1 Tsaatsɛ Mawu, moo na mi mɔbɔ. Moo ngɔ ye tɔmi ɔmɛ kɛ ke mi ngɛ o suɔmi kɛ mi mi jɔmi babauu ɔ he. 2 Mo fɔ ye he yayami ɔmɛ nɛ ye he nɛ je falefale. 3 Ejakaa i le ye yayami ɔmɛ, a ngɛ ye hɛ mi daa. 4 Mo kɛkɛ o nɔ nɛ i tɔ, nɛ i pee nɔ nɛ dɛ ngɛ o hɛ mi. O na kulaa nɛ ye tue gblami ɔ sa mi. Piami ko be o kojomi ɔ he. 5 A ngɔ ye hɔ ngɛ yayami mi, nɛ yayami mi nɔuu a fɔ mi ngɛ. 6 O suɔ anɔkuale nɛ je tsui klɔuu mi, mo ha mi anɔkuale nɛ ɔ he nile ɔ eko.

7 Mo fɔ ye he yayami ɔmɛ, nɛ ye he maa je ekohu. Moo du ye he ha mi, nɛ i ma hiɔ futafuta pe klala. 8 Nɛ ke o gbla ye tue se ɔ, mo ha nɛ ma na bua jɔmi ekohu. 9 Moo ku hɛ ngɔ fɔ ye yayami ɔmɛ a nɔ nɛ o ngɔ ye tɔmi ɔmɛ kulaa kɛ ke mi. 10 Oo Mawu, moo bɔ tsui nɛ hi kɛ ha mi, tsui nɛ hyi fɔ kɛ susumi kpakpa kɛ níhi nɛ sa. 11 Mo ko fie mi kɛ je o hɛ mi, nɛ mo ko je o Mumi Klɔuklɔu ɔ ngɛ ye mi. 12 Mo ha nɛ ma na o yi wami hemi ɔ mi bua jɔmi ɔ ekohu, nɛ o ha ma bu mo tue. 13 Nɛ i ma tsɔɔ yayami peeli kpa amɛ o blɔ ɔmɛ nɛ a tsake a tsui, nɛ a kpale kɛ ba o ngɔ. 14 Mo ko bu mi gbenɔ fɔ. Oo, ye Mawu, mo pɛ o ma nyɛ ye yi wami ma he. I ma la wawɛɛ kɛ je o yi ngɛ ye yi wami hemi ɔ he. 15 Oo Tsaatsɛ Mawu, mo ha mi nya, nɛ i ma la kɛ je o yi.

16 O nya we bɔ sami he, lɔ ɔ he je ɔ, ke i sã bɔ ha mo tete po e be o hɛ muɔe. 17 He piami kɛ tsui tsakemi ji nɔ́ nɛ jɔɔ o bua. Oo, Neneene Tsɛ, o kua we nɔ nɛ pia e he ngɛ e tɔmi he ɔ.

18 Moo na Zion mɔbɔ nɛ o pee lɛ kpakpa ngɛ o dloomi ɔ he, nɛ o kpale fia Yerusalem gbogbo ɔmɛ.

19 Ke ye tsui mi tɛ ɔ, o bua maa jɔ kpakpa nɛ i ma pee ɔ he; nɛ ke i sã bɔ kɛ na kuhi ngɛ o bɔ sami la tɛ ɔ nɔ ɔ, o ma na he bua jɔmi.