1 Mawu kɛ mo nɛ hi si ngɛ o haomi be mi. Yakob Mawu ɔ nɛ je mo kɛ je matahu mi. 2 E je e he klɔuklɔu ɔ ngɛ Zion nɛ e ye kɛ bua mo. 3 Mawu nɛ kai o nike ni ɔmɛ kɛ afɔle ɔmɛ nɛ o saa kɛ haa lɛ ɔ nɛ e bua nɛ jɔ a he. 4 E ha mo níhi nɛ o tsui suɔ ɔmɛ, nɛ e ha nɛ o yi mi tomi ɔmɛ a ba mi. 5 Wa ma hwɔ lele kɛ bua jɔmi kɛ nya o kunimi yemi ɔ he, nɛ wa je Mawu yi ngɛ nɔ́ nɛ e pee ha mo ɔ he. Mawu nɛ ha o bimi ni ɔmɛ kulaa heto.

6 "Mawu nɛ baa Matsɛ ɔ yi," nɛ i le kaa e peeɔ. E buɔ mi tue kɛ jee hiɔwe lokoo, nɛ e haa nɛ i yeɔ kunimi agbohi. 7 Ma komɛ fĩaa kɛ fɔɔ a sojahi kɛ ta hwumi níhi a nɔ, se wɔɔ lɛɛ wa Tsɛ Mawu ɔ nɔ kɛkɛ wa fĩaa kɛ toɔ. 8 Jamɛ a ma amɛ a yi maa hɛ si nɛ a hɛ mi ma kpata, se wɔɔ lɛɛ wa nine maa ya hiɔ mi daa nɛ wa maa da wa da he.

9 Oo Nutsɔ, mo ha wa matsɛ ɔ kunimi yemi. Tsaatsɛ, moo nu wa pɛɛ kpami ɔ.