1 Izi nee mbuli alongazo Yelemia ng'wana wa Hilikia, mng'we wa wavikizi wa mzi wa Anasosi, mwe shi ya Benjamini. 2 Zumbe Mulungu akalonga na Yelemia mwe vui ja muongo mng'we na ntatu ja ugholokezi wa Yosia ng'wana wa Amoni, zumbe wa Yuda. 3 Zumbe Mulungu akalonga naye vingi mwe mishi ya ugholokezi wa Yehoyakimu ng'wana wa Yosia zumbe wa Yuda. Vikibinda, Zumbe Mulungu akahimba kulonga na Yelemia mpaka mwe vui ja muongo mng'we na ng'wenga mwe ugholokezi wa Sedekia ng'wana wa Yosia, zumbe wa Yuda. Uhebula ng'wezi wa shano mwe ijo vui, wantu wa Yelusalemu wakaighawa na mwe shi ya ugheni.

4 Zumbe Mulungu aanighambila kuti, 5 "Naakutaila kuanduka huvyaighwe, nikakushaghuwa uituke mteghanyi wa mbali zoshe."

6 Nee nihemhisa, "Zumbe Mulungu, imi sidaha kulonga, kwa kuti nike mbwanga." 7 Miya Zumbe Mulungu akanighambila, "Usheghambe kuti uke mbwanga, neuite kwa wantu woshe niwekuaghiiza kwawe, na kuwaukuiya mbuli zoshe nizekughambila. 8 Ushezawaogoha awo, kwa kuti imi ni hang'we na iwe nikuambize. Nimiyo Zumbe Mulungu nilongiewo" 9 Nee Zumbe Mulungu akanyoosha mkono, akadoa kanwa changu, akanighamba, "Nizagea mbuli zangu mwe kanwa chako. 10 Lelo nizakunka ufung'wa mwe mbali na zumbe zoshe kunga ung'unte na kugandua, ubane na kukoma, kunga uzenge na kuhanda."

11 Zumbe Mulungu akaniuza kuti, "Yelemia, uona mbwai?"

Nee nihemhisa, "Niona tambi ja mti wa mlonzi jeshuka."

12 Zumbe Mulungu akanighambila, "Uzaona vitana, kwa kuti nami niwelela mbuli yangu kunga ibontoke."

13 Zumbe Mulungu akalonga naimi kambii, "Uona mbwai?"

Nikamhisa, "Niona nyungu yesheuka ifununkukeyo na wazu wa kasikazini."

14 Nee Zumbe Mulungu ahenighambila, "Mabada neyaize kulawiya wazu wa kasikazini, na kuwabuiza wantu wosheni weikala mwe inu shi. 15 Neniwaitange wantu wa mbali zoshe ze wazu wa kasikazini. Wazumbe wawe newaize na kuika viti vyawe vya uzumbe mwe zuvi ja Yelusalemu na kukinya nkando zoshe, na kuitoa mizi yosheni ya Yuda. 16 Neniwalahe wantu wangu kwa mbuli ya uhuza wawe woshe wa wakunieka imi, na kulavya ntogoo kwa mulungu na kuvika vinyago wakighosholeevyo kwa mikono yawe wenyewe. 17 Kwa ivyoho ushe iwe Yelemia, lawa uite ukawaghambile mbuli zoshe nikughambilezo. Ushezawaogoha, ukiwaogoha nenikuitushe muwogha kwawe. 18 Lelo nitakutoghesha sa mzi uzungukwewo ni waghojo, sa mnala wa chuma vingi sa ukando wa shaba, mwe shi yoshe hekuituke na mwekudaha, wazumbe wa Yuda na waambizi wawe, wavikizi wakwe na wantu wakwe woshe. 19 Newatoane na iwe, miya hewakudahe kwa kuti imi ni hang'we na iwe nikuambize. Ni miyo Zumbe Mulungu nilongiewo."