Gênesis 37

यूसूफ को सपना गिनला चोवना

1 याकूब कनान देस मा रव्हत होतो, जहान वोको अजी परदेस लक आय के रव्हत होतो। 2 यो याकूब को परीवार को किस्सा से, यूसूफ सतरा साल को भयो, उ आपरो भाऊ गिनको संग सेरी-मेंढी को हेड़ चरात होतो, उ अबा पूरो जवान नही भयो होतो। उ आपरो अजी को दुसरो बायको बिल्हा अखीन जिल्पा को टूरा गिनको संग रव्हत होतो। उ आपरो भाऊ गिनको बुरो गोस्टी को खबर आपरो अजी को जवर आनत होतो। 3 इसराइल*37:3मूल मा इसराइल से आपरो सप्पा टूरा गिनलक जादा यूसूफ लक पिरेम करत होतो। काहेका उ वोको बुड़गापन को टूरा होतो। वोना वोको लाय एक बाही वालो जामा सिलवा दियो होतो। 4 जब वोको अवर भाऊ हुन ना चोवयो का सप्पा भाऊ गिनलक जादा पिरेम उनको अजी यूसूफ लक करासेत ता वय वोको लक बइर करन लगीन अखीन साजरो बरताव भी नही करत होतिन अना साजरो लक बोलत भी नही होतिन। 5 एक बार यूसूफ ना एक सपना चोवयो अना आपरो भाऊ गिनला सागंयो, तबा लक अखीन जास्ती जलन करन लगीन।✝37:5 मत्ती 1:20 6 यूसूफ ना आपरो भाऊ हुन लक कह्यो मी ना जोन सपना चोयो सेऊ वोला आयको , 7 अपन सबा लोक आपरो आवरी मा बोझा बान्धत होतो अना मी चोवयो का मोरो बोझा सरको उभो भयी गयो। तबा तुमरो बोझा ना मोरो बोझा ला आखा-पाखा लक घेर लियो अना परनाम करन लगीन । 8 तबा वोको भाऊ हुन ना वोला कहीन का तू सहीमा आमरो पर राज करजोस? एको लाय वय वोको सपना को कारन अखिन जास्ती बइर करन लगीन। 9 मंग वोना एक अखीन सपना चोयो, अखिन वोला भी आपरो भाऊ गिनला सांगयो, आयको, मी ना एक अखीन सपना चोयो सेऊ, का दिन चन्दा अखिन अकरा तारा नवके मोला परनाम करासेत। 10 असो आयक के वोको अजी ना वोला कह्यो, यो कसो सपना तूना चोवयो सेत? का सही मा मी अखिन तोरो माय अखिन भाऊ सप्पा तोरो पूढा उभो होयके अना भूई मा पड़ के तोला परनाम करबीन। 11 वोको भाऊ गिन वोको लक इरसा करत होतिन पर वोको अजी यो गोस्टी ला हेत राखीस।✝37:11 पेरीत 7:9

