾਹੇ ਪਾ ਦਿੱਤਾ ਹੈ

ਅਤੇ ਉਹਨਾਂ ਨੂੰ ਪਹਾੜਾਂ ਉੱਤੇ ਘੁੰਮਣ ਲਈ ਲਿਆਇਆ ਹੈ।

ਉਹ ਪਹਾੜਾਂ ਅਤੇ ਪਹਾੜੀਆਂ ਉੱਤੇ ਭਟਕਦੇ ਰਹੇ

ਅਤੇ ਆਪਣੇ ਆਰਾਮ ਦੀ ਜਗ੍ਹਾ ਨੂੰ ਭੁੱਲ ਗਏ।

7 ਜਿਸ ਨੇ ਵੀ ਉਹਨਾਂ ਨੂੰ ਪਾਇਆ, ਉਹ ਉਹਨਾਂ ਨੂੰ ਖਾ ਗਿਆ;

ਉਹਨਾਂ ਦੇ ਦੁਸ਼ਮਣਾਂ ਨੇ ਕਿਹਾ, ‘ਅਸੀਂ ਦੋਸ਼ੀ ਨਹੀਂ ਹਾਂ,

ਕਿਉਂਕਿ ਉਹਨਾਂ ਨੇ ਯਾਹਵੇਹ ਦੇ ਵਿਰੁੱਧ ਪਾਪ ਕੀਤਾ,

ਯਾਹਵੇਹ, ਆਪਣੇ ਪੁਰਖਿਆਂ ਦੀ ਆਸ ਹੈ।’

8 "ਬਾਬੇਲ ਤੋਂ ਭੱਜ ਜਾ;

ਕਸਦੀਆਂ ਦੀ ਧਰਤੀ ਨੂੰ ਛੱਡੋ,

ਅਤੇ ਇੱਜੜ ਦੀ ਅਗਵਾਈ ਕਰਨ ਵਾਲੀਆਂ ਬੱਕਰੀਆਂ ਵਰਗੇ ਬਣੋ।

9 ਕਿਉਂ ਜੋ ਮੈਂ ਉੱਤਰ ਦੀ ਧਰਤੀ ਤੋਂ ਵੱਡੀਆਂ ਕੌਮਾਂ ਦਾ

ਇੱਕ ਗੱਠਜੋੜ ਬਾਬੇਲ ਦੇ ਵਿਰੁੱਧ ਲਿਆਵਾਂਗਾ।

ਉਹ ਉਸ ਦੇ ਵਿਰੁੱਧ ਆਪਣੀਆਂ ਪਦਵੀਆਂ ਲੈਣਗੇ,

ਅਤੇ ਉਹ ਉੱਤਰ ਤੋਂ ਫੜੀ ਜਾਵੇਗੀ।

ਉਹਨਾਂ ਦੇ ਤੀਰ ਨਿਪੁੰਨ ਯੋਧਿਆਂ ਵਰਗੇ ਹੋਣਗੇ

ਜਿਹੜੇ ਖਾਲੀ ਹੱਥ ਨਹੀਂ ਮੁੜਦੇ।

10 ਇਸ ਲਈ ਕਸਦੀ ਨੂੰ ਲੁੱਟਿਆ ਜਾਵੇਗਾ;

ਸਾਰੇ ਜੋ ਉਸ ਨੂੰ ਲੁੱਟਦੇ ਹਨ, ਉਹਨਾਂ ਦਾ ਪੇਟ ਭਰਿਆ ਜਾਵੇਗਾ,"

ਯਾਹਵੇਹ ਦਾ ਵਾਕ ਹੈ।

11 "ਭਾਵੇਂ ਤੁਸੀਂ ਅਨੰਦ ਹੋਵੋ, ਭਾਵੇਂ ਤੁਸੀਂ ਮਨਾਓ,

ਹੇ ਮੇਰੀ ਮਿਲਖ਼ ਨੂੰ ਲੁੱਟਣ ਵਾਲਿਓ!

