1 Zumbe Mulungu akanighambila kuti, 2 "Hita ukawaghambile vigima wantu woshe wa Yelusalemu kuti imi Zumbe Mulungu naghamba ivi,

Naaufukila ukweli wako wiike mbwanga,

via wanikundavyo sa uvyemkunda mndee ywako mshi wa nteghuzi,

wanitongelavyo mwe ughongo,

mwe shi ishihandighweyo mbeyu yoyoshe.

3 Izilaeli, iwe nee uiwangu imi ike,

nee ui mpaa yangu.

Wosheni wakuumizawo watekiondea masa,

wakafa.

Ni miyo Zumbe Mulungu nilongiewo."

4 Teghelezai mbuli ya Zumbe Mulungu, inywi wavyawa wa Yakobo na inywi wantu wa kolwa ja Izilaeli. 5 Zumbe Mulungu aghamba ivi,

"Baba zenyu waona mbuli ani mbada kwangu

iwaekieyo wanihituke na kunieka?

Waazahitukia mulungu ishidahayo kuwaambiza,

wakashoa uwambizi.

6 Hewakiuzize kuti,

‘Akuhi Zumbe Mulungu, atilavyaye mwe shi ya Misii,

atiambizaye mwe nyika

mwe shi ya ughongo na makoongo,

shi ishiozokayo yena kiza,

shi ishizinkwayo ni wantu,

vingi heiikawa?’

7 Nawaeta na mwe shi yeozoka,

kunga waje nkande ntana zeozoka umo na kutamilwa kiiko cha nkande zakwe.

Miya wahebula mwe shi yangu, wakaeka nisheikunde,

ikanigea usei.

8 Wavikizi hewakiuzize kuti, ‘Akuhi Zumbe Mulungu?’

Wetaila sheiya hewanitaile,

wagholokezi wa wantu wazanihituka,

wateghanyi wohe wateghanya mbuli za Baali

wakatongela mbuli zishiwaambizazo."

9 Zumbe Mulungu aghamba ivi,

"Imi nenimilahe inywi,

na vivyazi vyenyu."

10 Ombokai mwe bahai muite mpaka Kupulo mukawelele,

hambu aghiizai wantu waite Kedali wakawelele

kuti kwaataila kulawiya mbuli sa inu.

11 Ivi kuna mbali yetaila kubadiisha mulungu yakwe,

hang'we na kuti iyo mulungu shiyo ya kweli?

Miya wantu ywangu wazanihituka imi Zumbe Mulungu newainka ishima na kutaikana,

wakatongela mulungu ishiwaambizayo.

12 Zumbe Mulungu aghamba ivi, iwe lwingu maka na kuona usoyoyo kwa inu mbuli.

13 Wantu ywangu wazaghoshola uhuza ntambo mbii,

wazanieka imi shoko ya mazi ya ugima wawe

na wazakifukia vishima vyawe wenye,

vishima viatukevyo, vishidahavyo kuika mazi.

14 "Izilaeli ni mtung'wa?

Avyaighwe mwe utung'wa?

Kwai ushe azaituka mntu wa kugwiwa ni wankuu ywakwe?

15 Shimba zizamgumiia Izilaeli,

zizagumia kwa mgumio mkulu,

shi yakwe heina wantu,

mizi izaituka mahuzu, heiikawa.

16 Wantu wa Memufisi na wa Tahipanesi,

wazamushiiza ishima na kumghalusha mtung'wa.

17 Ivyo vyosheni uvikundie ng'wenye,

kwa kunieka imi Zumbe Mulungu ywako,

nikuambizeye mwe sia.

18 Neuonele mbwai ukiita Misii,

kwevata mazi ya mto Naili?

Hambu kuna utana ani ukiita Ashulu,

kwevata mazi ya mto Eufulate?

19 Uhuza wako, neukulahe

na kusheituka na uhehi naimi nekukuetee mlaho.

Fukila na utaile

viivyo vibada na vyaaumiza

kunieka na kusheituka mkweli kwa imi Zumbe Mulungu ywako.

Ni miyo Zumbe Mulungu mwena ufung'wa nilongiewo."

