1 Zumbe Mulungu akanighambila kuti, 2 "Yelemia, hita kwa mweghoshola vizungu, ukibula nenikughambile mbuli yangu." 3 Ushe, nikaita mpaka kwa mweghoshola nyungu, nikambuiza aaghoshola ndima yakwe he msehe. 4 Vikaituka kuti, nyungu ayeghoshola ihebanika mwe mikono yakwe, ateighoshola nyungu ntuhu sa avyekunda ye ng'wenye.

5 Nee Zumbe Mulungu ahenighambila, 6 "Inywi wantu wa Izilaeli, ivi kweli imi Zumbe Mulungu sidaha kumighoshola sa uyu mweghoshola vizungu aghosholevyo?" Tailai kuti, "Sa shanga iivyo mwe mikono ya mweghoshola vizungu, nee muivyo inywi mwe mikono yangu. 7 Nikiinua kanwa kwa mbuli ya mbali hambu uzumbe kuti neniuushe, neniukinye hambu kuubana, 8 vikaituka kuti wantu wa iyo mbali wakavoteka na kueka uhuza wawe, senibontoe ija mbuli mbada nafanyanyayo kuwaghoshoela. 9 Nikiinua vingi kanwa kwa mbuli ya mbali hambu uzumbe kuti neushimikwe na kuzengwa, 10 vikaituka kuti iyo mbali ikaghoshola mbuli mbada mwe mesho yangu na kusheniiva, nenieke kuighoshoela mbuli ntana niwaghambilezo kuti neniwaghosholee." 11 Kwa ivyoho ushe, waghambile wantu wa shi ya Yuda na waja weikala mwe mzi wa Yelusalemu kuti, "Imi Zumbe Mulungu naghamba ivi, niifanyanye kumietea ntogho na nikunda nighoshole ivyoho. Kwa ivyoho, hitukai mueke mbuli zenyu mbada kwa kuhitua miikaile yenyu na mbuli zenyu muzeghoshola. 12 Miya wo newaghambe, ‘Hevitiambize chochoshe. Keba tiwelele du mbuli zeshu na kia mng'we atongele utii wa moyo wakwe mbada.’ "

13 Zumbe Mulungu aghamba ivi,

"Uza wantu mbali zoshe kuti,

ni ndai mwetaila kuiva mbuli sa inu?

Mbuli yegeza wogha izaghosholwa ni wantu ywangu wa Izilaeli!

14 Kwani baafu ya Lebanoni yaataiya kusheoneka mwe makoongo yakwe ya mawe?

Ivi mazi yakwe yeota yelawiya kwe shoko za hale zaataila kuhwa?

15 Miya wantu wangu imi wazanijaa,

wataoka ubani kwa mulungu ya lufyo ishiwaambizayo chochoshe.

Iwaekileyo wakitoe mwe sia wazinkiiezo,

hewazinka vingi mwe sia zawe za boosi,

wazinka tundui.

16 Shi yawe wazaieka izaituka kintu chegea wogha,

neizomeewe kale na kale.

Kia mwezinka atamaka

na kukucha mtwi.

17 Neniwaasakanye kwa wankuu wawe,

sa mpeho yelawiya wazu zua jikwelawiya.

Neniwakande mghongo,

seniwaambize uwo mshi wakizabulwa ni ntogho."

18 Vikibinda wantu wakaghamba, "Soi tiaghane kwa mbuli ya kumtoa nkondo Yelemia! Kwa kuti, hetishoe wavikizi wakutihinya, wena viugho wakutinka vinyanyi na wateghanyi wakubilikila mbuli ya Zumbe Mulungu. Soi timlahe kwa mbuli zakwe ng'wenye alongiezo na tishemtegheleze avyelonga."

19 Kwa ivyoho, nikavika ivi, "Zumbe Mulungu, naaombeza unitegheleze! Vingi tegheleza via wankuu wangu wavyelonga. 20 Ivi mbuli ntana zilihwe kwa mbuli mbada? Miya wazanifukia tubwi kunga nigongooke na umo. Fukila naizavyo kwako nikalonga na iwe kwa mbuli yawe kunga usheituke na maya nawo. 21 Kwa ivyoho, waeke wana wawe wafiie kwe nkondo kwa uhamba na kwa saa. Wavyee wawe wafiiwe ni waghoshi na wana wawe, waghoshi na wabwanga wawe wafe kwa uhamba kwe nkondo. 22 Wankuu wakiingila mwe nyumba zawe, kuivikane nkoo, kwa kuti wainifukiie tubwi kunga nigongooke na umo, vingi waiikile mitegho mwe sia nizezinke kunga wanigwie. 23 Miya iwe Zumbe Mulungu waazitaila fanyanyi zawe zoshe za kunikoma. Ushezawahokela kwa kuti wazaghoshola uhuza na uwo uhuza wawe ushezaujaa kale na kale. Waeke wagwe shi mwe mesho yako, uwalahe kwa maya yako."