ਭਾਵੇਂ ਤੁਸੀਂ ਘਾਹ ਉੱਤੇ ਵੱਛੀ ਵਾਂਗੂੰ ਮਸਤ ਹੋ,

ਅਤੇ ਸਾਨ੍ਹ ਘੋੜੇ ਵਾਂਗੂੰ ਹਿਣਕੋ

12 ਤੁਹਾਡੀ ਮਾਂ ਬਹੁਤ ਸ਼ਰਮਿੰਦਾ ਹੋਵੇਗੀ;

ਜਿਸ ਨੇ ਤੈਨੂੰ ਜਨਮ ਦਿੱਤਾ ਹੈ, ਉਹ ਬੇਇੱਜ਼ਤ ਹੋਵੇਗੀ।

ਉਹ ਕੌਮਾਂ ਵਿੱਚੋਂ ਸਭ ਤੋਂ ਛੋਟੀ ਹੋਵੇਗੀ,

ਇੱਕ ਉਜਾੜ, ਇੱਕ ਸੁੱਕੀ ਧਰਤੀ, ਇੱਕ ਮਾਰੂਥਲ ਵਾਂਗ।

13 ਯਾਹਵੇਹ ਦੇ ਕ੍ਰੋਧ ਦੇ ਕਾਰਨ ਉਹ ਆਬਾਦ ਨਹੀਂ ਹੋਵੇਗੀ

ਪਰ ਪੂਰੀ ਤਰ੍ਹਾਂ ਵਿਰਾਨ ਹੋ ਜਾਵੇਗੀ।

ਬਾਬੇਲ ਵਿੱਚੋਂ ਲੰਘਣ ਵਾਲੇ ਸਾਰੇ ਘਬਰਾ ਜਾਣਗੇ;

ਉਹ ਉਸਦੇ ਸਾਰੇ ਜ਼ਖਮਾਂ ਦੇ ਕਾਰਨ ਮਖੌਲ ਕਰਨਗੇ।

14 "ਬਾਬੇਲ ਦੇ ਆਲੇ-ਦੁਆਲੇ ਆਪਣੀਆਂ ਸਥਿਤੀਆਂ ਸੰਭਾਲੋ,

ਤੁਸੀਂ ਸਾਰੇ ਜਿਹੜੇ ਧਣੁੱਖ ਚਲਾਉਂਦੇ ਹੋ,

ਉਹ ਦੇ ਉੱਤੇ ਚਲਾਓ ਅਤੇ ਤੀਰਾਂ ਦਾ ਸਰਫ਼ਾ ਨਾ ਕਰੋ,

ਕਿਉਂਕਿ ਉਸਨੇ ਯਾਹਵੇਹ ਦੇ ਵਿਰੁੱਧ ਪਾਪ ਕੀਤਾ ਹੈ।

15 ਹਰ ਪਾਸੇ ਉਸ ਦੇ ਖਿਲਾਫ ਰੌਲਾ ਪਾਓ!

ਉਹ ਆਤਮ ਸਮਰਪਣ ਕਰ ਦਿੰਦੀ ਹੈ, ਉਸ ਦੇ ਬੁਰਜ ਡਿੱਗ ਜਾਂਦੇ ਹਨ,

ਉਸ ਦੀਆਂ ਕੰਧਾਂ ਢਹਿ ਜਾਂਦੀਆਂ ਹਨ।

ਕਿਉਂਕਿ ਇਹ ਯਾਹਵੇਹ ਦਾ ਬਦਲਾ ਹੈ,

ਉਸ ਤੋਂ ਬਦਲਾ ਲਓ;