20 Zumbe Mulungu mwena ufung'wa aghamba ivi,

"Iwe waaemela kugholokewa ni miyo kuanduka kale,

waemela kunitegheleza na kunivika,

waaivika mulungu yeeta uwozo,

mwe kia muima mtai

na shi ya kia mti wena mahungo maishi,

waakilaza sa mkilanga.

21 Nakuhanda sa mti mtana wa mzabibu,

kulawa mwe mbeyu ntana.

Viituke zeze ukabanika,

ukaghaluka mzabibu ushitamawo?

Na kughaluka mzabibu wa tundui?

22 Hata ukihake kwa sabuni ya maghadi,

na kwa sabuni zeghenea,

madoa ya masa yako heyauke mwe mesho yangu.

23 Udaha zeze kughamba, ‘Imi naakundwa ni Zumbe Mulungu,

siwavikie Mabaali?’

Fukila uhuza ughosholevyo kuja kwe koongo,

iwe u sa ngamia ya kivyee ye mwe kiuke,

yekeseka, 24 vingi u sa mpunda izoeeyo kuikala mwe ughongo,

yaahefya mpeho ii mwe kiuke chakwe,

ni ndai mwedaha kuikinda?

Mpunda zoshe za ngoshi zitamdosa hezikunda kukisangadisha,

kwa kuti zaitaila mishi yakwe ikibula nezimtongee du.

25 Izilaeli, ushesangadike mpaka ushakaze viatu,

ushekasaghawe ni mimeo yako kwa mbuli ya nkiu,

kwa kuitongela mulungu mituhu.

Miya iwe ukaghamba,

‘Doo senidahe kuuya mghongo naikunda mulungu ya kigheni ne ndiyo nibashe.’ "

26 Zumbe Mulungu aghamba ivi, "Sa via ng'wivi avyeona shoni akigwiwa, Waizilaeli wohe, wazumbe wawe, wagholokezi wawe, wavikizi wawe na wateghanyi wawe newaone shoni. 27 Wataighamba miti, iwe utate angu na kujighamba iwe niweyo univyaiyewo kwa kuti wazanihituka wala hewaniwelele. Miya wa imwe ntogho wataghamba, so utivunile.

28 "Ihi mulungu mukishongoleeyo? Neigholoke ushe kati yaadaha kumivunia mukiituka mwe ntogho. Ehe Yuda una mulungu mingi yeighana na mizi yako. 29 Kwai mwaaninomonekea imi? Vikiituka nyosheni muighoshole uhuza? 30 Naawatoa wantu wako miya heviambize chochoshe, wo wenye hewakundie niwashunde. Uhamba wako uzawakoma wateghanyi wako sa vinga ni shimba ivyenyaghafua maunde. 31 Inywi wantu wa Izilaeli, teghelezai nivyelonga imi Zumbe Mulungu. Ivi kwenyu imi nizaituka ughongo, hambu shi itoghieyo kiza? Kwai ushe mwaaghamba, nemughoshole muvyekunda na hemuniuiye vingi? 32 Mndee aadaha kujaa maheli yakwe ya kukihambia, hambu ng'wai aadaha kujaa shuke yakwe ya nteghuzi? Miya wantu wangu imi wazanijaa kwa mishi ishitaikayo. 33 Kweli iwe uvitana kwa kuondeeza waja uweona kuti newakuambize. Mpaka wavyee wabada wakihinya kulawa kwako. 34 Shuke zako zina mpome ya wakiwa na wantu washinawo masa, na shiyo madanko ya mpombe za wabavi.

"Hang'we na ivyo vyoshe, 35 iwe utaghamba, ‘Imi sina masa, kwa kweli maya yakwe yahae na imi.’ Miya imi nenikulahe kwa kuti uzaghamba, ‘Sina uhuza nighosholewo.’ 36 Kwai waakigea shoni kwa kuhitukia mulungu ya mbali ntuhu. Wamisii uwebasha newakugee shoni, sa via wageighwavyo shoni ni Waashulu. 37 Vikibinda, neuuke uko Misii kwa shoni uko uitozize mtwi. Kwa kuti Zumbe Mulungu azawaemela waja uwealila, heuonele kwa uwambizi wawe."