1 Inywi wantu wa Benjamini, lawai mwe mzi wa Yelusalemu mughuuke kwa mbuli ya usaama wenyu! Vuziiai magunda mwe mzi wa Tekoa, onyeshai ntangilo uko Besi Hakelemu. Kwa kuti ntogho na ubanasi vihehi kuiza kulawa wazu wa kasikazini. 2 Mzi wa Yelusalemu ni mtana, miya neniubane. 3 Wazumbe newaize na waghojo wawe kweutoa uwo mzi, sa walishi wavyeituka hang'we na ngoto na mbuzi zawe. Newakime makumbi yawe kuudenganyia uwo mzi, na kia zumbe neaikale hantu ahekunda ye ng'wenye. 4 Newaghambe, "Kikantei tikautoe mzi wa Yelusalemu! Titei tikautoe mshii!" Vikibinda newaghambe, "Tizacheewa zua jitagongooka, na vizui vitaisiiza kuleha. 5 Inukai, titei nakio tikabonde ngome zawe."

6 Zumbe Mulungu mwena ufung'wa woshe aghamba ivi, "Shengai miti, muzenge kiugha cha kukweea kudenganyiiza ukando wa mzi wa Yelusalemu. Shuti unu mzi utoighwe kwa kuti wantu weikala umo wamemie zuuma du. 7 Sa kishima chivyeika mazi matana, nee mzi wa Yelusalemu uvyeika uhuza wakwe. Kuivikana vuzo na ubanasi mwe uwo mzi, mishi yoshe niona matamu na vionda du mwe uwo mzi. 8 Inywi wantu wa Yelusalemu, kundai kushundwa, kati sio ivyoho nenimieke na shi yenyu neniighalushe ughongo, hantu hashiikalwaho ni wantu."

9 Zumbe Mulungu mwena ufung'wa woshe aghamba ivi, "Waunganyanyei wantu wosheni wa Izilaeli washighaewo sa wantu wavyeghoshola wakishuma mazabibu, ughiizai vituhu."

10 Nee nihehisa, "Nenitegheezwe ni ndai nikilonga nawo kunga niwashunde? Wo ni watii wataemea kutegheleza mbuli yako watasheka nikiwaghambila zia mbuli unighambilezo niwaghambile. 11 Maya yako kwawe yaniumiza iwe Zumbe Mulungu, sidaha kuzizimiza." Nee Zumbe ahenighambila, "Ayo maya kayaukue kwa wana we mwe sia na kia hantu wabwanga waheunganana, waghoshi na wakazie wawe newaghuighwe na kuighawa hale na waghundu heweekwe. 12 Nyumba zawe neziinkiwe kwa wantu watuhu, mbuwa zawe hang'we na wakazie wawe kwa kuti, nenikusue mkono wangu kunga niwalahe wantu weikala mwe inu shi. 13 Wantu wosheni, kuandusha wetaikana na washitaikanawo, wakunda waonee vingi kwa sia za zuuma, wateghanyi na wavikizi, wohe waghoshola kwa lufyo. 14 Chia wacheghoshola kwa wantu wangu waumizwewo kweli nikuwainka kialilo cha amani chishicho cha kweli. 15 Ivi waona shoni, kwa mbuli zawe kwa mbuli zawe zekweza maya kwei? Doo! Hewaona shoni hata hadodo du hewateiya hata kuona shoni. Kwa ivyoho newagwe hang'we na waja wegwa neniwakome kweli, ivyo nee avyelonga Zumbe Mulungu."

16 Zumbe Mulungu aghamba ivi, "Gholokai mwe sia mpanda muwelele, uzai sia za kale mutaile sia yedi ihi. Zinkai mwe iyo sia nenywi nemuonee mpolele."

Miya wo wakaghamba, "Hetizinke mwe iyo sia." 17 Nee nihewaikila waghojo, nikawaghamba, teghelezai muiyo wa magunda. Miya wo wakaghamba, "Hetiutegheleze ishwi."

18 Kwa ivyoho, "Teghelezai inywi wantu wa mbali zoshe na inywi bumba mutaile mbuli zeiza kwewalawiya wantu wangu. 19 Tegheleza inywi wantu mweikala mwe shi! Neniwaetee awa wantu ntogho kwa mbuli wafanyanyezo wenye. Kwa kuti hewategheleze mbuli yangu na sheia yangu wazaiemea. 20 Munietea ubani wa mbwai kulawa Sheba na udi wena mzingo mtana welawa kwe shi ya hale ni wa mbwai? Senizihokele ntogoo zenyu za kuoka na ntogoo zenyu zakughubika uhuza hezinitamila. 21 Kwa ivyoho imi Zumbe Mulungu naghamba, awa wantu neniwaikile vidighino. Ivyo vidighino neviwakinye wana na waishe zawe, wantu weikala nyumba ya mazu na weae wawe newafe."

22 Zumbe Mulungu aghamba ivi, "Welelai wantu waaiza kulawa shi ya kasikazini, waghojo wangi waaiza na shi yena wantu wena nguvu wazainuka kulawa hae na inu shi. 23 Wainue nyuta na maosa yawe, awo wantu ni makatii washinawo mbazi. Wakiituka waikwezie mwe faashi zawe shindo zawe ni sa mazi ya bahai yeboha, waikiighanye pee kwa kuutoa nkondo mzi wa Yelusalemu."

24 "Tizaiva mbuli zawe, mikono yeshu izaegheeka, tizatozwa ni mishango, savinga ni mvyee mwekishungua. 25 Hetidaha kuita nkoi na se hekuawika kwa kuti, wankuu lweshu waitozize siaha mwe mikono, kia hantu haagea wogha."

26 Zumbe Mulungu aghamba ivi, "Inywi wantu wangu zwikai shuke za magunia, musaghane mwe zeu. Kemai sa mntu mwemkemea ng'wanae ayenanaye yuyo du akifa, kwa kuti wakomi waaiza viviushe kwemikoma. 27 Yelemia, iwe nitekuika uituke muweezi wa wantu wangu, kunga uwelele na kuzitaila sia zawe. 28 Woshe ni watii na wehituka waisizeewo, wazinkana kia hantu wakilonga mbuli za wantu. Watogha sa shaba yechuta ama sa chuma, wosheni wana zuuma. 29 Ziko jitaaka, lisasi itaungumia umo mwe moto, nizakiekea kuwang'aza wantu wangu, kwa kuti wahuza hewadaha kushizwa uhuza wawe. 30 Newaitangwe ‘Mantu ya madini ya hea,’ kwa kuti imi Zumbe Mulungu nizawaemela."