ਉਸ ਨਾਲ ਉਸੇ ਤਰ੍ਹਾਂ ਕਰੋ ਜਿਵੇਂ ਉਸ ਨੇ ਦੂਜਿਆਂ ਨਾਲ ਕੀਤਾ ਹੈ।

16 ਬਾਬੇਲ ਤੋਂ ਬੀਜਣ ਵਾਲੇ ਨੂੰ

ਅਤੇ ਵੱਢਣ ਵਾਲੇ ਨੂੰ ਆਪਣੀ ਦਾਤਰੀ ਨਾਲ ਵਾਢੀ ਵੇਲੇ ਕੱਟ ਸੁੱਟੋ।

ਜ਼ਾਲਮ ਦੀ ਤਲਵਾਰ ਦੇ ਕਾਰਨ

ਹਰ ਕੋਈ ਆਪੋ-ਆਪਣੇ ਲੋਕਾਂ ਕੋਲ ਮੁੜ ਜਾਵੇ,

ਹਰ ਕੋਈ ਆਪਣੀ ਧਰਤੀ ਨੂੰ ਭੱਜ ਜਾਵੇ।

17 "ਇਸਰਾਏਲ ਇੱਕ ਭਟਕੀ ਹੋਈ ਭੇਡ ਹੈ

ਜਿਸਨੂੰ ਸ਼ੇਰਾਂ ਨੇ ਭਜਾਇਆ ਹੈ।

ਪਹਿਲਾਂ ਉਸ ਨੂੰ

ਅੱਸ਼ੂਰ ਦੇ ਰਾਜਾ ਨੇ ਖਾਧਾ

ਉਸ ਦੀਆਂ ਹੱਡੀਆਂ ਨੂੰ ਕੁਚਲਣ ਵਾਲਾ ਆਖਰੀ

ਬਾਬੇਲ ਦਾ ਰਾਜਾ ਨਬੂਕਦਨੱਸਰ ਸੀ।"

18 ਇਸ ਲਈ, ਸਰਬਸ਼ਕਤੀਮਾਨ ਯਾਹਵੇਹ, ਇਸਰਾਏਲ ਦਾ ਪਰਮੇਸ਼ਵਰ, ਇਸ ਤਰ੍ਹਾਂ ਆਖਦਾ ਹੈ:

