1 Chawe ndicho wagholokezi weazaghanya ngoto zangu! Imi Zumbe Mulungu nizalonga. 2 Ivi nee Zumbe Mulungu, Mulungu wa Izilaeli avyelonga kwa mbuli ya wagholokezi wegholokea wantu wangu, "Inywi muzaziazaghanya ngoto zangu na kuzishaka, hemuziishize vitana. Kwa ivyoho, nenimitoe kwa mbuli ya uhuza wenyu mughosholewo." Imi Zumbe Mulungu nizalonga. 3 Vikibinda, neniunganyanye ngoto zangu zishighaezo mwe shi zosheni niziasakanyeko na kuziuza na mwe maisho yawe. Wohe newavyaane na kughenea. 4 Neniwainke wantu wangu wagholokezi watuhu wakuwagholokea vitana, wohe hewaituke na wogha na futofuto na seniwatoe vingi, imi Zumbe Mulungu nizalonga.

5 Zumbe Mulungu aghamba ivi, "Welela mishi yaaiza nenimishaghuie zumbe mkweli kulawa mwe wavyawa wa Daudi. Uyo neagholokele sa zumbe kwa viugho, kwa utanda na kulaha kwa ukweli mwe shi ngima. 6 Mwe mishi ya ugholokezi wakwe, Yuda neavuniiwe na Izilaeli neaikale kwa usaama. Yohe neaitangwe, ‘Zumbe Mulungu mvunizi wetu.’

7 "Zumbe Mulungu aghamba ivi, mishi yaaiza wantu hewalape vingi na kughamba, ‘Sa Zumbe Mulungu avyeishi awalavizeye Waizilaeli mwe shi ya Misii,’ 8 miya newalape kwa kughamba, ‘Sa Zumbe Mulungu avyeishi awalavizeye na kuwawelela Waizilaeli kulawa mwe shi ya wazu wa kasikazini na kulawa mwe shi zosheni awaasakanyeko.’ Vikibinda, newaikale mwe shi yawe wenye."

9 Kwa mbuli ya awo wateghanyi,

moyo wangu uzaingiwa ni wogha,

mavuha yangu yoshe yatazingiza,

nizaituka sa mntu atengeeye,

mntu aisiizeye kunywa mpombe.

Kwa mbuli alongiezo Zumbe Mulungu.

10 Shi imemie wantu washinawo ukweli kwa Zumbe Mulungu,

waikaa kwa kughoshola ubanasi na kughoshola mbuli zishikundighwazo kughoshoka mwe ugholokezi wawe.

Kwa mbuli ya ute wa Zumbe Mulungu wantu wa shi watasininika

na mani yakwe yazakaaghaa.

11 Zumbe Mulungu aghamba ivi,

"Wateghanyi na wavikizi woshe, hewamuiva Mulungu,

ubanasi wawe nizauona mpaka mwe nyumba yangu ya mviko.

12 Kwa ivyoho, sia zawe neziituke zaapaata,

newaghuushwe hale mwe kiza, na kukina ghuko uko.

Neniwaetee vifa

mwe vui ja kuwalaha jikizabula,

Imi Zumbe Mulungu nizalonga.

13 Mwe wateghanyi wa Samalia,

nizaona mbuli yeniihiza,

wateghanya kwa zina ja Baali

na kuwaaza wantu ywangu wa Izilaeli.

14 Miya mwe wateghanyi wa Yelusalemu,

nizaona mbuli mbada yegea usei,

wavika mulungu mituhu na wadosa mbuli za lufyo,

watawahimbia wantu waghoshole mbuli mbada

hekuna mweeka kughoshola ubanasi.

Kwangu woshe wazaituka sa wantu wa Sodoma,

wantu wa Yelusalemu wazaituka sa wantu wa Gomola.

15 "Kwa ivyoho imi Zumbe Mulungu mwena ufung'wa woshe naghamba ivi kwa mbuli ya wateghanyi wa Yelusalemu,

neniwainke nkande zenyeghea waje

na wavate mazi yena sumu,

kwa kuti, wazawaeka wantu woshe mwe shi washemuive Zumbe Mulungu."

16 Zumbe Mulungu mwena ufung'wa woshe aghamba ivi, "Mushetegheleze mbuli muzeghambiwa ni wateghanyi, waminka kialilo cha lufyo. Mbuli wazemighambila zilawa mwe fanyanyi zawe wenye, hezilawa kwangu imi Zumbe Mulungu. 17 Watahimba kuwaghambila waja webea mbuli yangu imi Zumbe Mulungu, wakighamba, ‘Mbuli zenyu nezimiitile vitana.’ Na kumghambila kia mntu mtii mwetongela fanyanyi zakwe, ‘Hekulawiye mbuli yoyoshe mbada.’ "

18 Nikaghamba, "Mwe awo wateghanyi, hekuna mwetaila fanyanyi za sii za Zumbe Mulungu. Hekuna hata mng'we mwe awo wateghanyi aivaye mbuli ya Zumbe Mulungu, wala kufukila yaja yalongighweyo ni Zumbe Mulungu. 19 Welela, maya ya Zumbe Mulungu ni sa kimbunga. Chishiekacho kupusa mwe mitwi wa wantu wahuza. 20 Maya ya Zumbe Mulungu heyashie, mpaka abontoe mbuli afanyanyezo mwe moyo wakwe. Mwe mishi yeiza wantu wakwe newaitaile inu mbuli vigima."

