1 Zumbe Mulungu alonga na Yelemia haja Nebuzaladani mkulu wa waghojo wa zumbe ahemuekea uko Lama. Uyo mkulu wa waghojo ambuiza Yelemia aishungighwe na mnyoo hang'we na wantu watuhu walawiewo Yelusalemu na Yuda ndiwo wakiighawa na mwe shi ya Babeli. 2 Uyo Nebuzaladani mkulu wa waghojo ahemuona Yelemia akamghamba, "Zumbe Mulungu, Mulungu wako aighambile kuti neaete ntogho aha hantu. 3 Na ivi ushe Zumbe Mulungu azaghoshola sa alongievyo. Ivi vyoshe vilawiye kwa kuti inywi nyoshe muzamghoshoela Zumbe Mulungu uhuza na kushemuiva. 4 Ushe, nitakuchopoa minyoo ye mwe mikono yako. Tiite hang'we mpaka Babeli kati waakunda, naimi nenikuwelele. Miya kati hukunda kuita naimi, usheize. Waadaha kuita hantu hohoshe uhekunda mwe inu shi uheona kuti ni hatana." 5 Yelemia aishizati kumhisa, Nebuzaladani akamghamba kuti, "Uya na kwa Gedalia ng'wana wa Ahikamu, ng'wezukuue ja shafani, ashaghulweye ni zumbe wa Babeli aituke mgholokezi wa mizi yoshe ya Yuda, ukaikale naye uko, hambu hita hohoshe hekutamila." Vikibinda uyo mgholokezi akamnka Yelemia nkande hang'we na vintu vituhu akamueka aite zakwe. 6 Kwa ivyoho Yelemia akaita kwa Gedalia ng'wana wa Ahikamu uko Mizipa na kuikala naye hang'we na wantu washighalewo mwe shi.

7 Wagholokezi watuhu wa Yuda na waghojo nee waishizati kukiighala kwa Nebukadineza zumbe wa Babeli. Wakaiva kuti zumbe wa Babeli azamshaghula Gedalia ng'wana wa Ahikamu aituke mgholokezi mwe shi, vingi azamshaghula aituke mgholokezi wa wantu waisiizewo ukiwa mwe shi, washigwizighwewo na kuighawa na mwe shi ya Babeli, yani waghoshi, wavyele na wana. 8 Kwa ivyoho Ishimaeli ng'wana wa Nesania na Yohanani na Yonasani wana wa Kalea na Selaya ng'wana wa Tanihumesi na wana wa Efai wa Munetofa na Yezania ng'wana wa Mmaaka hang'we na wantu wawe, wakambasha Gedalia uko Mizipa. 9 Gedalia ng'wana wa Ahikamu ng'wezukuue ja Shafani akawalapia wo hang'we na mwe mesho ya waghojo wawe, akighamba, "Musheogohe kukiighala kwa Wakalidayo. Ikalai mwe shi na mumtumikile zumbe wa Babeli na mbuli zenyu zoshe nezimiitile vitana. 10 Imi neniikale Mizipa kunga mwelonga mbuli zenyu kwa Wakalidayo weiza aha. Miya inywi nemuituke mwaashuma zabibu na kuzikoota na kuika divai na kuunganyanya matunda na mafuta ya mzaituni mwe maigha yenyu, vingi nemuikale mwe ndiyo muighue." 11 Wayahudi wosheni weikala mwe shi ya Moabu na Amoni na Edomu na mwe shi ntuhu waheiva kuti zumbe wa Babeli azawaeka wantu watuhu washighale Yuda, vingi azamshaghula Gedalia ng'wana wa Ahikamu ng'wezukuue ja Shafani aituke mgholokezi wawe, 12 wakalawa mwe shi ndizo waaiasakanywe, wakauya woshe na mwe shi ya Yuda, uko Mizipa kwa Gedalia. Wakashuma zabibu na matunda mangi mwe mishi zua ja ng'waka.

13 Izo mbuli zihezinka, Yohanani ng'wana wa Kalea hang'we na wakulu wa waghojo ndiwo waishikiighale kwa zumbe wa Babeli wakambasha Gedalia uko Mizipa 14 wakamghamba, "Ivi hutaila kuti Baalisi zumbe wa Waamoni azamuaghiiza Ishimaeli ng'wana wa Nesania akukome?" Miya Gedalia ng'wana wa Ahikamu hawategheleze. 15 Vikibinda, Yohanani ng'wana wa Kalea akalonga na Gedalia kwa kifisho uko Mizipa, "Eka niite nikamkome Ishimaeli ng'wana wa Nesania na hekuna mntu yoyoshe ndiye ataile kuti ni ndai amkomieye. Kwai akukome iwe na kueka wantu wosheni wa Yuda waungananewo aha waasakane na Wayahudi washighalewo mwe mzi wa Yuda wakong'we woshe?" 16 Miya Gedalia ng'wana wa Ahikamu akamhisa Yohanani ng'wana wa Kalea, "Ushezaghoshola mbuli sa iyo! Mbuli uyelonga kwa mbuli ya Ishimaeli shiyo ya kweli."