1 Shefatia ng'wana wa Matani, Gedalia ng'wana wa Pashuli, Yehukali ng'wana wa Shelemia na Pashuli ng'wana wa Malikiya, waaiva mbuli zoshe Yelemia awaghambilezo wantu woshe, akighamba, 2 Zumbe Mulungu aghamba ivi, "Mntu yoyoshe ndiye ashighale mwe unu mzi neafe kwa nkondo, kwa saa hambu kwa matamu. Miya waja ndiwo walawe se ya mzi na kukiighala kwa Wakalidayo, newauhonye ugima wawe." 3 Zumbe Mulungu aghamba ivi, "Neniuweke unu mzi ughuighwe ni waghojo wa zumbe wa Babeli."

4 Waambizi wa zumbe wakaita kwa zumbe wakamghamba, "Vikundighwa uyu mntu akong'we, kwa kuti atawakinya mpome na ndai waghojo wagheke washighalewo mwe unu mzi na wantu woshe, kwa kulonga mbuli sa izo. Ye hawakundia mbuli ntana awa wantu, awakundiia mbuli mbada."

5 Zumbe Sedekia akaghamba, "Waume, mghosholeei vyovyoshe muvyekunda, imi sidaha kumiemeza." 6 Kwa ivyoho, wakamghua Yelemia wakamgea na mwe kishima cha Malikiya ng'wana wa zumbe che mwe ukomea wa waghojo. Wamuikiza Yelemia mwe kishima kwa ngoe. Mwe icho kishima nee hekuna mazi miya ntope, Yelemia akadidimia mwe iyo ntope. 7 Miya Ebedimeleki towashi Muesiopia, ndiye ai mgholokezi mwe nyumba ya kizumbe, akaiva kuti wazamgea Yelemia mwe kishima. Mda uwo zumbe nee aiikale he zuvi ja Benjamini. 8 Nee Ebedimeleki akaita kwa zumbe akamghamba, 9 "Zumbe wangu mkulu, mbuli waghosholeyo awa wantu ni mbada. Wazamgea uja Yelemia mteghanyi mwe kishima, hantu ndiho afe kwa saa, kwa kuti hekuna nkande vingi mwe mzi." 10 Nee zumbe ahemuaghiiza Ebedimeleki, Muesiopia, aghue wantu miongo mitatu aite nawo wakamulavye Yelemia mteghanyi mwe kishima, aishizati kufa. 11 Kwa ivyoho, Ebedimeleki akawaghua awo wantu miongo mitatu akaita nawo mwe nyumba ya kizumbe, wakaingila mwe taa ja kizumbe. Kulawa umo, Ebedimeleki akaghua shuke na makumbi yashakaeyo, wakamsheezeza Yelemia mwe kishima kwa ughoe. 12 Vikibinda Ebedimeleki, Muesiopia, akamghamba Yelemia aike ayo makumbi mwe magwaha, azise uwo ughoe shi ya ayo makumbi. Yelemia akaghoshola ivyoho. 13 Vikibinda wakamzuta kwa ngoe, wakamulavya mwe kishima. Yelemia akaita kweikala he ukomea wa waghojo.

14 Mshi mng'we zumbe Sedekia aakunda kumuona mteghanyi Yelemia. Kwa ivyoho, akaaghiiza Yelemia aetwe he uvi wa ntatu wa nyumba ya Zumbe Mulungu. Uko, zumbe akamghambila Yelemia, "Nikunda nikuuze mbui, ushenifishe kintu chochoshe."

15 Yelemia akamhisa zumbe Sedekia, "Ivi, nikikughambila ukweli heunikome? Hata nikikunka vinyanyi heuvitegheleze."

16 Kwa ivyoho, zumbe Sedekia akamlapia Yelemia kwa kifisho akighamba, "Sa Zumbe Mulungu atiumbileye avyeishi, senikueke ugwiwe ni awo wekunda kukukoma."

17 Vikibinda Yelemia akamghambila zumbe Sedekia, Zumbe Mulungu mwena nguvu zoshe, Mulungu wa Izilaeli, aghamba ivi, "Kati ukikiighaa kwa waghojo wa zumbe wa Babeli, neuvunie ugima wako na mzi heutoighwe moto. Iwe hang'we na wantu wa mbali yako nemuendee kuishi. 18 Miya ukishekiighaa kwa waghojo wa zumbe wa Babeli, unu mzi neughuighwe ni Wakalidayo wohe newauoke, naiwe heudahe kuwanyiika."

19 Zumbe Sedekia akamghamba Yelemia, "Naawaogoha Wayahudi wakiighalewo kwa Wakalidayo. Yadahikana Wakalidayo wakaniighala kwa Wayahudi wohe wakanigea shoni."

20 Yelemia akamhisa, "Hewakuighale kwawe. Naakuombeza utegheleze achelonga Zumbe Mulungu na kughoshola sa nivyekughambila na mbuli zako nezikuitile vitana na neuvunile ugima wako. 21 Miya ukishekiighala ng'wenye, unu nee mfumbulo Zumbe Mulungu anionyeshewo. 22 Mwe uwo mfumbulo, naaona wavyele washighalewo mwe nyumba ya kizumbe ya zumbe wa Yuda, wakiighawa kwa waghojo wa zumbe wa Babeli, wohe nee wakighamba kuti,

‘Wantu wako uwealila wazakulufya,

wohe wazakudaha.

Miundi yako izaingila mwe ntope,

wazakuhituka na kukueka.’ "

23 "Wavyele wako woshe na wanao newaighawe kwa Wakalidayo na iwe heudahe kusupuuka, miya neugwiwe ni zumbe wa Babeli na unu mzi neuokwe."

24 Zumbe Sedekia akamghambila Yelemia, "Mntu yoyoshe ashezataila izi mbuli tizelonga, wakitaila neukong'we. 25 Waona waambizi wangu wakiiva kuti nizashimoea na iwe, vikibinda wakaiza na kukughamba ‘Tighambile umghambilecho zumbe na zumbe akughambilecho, ushetifishe chochoshe, ukitifisha netikukome.’ 26 Iwe neuwaghambie kuti, ‘Nee nikimuombeza zumbe asheniuze na mwe nyumba ya Yonasani, nishezafiia uko.’ " 27 Vikibinda, waambizi wa zumbe wakambasha Yelemia, wakamuuza izo mbuli, yohe akawahisa sa zumbe amuaghiizevyo. Nee wakaeka kulonga naye kwa kuti hekuna aivileye shimoezi zawe za kifisho. 28 Yelemia akashighala he ukomea wa waghojo mpaka mshi mzi wa Yelusalemu uheghuighwa.