"ਮੈਂ ਬਾਬੇਲ ਦੇ ਰਾਜੇ ਅਤੇ ਉਸਦੀ ਧਰਤੀ ਨੂੰ ਸਜ਼ਾ ਦਿਆਂਗਾ

ਜਿਵੇਂ ਮੈਂ ਅੱਸ਼ੂਰ ਦੇ ਰਾਜੇ ਨੂੰ ਸਜ਼ਾ ਦਿੱਤੀ ਸੀ।

19 ਪਰ ਮੈਂ ਇਸਰਾਏਲ ਨੂੰ ਉਹਨਾਂ ਦੀ ਚਰਾਗਾਹ ਵਿੱਚ ਵਾਪਸ ਲਿਆਵਾਂਗਾ,

ਅਤੇ ਉਹ ਕਰਮਲ ਅਤੇ ਬਾਸ਼ਾਨ ਵਿੱਚ ਚਰਣਗੇ।

ਉਹਨਾਂ ਦੀ ਭੁੱਖ

ਇਫ਼ਰਾਈਮ ਅਤੇ ਗਿਲਆਦ ਦੀਆਂ ਪਹਾੜੀਆਂ ਉੱਤੇ ਪੂਰੀ ਹੋਵੇਗੀ।

20 ਉਹਨਾਂ ਦਿਨਾਂ ਵਿੱਚ," ਯਾਹਵੇਹ ਦਾ ਵਾਕ ਹੈ,

"ਇਸਰਾਏਲ ਦੇ ਦੋਸ਼ਾਂ ਦੀ ਖੋਜ ਕੀਤੀ ਜਾਵੇਗੀ,

ਪਰ ਕੋਈ ਨਹੀਂ ਹੋਵੇਗਾ,

ਅਤੇ ਯਹੂਦਾਹ ਦੇ ਪਾਪਾਂ ਲਈ,

ਪਰ ਕੋਈ ਨਹੀਂ ਲੱਭ ਲਿਆ ਜਾਵੇਗਾ,

ਕਿਉਂਕਿ ਮੈਂ ਬਕੀਏ ਨੂੰ ਮਾਫ਼ ਕਰ ਦਿਆਂਗਾ।

21 "ਮੇਰਾਥੈਮ ਦੀ ਧਰਤੀ ਉੱਤੇ

ਜੋ ਅਤੇ ਪਕੌਦ ਵਿੱਚ ਰਹਿਣ ਵਾਲੇ ਲੋਕਾਂ ਉੱਤੇ ਹਮਲਾ ਕਰ।

ਉਹਨਾਂ ਦਾ ਪਿੱਛਾ ਕਰ, ਉਹਨਾਂ ਨੂੰ ਮਾਰ ਅਤੇ ਪੂਰੀ ਤਰ੍ਹਾਂ ਤਬਾਹ ਕਰ,"

ਯਾਹਵੇਹ ਦਾ ਵਾਕ ਹੈ।

"ਉਹ ਸਭ ਕੁਝ ਕਰੋ ਜਿਸਦਾ ਮੈਂ ਤੁਹਾਨੂੰ ਹੁਕਮ ਦਿੱਤਾ ਹੈ।

22 ਲੜਾਈ ਦਾ ਰੌਲਾ ਧਰਤੀ ਵਿੱਚ ਹੈ,

ਵੱਡੀ ਤਬਾਹੀ ਦਾ ਰੌਲਾ!

23 ਸਾਰੀ ਧਰਤੀ ਦਾ ਹਥੌੜਾ ਕਿਵੇਂ ਟੁੱਟਿਆ

ਅਤੇ ਚਕਨਾਚੂਰ ਹੈ!

ਕੌਮਾਂ ਵਿੱਚ ਬਾਬੇਲ ਕਿੰਨਾ ਵਿਰਾਨ ਹੈ!

24 ਹੇ ਬਾਬੇਲ, ਮੈਂ ਤੇਰੇ ਲਈ ਇੱਕ ਜਾਲ ਵਿਛਾਇਆ ਹੈ,

ਅਤੇ ਤੈਨੂੰ ਪਤਾ ਲੱਗਣ ਤੋਂ ਪਹਿਲਾਂ ਹੀ ਫੜ ਲਿਆ ਗਿਆ ਸੀ।

ਤੈਨੂੰ ਭਾਲਿਆ ਅਤੇ ਫੜ ਲਿਆ ਗਿਆ

ਕਿਉਂਕਿ ਤੁਸੀਂ ਯਾਹਵੇਹ ਦਾ ਵਿਰੋਧ ਕੀਤਾ ਸੀ।

25 ਯਾਹਵੇਹ ਨੇ ਆਪਣਾ ਅਸਲਾ ਖੋਲ੍ਹਿਆ ਹੈ

ਅਤੇ ਆਪਣੇ ਕ੍ਰੋਧ ਦੇ ਹਥਿਆਰਾਂ ਨੂੰ ਬਾਹਰ ਲਿਆਇਆ ਹੈ,

ਕਿਉਂ ਜੋ ਸਰਬਸ਼ਕਤੀਮਾਨ ਯਾਹਵੇਹ ਨੇ,

ਕਸਦੀਆਂ ਦੀ ਧਰਤੀ ਉੱਤੇ ਇੱਕ ਕੰਮ ਕਰਨਾ ਹੈ।

26 ਦੂਰੋਂ ਉਸਦੇ ਵਿਰੁੱਧ ਆਓ।

ਉਸ ਦੇ ਅਨਾਜ ਭੰਡਾਰਾਂ ਨੂੰ ਤੋੜੋ;

ਉਸ ਨੂੰ ਅਨਾਜ ਦੇ ਢੇਰਾਂ ਵਾਂਗ ਢੇਰ ਕਰ ਦਿਓ।

ਉਸ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰ ਦਿਓ

ਉਸ ਦਾ ਕੁਝ ਬਾਕੀ ਨਾ ਰਹੇ।

27 ਉਸਦੇ ਸਾਰੇ ਜਵਾਨ ਬਲਦਾਂ ਨੂੰ ਮਾਰ ਦਿਓ;

ਉਹਨਾਂ ਨੂੰ ਕਤਲ ਕਰਨ ਲਈ ਹੇਠਾਂ ਜਾਣ ਦਿਓ!

