1 Oo Neneene Tsɛ, o kpa ye tsui mi kulaa nɛ o na bɔ nɛ i ngɛ ha. 2 O le ye si himi kɛ ye si temi, nɛ o le ye susumihi tsuo kɛ je lokoo. 3 O le ye blɔ ɔmɛ, nɛ o tsɔɔ mi he nɛ ma wa nɛ ma jɔɔ ye he ngɛ. Be fɛɛ be ɔ, o le he nɛ i ngɛ. 4 O le nɔ́ nɛ i ngɛ hlae nɛ ma de momo loko ji i deɔ. 5 O ngɛ ye hɛ mi, nɛ o ngɛ ye se hulɔ, nɛ o jɔɔmi nine ɔ ngɛ ye nɔ.

6 Enɛ ɔ ji anunyami kɛ nyakpɛ nɔ ko nɛ ye juɛmi sui he. 7 Jije i ma je o Mumi ɔ he kɛ ya, nɛ jije i ma tu fo kɛ je o hɛ mi kɛ ya? 8 Ke i kuɔ kɛ ho hiɔwe ya a, o ngɛ lejɛ ɔ! Nɛ ke i ho gbeje ya hu o ngɛ lejɛ ɔ. 9 Ke i puɛ pɛli nɛ i te kɛ ho wo se lokoo ya aloo kɛ ho pu sinɔ he tsitsaa ya a, 10 lejɛ ɔ tete po ɔ, o nine ma kpaka mi, nɛ o hiɔ nine maa pɛtɛ ye mi. 11 Ke i ke ma laa ye he ngɛ diblii mi ɔ, diblii ɔ tete plɛɔ la kɛ bɔleɔ mi. 12 Diblii be nyɛe maa laa e he ngɛ mo Tsaatsɛ Mawu o hɛ mi; diblii ɔ kpɛɔ kaa la kɛ ha mo, ejakaa diblii kɛ la sɔ ngɛ o hɛ mi.

13 Ejakaa mo nɛ o bɔ ye mi níhi tsuo; mo nɛ o bɔ mi ngɛ ye nyɛ muklii mi. 14 I ngɛ o yi jee, ejakaa o bɔ mi ngɛ gbeye kɛ nyakpɛ blɔ nɔ. O ni tsumi ɔmɛ ngɛ nyakpɛ. I le enɛ ɔ saminya. 15 O ngɛ lejɛ ɔ be mi nɛ a ngɛ mi bɔe ngɛ laami mi ɔ. 16 O hɛ ngmɛ na mi be mi nɛ a bɔɛ mi gbi nya tete po; nɛ o to ye wami Ligbi ɔmɛ kulaa a he blɔ nya momo loko ji i bɔni mumi womi. A ngma ye ligbi ɔmɛ eko fɛɛ eko ngɛ o Womi ɔ mi.

17 Oo Tsaatsɛ Mawu, hyɛ bɔ nɛ e ngɔɔ ye nya ha kaa o susuu ye he be fɛɛ be! Ye he susumi ɔ hiɛ fuu bɔ nɛ i li nya. 18 Ke i ke ma kane mɛ ɔ, a he maa hiɛ pe wo nya kewu. Ke i hwɔ si nɛ ye he tsiɛ ɔ, o ngɛ ye he susue kɛ sa.

19 Neneene Tsɛ, mo kpata dikali ɔmɛ a hɛ mi, nɛ o ha nɛ muɔ si pueli ɔmɛ a ya se ngɛ ye he. 20 A tuɔ musu bɔmi munyu kɛ siɔ mo, nɛ a bui mo. 21 Oo Tsaatsɛ Mawu, anɛ e sɛ nɛ ma nyɛ ni nɛmɛ nɛ nyɛɛ mo ɔ? Nɛ e sɛ nɛ ni nɛmɛ nɛ tee si kɛ siɔ mo ɔ a he tai peeɔ mi lo? 22 I nyɛɛ mɛ saminya, ejakaa nihi nɛ a ji o he nyɛli ɔ, a peeɔ ami hu ye he nyɛli.

23 Oo Neneene Tsɛ, moo kpa ye mi nɛ o le ye tsui mi; moo ka mi hyɛ ha nɛ o le ye susumi ɔmɛ. 24 Nɛ o hyɛ ha kaa nɔ yayami ko ngɛ ye mi lo, nɛ o kpaka mi kɛ nyɛɛ neneene wami blɔ ɔ nɔ.