1 Zumbe Mulungu aalonga vingi na Yelemia, mwe mshi Sedekia zumbe wa Yuda ahezamuaghiiza Pashuli ng'wana wa Malikia na mvikizi Sefania ng'wana wa Maaseya, wakamghambe Yelemia kuti, 2 "Taaombeza utivikile kwa Zumbe Mulungu kwa kuti Nebukadineza, zumbe wa Babeli hang'we na waghojo wakwe, watatiandushiiza nkondo. Ngea Zumbe Mulungu neatiambize sa avyekatiambiza, Nebukadineza ashetietee nkondo atieke aite zakwe."

3 Yelemia akawaghamba, hitai mukamghambe Sedekia kuti, 4 Zumbe Mulungu, Mulungu wa Izilaeli, aghamba ivi, "Sedekia, siaha uzemtoea nkondo zumbe wa Babeli na waghojo wakwe wekutoa nkondo se ya ukando wa mzi neniziumbike hantu hang'we gatigati ya mzi wa Yelusalemu. 5 Imi ng'wenye nenitoane na iwe kwa nguvu zangu zoshe na kwa maya yangu makai. 6 Neniwakome weikala mwe unu mzi, wantu na vizama kwa utamu mbada. 7 Vikibinda, nenimueke Sedekia zumbe wa Yuda hang'we na waambizi wakwe na wantu wa unu mzi washifiewo kwa utamu mabada, nkondo na saa, wagwiwe ni Nebukadineza zumbe wa Babeli na wankuu wawe wekunda kuwakoma. Newawakome woshe kwa uhamba na hewawaivile mbazi wala kuwategheleza. Imi Zumbe Mulungu nizalonga."

8 Vingi waghambile awa wantu kuti, "Ivi nee avyelonga Zumbe Mulungu, welela nitaika mwe mesho yenyu sia ya ugima na ya kifa. 9 Mntu yoyoshe ndiye ashighae mwe unu mzi neafe kwa uhamba, kwa saa ama kwa utamu. Miya waja wekiighaa wenye wakagwiwe ni waghojo wa Babeli weutoa unu mzi, hewafe. 10 Ivi nevilawiye kwa kuti, imi Zumbe Mulungu nizaufanyanyiiza unu mzi kuuwetea mbuli mbada na shiyo ntana. Nenimuambize zumbe wa Babeli kuughua unu mzi na kuuoka kwa moto."

11 Zumbe Mulungu akanighamba kuti, ushe waghambile wantu wa chengo cha uzumbe wa shi ya Yuda, kuti "Teghelezai avyelonga Zumbe Mulungu, 12 inywi wantu wa chengo cha Daudi, wantu muwelaha kia mshi walahei kwa ukweli. Wavunilei waja wagwizighwewo ni wantu wena zuuma wekunda kuwahoka mai zawe. Mukisheghoshola ivyoho, nenikwewe ni maya makai sa moto na hekuna mwedaha kuyahoza kwa mbuli ya ubanasi wenyu mughosholewo. 13 Imi si hang'we na inywi wantu wa Yelusalemu, mweikala mwe iji koongo uwanga ya makuungu. Inywi mweghamba kuti, ‘Ni ndai mwedaha kutitoa ishwi? Ni ndai mwedaha kuingila hantu hetu haghuukia?’ 14 Nenimilahe kuighana na mbuli zenyu muzeghoshola. Nyumba yenyu ya kizumbe neniitoe moto, uwo moto neuoke kia kintu che umo. Ni miyo Zumbe Mulungu nilongiewo."