ਉਹਨਾਂ ਉੱਤੇ ਹਾਏ! ਕਿਉਂਕਿ ਉਹਨਾਂ ਦਾ ਦਿਨ ਆ ਗਿਆ ਹੈ,

ਉਹਨਾਂ ਲਈ ਸਜ਼ਾ ਦਾ ਸਮਾਂ ਆ ਗਿਆ ਹੈ।

28 ਬਾਬੇਲ ਦੇ ਦੇਸ ਵਿੱਚੋਂ ਨੱਠਣ ਵਾਲਿਆਂ ਅਤੇ ਬਚਣ ਵਾਲਿਆਂ ਦੀ ਆਵਾਜ਼ ਸੁਣੋ

ਸੀਯੋਨ ਵਿੱਚ ਯਾਹਵੇਹ ਦੀ ਘੋਸਣਾ

ਅਤੇ ਸਾਡੇ ਪਰਮੇਸ਼ਵਰ ਦਾ ਬਦਲਾ,

ਉਸ ਦੀ ਹੈਕਲ ਦਾ ਬਦਲਾ ਦੱਸਣ।

29 "ਬਾਬੇਲ ਦੇ ਵਿਰੁੱਧ ਤੀਰ ਅੰਦਾਜ਼ਾ ਨੂੰ ਬੁਲਾਓ,

ਉਹਨਾਂ ਸਾਰਿਆਂ ਨੂੰ ਜੋ ਧਨੁਸ਼ ਖਿੱਚਦੇ ਹਨ।

ਉਸਦੇ ਚਾਰੇ ਪਾਸੇ ਡੇਰੇ ਲਗਾਓ;

ਕਿਸੇ ਨੂੰ ਬਚਣ ਨਾ ਦਿਓ।

ਉਸਨੂੰ ਉਸਦੇ ਕੰਮਾਂ ਦਾ ਬਦਲਾ ਦਿਓ;

ਉਸ ਨਾਲ ਉਸੇ ਤਰ੍ਹਾਂ ਕਰੋ ਜਿਵੇਂ ਉਸਨੇ ਕੀਤਾ ਹੈ।

ਕਿਉਂ ਜੋ ਉਸ ਨੇ ਇਸਰਾਏਲ ਦੇ ਪਵਿੱਤਰ ਪੁਰਖ

ਯਾਹਵੇਹ ਦੀ ਨਿੰਦਿਆ ਕੀਤੀ ਹੈ।

30 ਇਸ ਲਈ, ਉਸਦੇ ਨੌਜਵਾਨ ਗਲੀਆਂ ਵਿੱਚ ਡਿੱਗਣਗੇ;

ਅਤੇ ਉਸ ਦੇ ਸਾਰੇ ਯੋਧੇ ਉਸ ਦਿਨ ਨਾਸ ਹੋ ਜਾਣਗੇ,"

ਯਾਹਵੇਹ ਦਾ ਵਾਕ ਹੈ

31 "ਵੇਖੋ, ਹੇ ਹੰਕਾਰੀ, ਮੈਂ ਤੇਰੇ ਵਿਰੁੱਧ ਹਾਂ,"