यूसूफ ला बीकनो अना मीसर ले जावनो

12 एक बेरा यूसूफ को भाऊ आपरो अजी को मेढा सेरी को हेड़ चरान को लाय सेकेम नगर मा गयीन। 13 इसराइल ना यूसूफ ला कह्यो, "तोरो भाऊ सेकेम नगर को बर्रा मा मेढा सेरी चरा रहयो सेत। आव मी तोला उनको जवर धाड़ासू।" वोना आपरो अजी लक कह्यो, मी तैय्यार सेऊ! 14 उ युसूफ लक कह्यो, जाय के चोव तोरो भाऊ अना मेढा सेरी को हेड़ साजरो से का नही, उनको खबर मोरो जवर आन। तबा इसराइल ना वोला हेबरोन को घाट तकन सार कर दियो अखीन वा सेकेम नगर गयो। 15 अना बर्रा मा यूसूफ ला चोव के एक मानूस ना कह्यो , तू काजक तपास सेव गा? 16 तबा यूसूफ ना वोला कह्यो, मी आपरो भाऊ हुन अना आमरो सेरी मेढा ला चोवासू, अदि तोला मालूम से ता मोला सांग वय कहान सेत? 17 वोना मानूस ना कह्यो मीना उनला असो गोस्टी करतो आयकयो का अमीला दोतान नगर जावनो से। असो आयक के यूसूफ दोतान गयो। अना वहान वोको भाऊ हुन ला दूहूर लक चोयो, 18 तबा ओको भाऊ हुन दूहूर लक वोला आपरो जवर आवतो चोय के वोला मार डाकन को साजीस करन लगीन। 19 उन ना एकमेक लक कव्हन लगीन, चोवो ओ आवासे सपना चोवन वालो! 20 अबा आव अमी वोला मारके कोनी खोदरा मा डाक देबीन, अना घरमा सांग बिन का वोला कोनी जगंल को जनावर ना खाय डाकीस। तबा अमी चोवबिन का उ आपरो सपना कसो पूरो करासे? 21 असो आयक के रूबेन वोला बचावन को बिचार लक असो कह्यो, अमी वोको पिरान नही लेबीन, 22 पर मोरो बिचार लक वोला कोनी खोदरा मा डाक देव आपरो हात वोको खून लक नोको रंगाव। रूबेन असो एको लाय कह्यो का यूसूफ ला उनको हात लक बचाय के आपरो अजी को जवर ले जावनो चाहत होतो। 23 जसोच यूसूफ आपरो भाऊ हुन को कठा पहुचयो उन ना वोको कपरा ला उतार लेयीन। 24 अखिन यूसूफ ला उठाय के सूक्को बेहेर मा डाक देयीन। ओना बेहेर मा पानी नही होतो। 25 अना वय जेवन करन बस गयीन। तबा उनना चोयो का इस्माएल गीनको एक दल ऊंट गीनमा सुगन्ध को चीज अना गोन्द, बलसान लदाके गिलाद लक मिसर मा जाय रहयो सेत। 26 तबा यहूदा ना कह्यो अदी अमी वोला मार डाकबीन अना वोको खून ला लूकाबिन ता कोनी फायदा नाहती✝37:26 पैदाइस 4:10। 27 आओ, अमी वोला इस्माएल गिनको हात बीकबिन अना वोको पर हात नही उठाबिन काहेका उ आमरो भाऊ आमरो च खून सेत। तबा वोको भाऊ गिनना वोको गोस्टी ला मान लेयीन। 28 तबा मिद्यानी बैपारी उनको कठा आयीन ता यूसूफ ला बेहेर लक हेड़के ना खूरो को बीस सिक्का मा इस्माएल गिनला बिक देयीन। अना वय वोला मिसर देस ले गयीन। 29 जबा रूबेन बेहेर को कन लवटयो ता यूसूफ ला बेहेर मा नही चोवके आपरो कपरा चीर दियो। 30 अखीन कव्हन लगयो, टूरा बेहेर मा नाहती अता मि कितानी जाऊ? 31 उनना यूसूफ को जामा लेयीन अना वोला एक सेरी मारके वोको खून मा डुबाय देयीन। 32 वोको जामा ला आपरो अजी को कठा धाड़ीन, अना लावन वालो कहीस का चोव यो तोरो टूरा को आय, का नही? 33 अजी ना आपरो टूरा को जामा ला चिन्ह लियो अना कह्यो, यो ता मोरो टूरा को आय। पक्कोच जंगली जनावर ना यूसूफ मार डाकयो से अना खाय के वोको खन्डा-खन्डा कर दियो से। 34 याकूब ना आपरो कपरा चीर दियो अना कम्मर मा बोरा बान्धके, आपरो टूरा को लाय लगत दिवस तकन रड़तो रव्हयो। 35 वोला वोको टूरा-टूरी वोला मनान को कोसीस करयो। पर वोना नही मानयो, अना असो कह्यो का मी आपरो टूरा को जवर कबर मा उतर जाऊ? 36 उतानी मिद्यानी बयपारी गीन ना यूसूफ ला मिसर लिजाके पोतीपोर नावको एक अधिकारी ला बिक देयिन। पोतीपर राजा फराओ को रक्सक गीनको मुखिया होतो।