1 Oo Tsaatsɛ Mawu, mɛni ba nɛ o ngmɛɛ wa he kulaa kikɛ ɔ? Mɛni ba nɛ o muklii mi fu wɔ kikɛ ɔ, wɔ nɛ ji mo nitsɛ o bimɛ ɔ? 2 Mo kai kaa mo nitsɛ o nimli ji wɔ, nihi nɛ o hla kɛ je blema, nɛ o je kɛ je nyɔguɛ yemi mi, nɛ o ngɔ kɛ pee o suɔmi bimɛ. O ngɔ Yerusalem kɛ pee o we ngɛ zugba a nɔ.

3 Moo nyɛɛ ma a e we doku ɔmɛ a mi nɛ o hyɛ bɔ nɛ he nyɛlɔ ɔ pee o sihi he klɔuklɔu ɔ ha. 4 Lejɛ ɔ nɛ a gba ta ngɛ, nɛ a ma a wɔ ɔmɛ ngɛ nɛ a kɛ tsɔɔ a kunimi yemi. 5 Nɔ́ fɛɛ nɔ gbɛ yukuyuku kaa hue nɛ a sa kɛ pue si. 6 A ba kɛ a lema kɛ hama amɛ nɛ a ba ywia sinya amɛ, 7 nɛ a sa o sihi he klɔuklɔu ɔ dukuduku kɛ la. 8 Nɛ a de a he ke, "Nyɛ ha nɛ waa gbe Mawu biɛ kulaa." Kɛkɛ nɛ a sɛ ma a mi nɛ a bɔni kpe he ɔmɛ, he nɛ wa sɔmɔɔ mo ngɛ ɔ sami.

9 Nɔ́ ko kulaa be hu nɛ tsɔɔ kaa o we bi ji wɔ, O gbali ɔmɛ ta, nɛ nɔ ko li be mi nɛ kulaa nya ma ta. 10 Oo Tsaatsɛ Mawu, kɛ ya si mɛni be nɛ o ma ha he blɔ nɛ wa he nyɛli ɔmɛ ma pue o biɛ ɔ hɛ mi si. Anɛ o ma ha he blɔ nɛ a ye a he kɛ ya nyagbe lo? 11 Mɛni ba nɛ o ngɛ se kpɛe? Mɛni ba nɛ o tsi o he wami ɔ nya? Moo fɔ o kɔni nɛ o fia mɛ nyagbe kɔ.

12 Mawu ji ye Matsɛ kɛ je blema; o yeɔ kɛ buaa mi ngɛ he fɛɛ he. 13 O gba Wo Tsutsu ɔ mi kɛ o he wami, nɛ o ywia wo wɔ ɔ e yi ɔmɛ. 14 O ngɔ lɛ kɛ ha nihi nɛ po ma ngɛ nga nɔ ɔ nɛ a ye. 15 Ngɛ o fami nya a, nyu sú kɛ je zu mi ha o nimli ɔmɛ nɛ a nu; nɛ jehanɛ ɔ, o je blɔ kɛ gu Yordan Pa a mi ha mɛ nɛ a nyɛɛ nɔ. 16 Nyɔ kɛ pia kulaa o nɔ́ i. Mo nɛ o bɔ dodoe kɛ pu. 17 Adebɔ kulaa ngɛ o dɛ mi. Mo nɛ o bɔ gbo kɛ gbiɛ hulɔ. 18 Tsaatsɛ Mawu, moo hyɛ bɔ nɛ he nyɛli nɛ ɔmɛ ngɛ o he fɛu yee ha. Oo Yehowa, he nɔ woli ngɛ o biɛ ɔ musu bɔe.

19 Oo Tsaatsɛ Mawu, mo kpɔ mi. Moo bu o lahuɛ ɔ he kɛ je lohwe awi yeli ɔmɛ a dɛ mi. Mo he o nimli ɔmɛ a yi wami kɛ je lohwe nɛ ɔmɛ a dɛ. 20 Mo kai o si womi ɔ. Ejakaa zugba a nɔ wo diblii, nɛ e hyi tɔ kɛ nimli yi mi wali. 21 Oo Tsaatsɛ Mawu, ko ha nɛ o nimli ɔmɛ nɛ a ngɛ a nɔ yee ɔ, a hɛ mi nɛ pue si. Moo ye kɛ bua ohiafohi kɛ nihi nɛ e fi mɛ ɔ, nɛ a je o yi. 22 Oo Tsaatsɛ Mawu, moo te si nɛ o kɛ wa he nyɛli ɔmɛ nɛ kpe. Mo kai jɛmi nɛ atuã tsɔli nɛ ɔmɛ jɛ mo kɛ je mɔtu kɛ ya si gbɔkuɛ ɔ. 23 Koo ku o tue kɛ fɔ gbiɛmi nɛ o he nyɛli ɔmɛ ngɛ mo gbiɛe ɔ nɔ. A ngɛ ngmlaa kpae wawɛɛ be fɛɛ be.