1 Baada ya Nebukadineza zumbe wa Babeli kuwashamiza Yehoyakini ng'wana wa Yehoyakimu zumbe wa Yuda, hang'we na wagholokezi, wezenga na wekonta chuma wa Yuda waheushighwa Yelusalemu na kuwaighawa Babeli, Zumbe Mulungu akanietea inu sozi, nikaona vitezu viili vya tini viikighwevyo mbele ya nyumba ya Zumbe Mulungu. 2 Kitezu king'we nee chiina tini zetama, sa tini za boosi kushung'wa. Miya kitezu kituhu nee chiina tini zivundiezo zishitamazo kwa kuja. 3 Nee Zumbe Mulungu aheniosa, "Yelemia, uona mbwai?"

Nikamhisa, "Niona tini ntana kwei zetama, na zia zivundiezo zishitamazo kujighwa."

4 Vikibinda Zumbe Mulungu akanighamba, 5 "Imi Zumbe Mulungu, Mulungu wa Izilaeli naghamba ivi, sa izi tini ziivyo ntana, nee ndivyo niwaone wantu wa Yuda kuti ni watana nawaavyawo aha hantu na kuwaighaa mwe shi ya Wakalidayo. 6 Neniwalinde kae na kae na kuwauza mwe inu shi. Neniwazenge, wala seniwabomoe, neniwashimike wala seniwaeke. 7 Neniwainke moyo wa kutaila kuti imi ni miyo Zumbe Mulungu. Nee ndiho waituke wantu wangu na imi niituke Mulungu wawe, kwa kuti newaniuiye kwa miyoyo yawe yoshe."

8 "Miya imi Zumbe Mulungu naghamba, sa ziya tini zivundiezo zishitamazo kujighwa, nee ndivyo nimghoshoee zumbe Sedekia wa Yuda na waambizi wakwe hang'we na wantu woshe watuhu wa Yelusalemu washighaewo umo mwe shi, hang'we na waja washamiawo mwe shi ya Misii. 9 Neniwaetee ntogho ndizo ziwaeke wantu wa mbali zoshe waingiwe ni wogha. Newaituke kioja, newazomeewe na kushekwa na kushweewa ute kia hantu ndiho niwaasakanye. 10 Wohe neniwaetee nkondo, saa na matamu mabada mpaka wafe asheshighae hata mng'we wawe mwe shi nawainkayo wo na baba zawe."