ਯਾਹਵੇਹ ਸਰਵਸ਼ਕਤੀਮਾਨ ਦਾ ਵਾਕ ਹੈ,

"ਤੇਰਾ ਦਿਨ ਆ ਗਿਆ ਹੈ,

ਤੇਰੇ ਲਈ ਸਜ਼ਾ ਦਾ ਸਮਾਂ ਆ ਗਿਆ ਹੈ।

32 ਹੰਕਾਰੀ ਠੋਕਰ ਖਾਵੇਗਾ ਅਤੇ ਡਿੱਗ ਪਵੇਗਾ

ਅਤੇ ਕੋਈ ਵੀ ਉਸਦੀ ਸਹਾਇਤਾ ਨਹੀਂ ਕਰੇਗਾ;

ਮੈਂ ਉਸ ਦੇ ਨਗਰਾਂ ਵਿੱਚ ਅੱਗ ਲਾਵਾਗਾ

ਜੋ ਉਸ ਦੇ ਆਲੇ-ਦੁਆਲੇ ਦੇ ਸਾਰੇ ਲੋਕਾਂ ਨੂੰ ਭਸਮ ਕਰ ਦੇਵੇਗੀ।"

33 ਸਰਬਸ਼ਕਤੀਮਾਨ ਯਾਹਵੇਹ ਇਸ ਤਰ੍ਹਾਂ ਆਖਦਾ ਹੈ:

"ਇਸਰਾਏਲ ਦੇ ਲੋਕ ਸਤਾਏ ਗਏ ਹਨ,

ਅਤੇ ਯਹੂਦਾਹ ਦੇ ਲੋਕ ਵੀ।

ਉਹਨਾਂ ਦੇ ਸਾਰੇ ਕੈਦੀਆਂ ਨੇ ਉਹਨਾਂ ਨੂੰ ਫੜ ਲਿਆ,

ਉਹਨਾਂ ਨੂੰ ਜਾਣ ਦੇਣ ਤੋਂ ਇਨਕਾਰ ਕਰ ਦਿੱਤਾ।

34 ਉਹਨਾਂ ਦਾ ਛੁਟਕਾਰਾ ਦੇਣ ਵਾਲਾ ਤਕੜਾ ਹੈ,

ਸਰਬਸ਼ਕਤੀਮਾਨ ਯਾਹਵੇਹ ਉਸ ਦਾ ਨਾਮ ਹੈ।

ਉਹ ਜ਼ੋਰ ਨਾਲ ਉਹਨਾਂ ਦੇ ਹੱਕ ਦੀ ਰੱਖਿਆ ਕਰੇਗਾ

ਤਾਂ ਜੋ ਉਹ ਉਹਨਾਂ ਦੇ ਦੇਸ਼ ਵਿੱਚ ਅਰਾਮ ਲਿਆਵੇ,

ਪਰ ਬਾਬੇਲ ਵਿੱਚ ਰਹਿਣ ਵਾਲਿਆਂ ਲਈ ਅਸ਼ਾਂਤੀ ਲਿਆਵੇ।

35 "ਕਸਦੀਆਂ ਦੇ ਵਿਰੁੱਧ ਇੱਕ ਤਲਵਾਰ!"

ਯਾਹਵੇਹ ਇਹ ਆਖਦਾ ਹੈ

"ਬਾਬੇਲ ਵਿੱਚ ਰਹਿਣ ਵਾਲਿਆਂ ਦੇ ਵਿਰੁੱਧ ਵੀ

ਅਤੇ ਉਸਦੇ ਅਧਿਕਾਰੀਆਂ ਅਤੇ ਬੁੱਧਵਾਨਾਂ ਦੇ ਵਿਰੁੱਧ ਘੋਸ਼ਣਾ ਕਰਦਾ ਹੈ!

36 ਉਸਦੇ ਝੂਠੇ ਨਬੀਆਂ ਦੇ ਵਿਰੁੱਧ ਇੱਕ ਤਲਵਾਰ!

ਉਹ ਮੂਰਖ ਬਣ ਜਾਣਗੇ।

ਉਸ ਦੇ ਯੋਧਿਆਂ ਦੇ ਵਿਰੁੱਧ ਤਲਵਾਰ!