21 Zumbe Mulungu aghamba ivi, "Imi siwaaghiize awa wateghanyi, miya wo wakaituka na kiheehee wakaita, siwaghambile mbuli yoyoshe, miya wo wakateghanya. 22 Kati watezitaila fanyanyi zangu za sii, wangebiikila mbuli zangu kwa wantu wangu, wangewahitua kulawa mwe sia zawe mbada na kueka mbuli mbada wazeghoshola."

23 "Imi ni Mulungu mwe hehi, shiyo Mulungu mwe hale. 24 Ivi mntu aadaha kukifisha hantu nishemuone? Hemutaila kuti imi Zumbe Mulungu ni kia hantu, kwe lwingu na kwe shi? 25 Nizaiva wateghanyi wavyelonga, awo weteghanya mbuli za lufyo kwa zina jangu. Wataghamba, nizawainka uteghanyi mwe sozi. 26 Ivi, izo mbuli neziiituke mwe myoyo ya awo wateghanyi wa lufyo, weteghanya mbuli za lufyo kwa fanyanyi zawe mpaka ini? 27 Wafanyanya kuti, kwa kushimoezana sozi zawe nekueke wantu wangu wanijae, sa baba zawe wanijaavyo wakamvika Baali. 28 Mteghanyi aoshighweye, nealonge du kuti iyo ni sozi, miya mwena mbuli yangu, neailonge kwa ukweli. Kwa kuti mantu yaadaha kuighanywa na ngano. Imi Zumbe Mulungu nizalonga. 29 Mbuli yangu ni sa moto, ni sa nyundo yetua mawe vibaebae. 30 Kwa ivyoho, imi Zumbe Mulungu si hang'we na awo wateghanyi weteghanya mbuli zawe savia zangu. 31 Ehe naghamba, imi Zumbe Mulungu si hang'we na wateghanyi weteghanya mbuli zawe wenye wakighamba, ‘Zumbe Mulungu azalonga.’ 32 Imi si hang'we na waja wateghanyi wewaghambila wantu wangu mbuli zawe za lufyo, wakighamba kuti wazahokea mbuli zangu mwe sozi, lufyo jawe na kukikomba kwawe kushiwaambizako chochoshe kutawaaza wantu wangu. Imi saawaaghiize wala kuwaghamba waite, kwa ivyoho, mbuli wazeghoshola awa wantu shiyo zedi kwa wantu woshe."

33 Zumbe Mulungu aanighambila, "Yelemia, mntu yoyoshe, aituke mteghanyi ama mvikizi wakiuza kuti, ‘Mzigho wa Zumbe Mulungu ni mbwai?’ Iwe neuwahise, ‘Ni nywio mzigho wa Zumbe Mulungu, yohe neamiashe na hale.’ 34 Vingi mteghanyi ama mvikizi ama mntu yoyoshe ndiye aghambe, ‘Unu ni mzigho wa Zumbe Mulungu,’ nenimtoe ye hang'we na wantu wa chengo chakwe. 35 Mbuli muyekundwa kughoshola ni kuuzana inywi wenye kuti, ‘Ivi, Zumbe Mulungu atihisize mbwai?’ Hambu, ‘Zumbe Mulungu alongie mbwai?’ 36 Miya mushelonge vingi kuti, ‘Unu ni mzigho tiinkighwewo ni Zumbe Mulungu.’ Kia mntu achelonga chitaituka ni mzigho kwakwe ng'wenye. Kwa kuti, mutahitua mbuli za Zumbe Mulungu mwena ugima, Zumbe Mulungu mwena nguvu zoshe, Mulungu wetu. 37 Yelemia, muuze mteghanyi kuti, ‘Zumbe Mulungu akuihisize mbwai? Hambu Zumbe Mulungu aghambieze?’ 38 Kati hemunitegheleze imi na mukaghamba, ‘Unu ni mzigho wa Zumbe Mulungu,’ na imi naamiemeza kughoshola ivyoho, aho nee ndiho 39 imi neniwainue na kuwaasha hae na mesho yangu, wo wenye hang'we na mzi nawainkawo wo na baba zawe. 40 Neniwaetee shoni na kubewa kae na kae ndiko kushejaighwe."