1 Nebukadineza zumbe wa Babeli aamshimika Sedekia ng'wana wa Yosia aituke zumbe wa Yuda, agholokele hantu ha Konia ng'wana wa Yehoyakimu. 2 Miya Sedekia na waambizi wakwe hang'we na wantu wa Yuda hewategheleze mbuli za Zumbe Mulungu alongazo kuzinkia mteghanyi Yelemia.

3 Zumbe Sedekia awaaghiiza Yehukali ng'wana wa Shelemia hang'we na mvikizi Sefania ng'wana wa Maaseya waite kwa mteghanyi Yelemia, wakamuombeze awavikile kwa Zumbe Mulungu, Mulungu wawe. 4 Mishi iyo Yelemia nee akiingila na kulawa kwa wantu kwa kuti nee aishizati kuzughaiwa. 5 Waghojo wa zumbe wa Misii na waghojo wa Wakalidayo ndiwo wakiudenga mzi wa Yelusalemu, waheiva izo mbuli wateghuuka.

6 Nee Zumbe Mulungu ahemghamba Yelemia kuti, 7 "Imi Zumbe Mulungu, Mulungu wa Izilaeli naghamba kuti, zumbe wa Yuda akuaghiizeye kwangu uniuze mbuli ndizo zilawiye umghambe kuti, waghojo wa zumbe wa Misii waizilewo kwekuambiza, wahehi kuuya na kwe shi yawe ya Misii. 8 Wakalidayo newaize vingi kweutoa unu mzi. Newaughue na kuutoa moto. 9 Imi Zumbe Mulungu naghamba kuti, mushekilufye wenye mukighamba kuti, waghojo wa Wakalidayo newauke na hewauye vingi. 10 Hata mukiwadaha waghojo woshe wa Wakalidayo wetoana na inywi, wakashighaa waja wena vionda mwe makumbi yawe, newagholoke na kuuoka unu mzi."

11 Waghojo wa Wakalidayo wahelawa pee Yelusalemu kuwaghuuka waghojo wa zumbe wa Misii ndiwo waibuzie hehi, 12 Yelemia akauka Yelusalemu akaita kwe shi ya Benjamini kunga akainkwe kifu chakwe mwe wandughu wakwe. 13 Ahebula mwe uvi wa Benjamini, mghojo mng'we mweitangwa Iliya ng'wana wa Shelemia, ng'wezukuue ja Hanania, akamgwiya Yelemia na kumghambia, "Iwe utanyiika uite kwevungana na waghojo wa Wakalidayo!"

14 Yelemia akamghamba, "Ayo ni mambeza! Imi sitanyiika niite kwevungana na Wakalidayo." Miya Iliya hategheleze aghambiwevyo ni Yelemia. Kwa ivyoho akamgwiya na kumuighala kwa wagholokezi. 15 Awo wagholokezi wakakwewa ni maya kwa mbuli ya Yelemia wakamtoa, vikibinda wakamzughaiya mwe nyumba ya Yonasani mwegonda, ighalushweyo kuituka geeza. 16 Yelemia ageighwe ndai mwe chumba ndicho chiifukighwe shi, yohe akaikala uko kwa mishi mingi.

17 Vikibinda, zumbe Sedekia akaaghiiza wantu wamuighale Yelemia mwe nyumba ya kizumbe, zumbe akamuuza kwa kifisho kuti, "Ivi kuna mbuli yoyoshe kulawa kwa Zumbe Mulungu?"

Yelemia akamhisa, "Ehe ihaho, iwe neugwiwe ni zumbe wa Babeli." 18 Yelemia akamuuza zumbe Sedekia kuti, "Nikubaniei iwe hambu waambizi wako na awa wantu, mpaka mukanizughaiya? 19 Wakuhi wateghanyi wakuteghanyiizawo wakighamba kuti, zumbe wa Babeli heakutoe iwe wala inu shi? 20 Ushe naakuombeza unitegheleze iwe zumbe wangu. Naakuombeza usheniuze vingi na mwe chumba che shi mwe nyumba ya Yonasani mwegonda, kwa kuti nenifiie umo."

21 Kwa ivyoho, zumbe Sedekia akaaghiiza Yelemia aikwe he ukomea wa waghojo. Na ainkwe mkate kia mshi kulawa kwa wedika mikate mpaka ndiho mikate yoshe ishiye mwe mzi. Kwa ivyoho Yelemia akaikala mwe ukomea wa waghojo.