ਉਹ ਦਹਿਸ਼ਤ ਨਾਲ ਭਰ ਜਾਣਗੇ।

37 ਉਹ ਦੇ ਘੋੜਿਆਂ ਅਤੇ ਰਥਾਂ ਉੱਤੇ

ਅਤੇ ਉਹ ਦੇ ਸਮੂਹ ਪਰਦੇਸੀਆਂ ਉੱਤੇ ਤਲਵਾਰ!

ਉਹ ਕਮਜ਼ੋਰ ਹੋ ਜਾਣਗੇ।

ਉਸ ਦੇ ਖ਼ਜ਼ਾਨਿਆਂ ਉੱਤੇ ਤਲਵਾਰ!

ਉਹ ਲੁੱਟੇ ਜਾਣਗੇ।

38 ਉਸ ਦੇ ਪਾਣੀਆਂ ਤੇ ਸੋਕਾ!

ਅਤੇ ਉਹ ਸੁੱਕ ਜਾਣਗੇ।

ਕਿਉਂਕਿ ਇਹ ਮੂਰਤੀਆਂ ਦਾ ਦੇਸ਼ ਹੈ,

ਮੂਰਤੀਆਂ ਜੋ ਦਹਿਸ਼ਤ ਨਾਲ ਪਾਗਲ ਹੋ ਜਾਣਗੀਆਂ।

39 "ਇਸ ਲਈ ਜੰਗਲੀ ਜਾਨਵਰ ਅਤੇ ਗਿੱਦੜ ਉੱਥੇ ਵੱਸਣਗੇ

ਅਤੇ ਸ਼ੁਤਰਮੁਰਗ ਉਸ ਦੇ ਵਿੱਚ ਵੱਸੋਂ ਕਰਨਗੇ,

ਉਹ ਸਦਾ ਤੱਕ ਫਿਰ ਨਾ ਵਸਾਇਆ ਜਾਵੇਗਾ

ਅਤੇ ਪੀੜ੍ਹੀਓ ਪੀੜ੍ਹੀ ਉਸ ਦੇ ਵਿੱਚ ਕੋਈ ਨਾ ਵੱਸੇਗਾ।

40 ਜਿਵੇਂ ਕਿ ਮੈਂ ਸੋਦੋਮ ਅਤੇ ਗਾਮੂਰਾਹ ਨੂੰ ਉਹਨਾਂ ਦੇ ਗੁਆਂਢੀ ਕਸਬਿਆਂ ਸਮੇਤ ਉਖਾੜ ਸੁੱਟਿਆ ਸੀ,"

ਯਾਹਵੇਹ ਦਾ ਵਾਕ ਹੈ,

"ਇਸ ਲਈ ਉੱਥੇ ਕੋਈ ਨਹੀਂ ਰਹੇਗਾ;

ਕੋਈ ਵੀ ਲੋਕ ਉਸ ਵਿੱਚ ਨਹੀਂ ਵੱਸਣਗੇ।

41 "ਦੇਖੋ! ਉੱਤਰ ਤੋਂ ਫ਼ੌਜ ਆ ਰਹੀ ਹੈ;

ਇੱਕ ਮਹਾਨ ਕੌਮ ਅਤੇ ਬਹੁਤ ਸਾਰੇ ਰਾਜੇ

ਧਰਤੀ ਦੇ ਸਿਰੇ ਤੋਂ ਭੜਕਾਏ ਜਾ ਰਹੇ ਹਨ।

42 ਉਹਨਾਂ ਨੇ ਕਮਾਨ ਅਤੇ ਬਰਛੇ ਨਾਲ ਫੜੇ ਹਨ;

