1 Zumbe Mulungu aamnka Yelemia mbuli ntuhu akighamba, 2 "Imi Zumbe Mulungu, Mulungu wa Izilaeli naghamba ivi, gonda mbuli zosheni nikughambilezo mwe gondwe, 3 kwa kuti mishi yaaiza ndiho niwauze wantu wangu wa Izilaeli na wa Yuda kulawa mwe shi ya ugheni, wauye na mwe shi nawainkayo baba zawe iituke yawe." Ni miyo Zumbe Mulungu nilongiewo.

4 Izi nee mbuli Zumbe Mulungu alongiezo kwa mbuli ya wantu wa Izilaeli na wa Yuda,

5 Imi Zumbe Mulungu naghamba ivi, "Tizaiva nkoo zegea wogha,

ni nkoo zegea futofuto na shiyo kwedi.

6 Kiuzei ushe kunga mutaile,

ivi mghoshi aadaha kuvyaa ng'wana?

Kwai ushe niona kia mghoshi mwena nguvu atekitoza kighwidi

sa vinga ni mvyee mwena mishango ya kuvyaa,

vingi watehinduka vyeni?

7 Kweli uwo mushi newiituke waagea wogha,

hezekulawiye mushi mutuhu sa uwo,

kwa kuti ni mushi wa ntogho kwa wavyawa wa Yakobo,

miya nezewavuniwe."

8 Zumbe Mulungu mwena nguvu zoshe aghamba ivi, "Uwo mushi ukizabula, nenibonde kigongo che mwe shingo zawe na kudwisha mpingu zawe, hezewaghalushwe vingi watung'wa ni wantu wagheni. 9 Miya newanitumikile imi Zumbe Mulungu, Mulungu wawe na zumbe ndiye niwashaghuiye mweandukia mwe wavyawa wa Daudi."

10 "Musheogohe inywi watung'wa wangu wavyawa wa Yakobo,

usheangwe ni moyo iwe Izilaeli.

Kweli nemiuze kaya kulawa shi hale,

neniwauze wavyawa wako kulawa kwe shi ya ugheni.

Nemuuye muikale kwa mpolele,

na hekuna ndiye amigee wogha.

11 Imi ni hang'we na iwe nikuvunie.

Hang'we na kuti mbali zosheni nenizikome,

uko kwawe nikuasakanyiizeko,

miya inywi senimikome.

Nenimilahe kwa mbuli ya uhuza mughosholewo,

senimieke bia kumilaha."

Ni miyo Zumbe Mulungu nilongiewo.

12 Zumbe Mulungu aghamba ivi,

"Vionda vyako hevina mzighi,

vingi heviaghuika.

13 Hekuna mntu ndiye akuambize mwe masa yako,

wantu waahona vionda,

miya iwe hekuna chedaha kukuhonya.

14 Woshe wehang'we na iwe wazakujaa,

hewakuwelela.

Nikutoiye sa via ambavyo wangatoighwa ni mnkuu,

utoighwe bia mbazi,

kwa kuti masa yako ni makulu muno

na uhuza wako uzaisiiza.

15 Kwai waakema kwa mbuli ya kionda chako?

Kuuma kwako hekuhoa

Nikughosholee ivyoho,

kwa kuti masa yako ni makulu

na uhuza wako uzaisiiza.

16 Miya wantu woshe wekukoma newakong'we,

wankuu wako woshe newaighawe na kwe shi ya ugheni.

Woshe wekuhoka vintu vyako newahokwe vintu vyawe,

woshe wekuingata newaingatwe.

17 Miya nenikuuzize ugima wako

na kuhonya vionda vyako,

kwa kuti uzaitangwa,

‘Aashighweye,

iwe mntu wa Sayuni hekuna mwekuwelela!’ "

Ni miyo Zumbe Mulungu nilongiewo.

18 Zumbe Mulungu aghamba ivi,

"Neniwauze vingi wantu wa Izilaeli na mwe shi yawe

na mizi yawe neniiivile mbazi,

mzi wa Yelusalemu neuzengwe vingi ulanga ya mahuzu yakwe,

na kitaa cha zumbe nechizengwe vingi haho ndiho chiiho.

19 Wantu weikala uko newaimbe maimbo ya kutogola,

newatoe nkeeghee.

Neniwaghenyeeze hewaituke wagheke,

newaheshimiwe miya hewabewe.

20 Wana wawe newaituke sa haja kale,

bumba jawe nenijitogheshe kunga wanivike mwe mesho yangu,

neniwatoe wosheni wewasungudisha.

21 Mweawo mng'we wawe neaituke zumbe,

mgholokezi neaandukie kwawe.

Nenimuete hehi na imi yohe neaituke hehi na imi,

ni ndai mwedaha kuiza hehi na imi niishimkongie?

Ni miyo Zumbe Mulungu nilongiewo.

22 Newaituke wantu wangu,

naimi neniituke Mulungu wawe."

23 Welela maya ya Zumbe Mulungu yazakwea sa kilazoni chegeza wogha, neyabule wahuza mwe mitwi yawe. 24 Maya makai ya Zumbe Mulungu heyahoe mpaka ndiho abontole chia afanyanyecho mwe moyo wakwe. Mishi yeiza nemuzitaile vitana izi mbuli.