ਉਹ ਬੇਰਹਿਮ ਅਤੇ ਜ਼ਾਲਮ ਹਨ।

ਉਹ ਆਪਣੇ ਘੋੜਿਆਂ ਤੇ ਸਵਾਰ ਹੁੰਦੇ ਹੋਏ

ਗਰਜਦੇ ਸਮੁੰਦਰ ਵਾਂਗ ਆਵਾਜ਼ਾਂ ਮਾਰਦੇ ਹਨ।

ਉਹ ਲੜਾਕਿਆਂ ਵਾਂਗ ਲੜਦੇ ਹਨ

ਹੇ ਬਾਬੇਲ ਦੀਏ ਧੀਏ ਤੇਰੇ ਵਿਰੁੱਧ ਆਉਂਦੇ ਹਨ।

43 ਬਾਬੇਲ ਦੇ ਰਾਜੇ ਨੇ ਉਹਨਾਂ ਬਾਰੇ ਖਬਰਾਂ ਸੁਣੀਆਂ ਹਨ,

ਅਤੇ ਉਹ ਦੇ ਹੱਥ ਲੰਗੜੇ ਹੋਏ ਹਨ।

ਦੁੱਖ ਨੇ ਉਸ ਨੂੰ ਜਕੜ ਲਿਆ ਹੈ,

ਜਣੇਪੇ ਵਾਲੀ ਔਰਤ ਵਰਗਾ ਦਰਦ।

44 ਜਿਵੇਂ ਇੱਕ ਸ਼ੇਰ ਯਰਦਨ ਦੀਆਂ ਝਾੜੀਆਂ ਵਿੱਚੋਂ

ਇੱਕ ਪੱਕੇ ਵਸੇਬੇ ਵੱਲ ਆਉਂਦਾ ਹੈ,

ਮੈਂ ਇੱਕ ਪਲ ਵਿੱਚ ਬਾਬੇਲ ਦਾ ਉਸ ਦੀ ਧਰਤੀ ਤੋਂ ਭਜਾ ਦਿਆਂਗਾ।

ਕਿਸਨੂੰ ਚੁਣਿਆ ਹੋਇਆ ਹੈ ਜਿਸਨੂੰ ਮੈਂ ਇਸ ਲਈ ਨਿਯੁਕਤ ਕਰਾਂਗਾ?

ਮੇਰੇ ਵਰਗਾ ਕੌਣ ਹੈ ਅਤੇ ਕੌਣ ਮੈਨੂੰ ਵੰਗਾਰ ਸਕਦਾ ਹੈ?

ਅਤੇ ਕਿਹੜਾ ਆਜੜੀ ਮੇਰੇ ਵਿਰੁੱਧ ਖੜਾ ਹੋ ਸਕਦਾ ਹੈ?"

45 ਇਸ ਲਈ, ਸੁਣੋ ਕਿ ਯਾਹਵੇਹ ਨੇ ਬਾਬੇਲ ਦੇ ਵਿਰੁੱਧ ਕੀ ਸਾਜਿਸ਼ ਬਣਾਈ ਹੈ,

ਉਸ ਨੇ ਕਸਦੀਆਂ ਦੀ ਧਰਤੀ ਦੇ ਵਿਰੁੱਧ ਕੀ ਸਾਜਿਸ਼ ਬਣਾਈ ਹੈ:

ਇੱਜੜ ਦੇ ਬੱਚੇ ਨੂੰ ਘਸੀਟਿਆ ਜਾਵੇਗਾ;

ਉਹਨਾਂ ਦੀ ਚਰਾਗਾਹ ਉਹਨਾਂ ਦੀ ਕਿਸਮਤ ਉੱਤੇ ਘਬਰਾ ਜਾਵੇਗੀ।

46 ਬਾਬੇਲ ਦੇ ਕਬਜ਼ੇ ਦੀ ਆਵਾਜ਼ ਨਾਲ ਧਰਤੀ ਕੰਬ ਜਾਵੇਗੀ;

ਉਹ ਦੀ ਦੁਹਾਈ ਕੌਮਾਂ ਵਿੱਚ ਗੂੰਜੇਗੀ।