1 Inywi wantu wa Izilaeli, teghelezai mbuli muyeghambiwa ni Zumbe Mulungu, 2 "Mushedoseeze mbuli zeghoshoka mwe mbali ntuhu,

ntangilo zelawiya kwe lwingu zishemigee wogha,

hata kati zaawagea wogha wantu wa mbali ntuhu.

3 Kwa kuti, mila za awa wantu ni za lufyo,

wataita kweshenga miti mwe mzitu,

vikibinda, mweshongola atashongola kwa patasi.

4 Vikiinda wantu watachihamba kwa madini yeghoshoea hea na zahabu.

Watachikonteea misumai

kunga chishezagwa.

5 Vinyago vyawe viikale sa vinga ni vinyago vya kuitishiza madeghe mwe ubuwa wa matango,

hevidaha kulonga,

vitainulwa

kwa kuti hevidaha kujata.

Musheviogohe ivyo vinyago,

kwa kuti hevidaha kughoshola mbuli mbada wala yedi."

6 Hekuna sa iwe Zumbe Mulungu,

iwe u mkulu

na waataikana kwa nguvu zako.

7 Ni ndai ashikuogohaye iwe Zumbe wa mbali zoshe?

Iwe ukundighwa uivighwe.

Mwe wantu wa mbali zoshe wena viugho

na mwe uzumbe wawe woshe,

hekuna sa iwe.

8 Wosheni hewana akii vingi vighija,

wahinywa ni ivyo vinyago vyawe vishongolwevyo kwa miti vishiwaambizavyo chochoshe.

9 Ivyo vinyago vihambighwa kwa madini yeghoshoea hea kulawa Talishishi

na madini ya zahabu kulawa mwe shi ya Ufazi.

Izi zoshe ni ndima za weshongola,

wavikanta shuke za langi yeunguika na buluu

zishumighwezo ni washumi wetaila.

10 Miya Zumbe Mulungu ye ni Mulungu wa ukweli,

Mulungu mwe moyo

zumbe wa kale na kale.

Akikwewa ni maya, shi itazingiza

na wantu wa mbali zoshe hewadaha kuzizimiza kwa mbuli ya maya yakwe.

11 Awa wantu neuwaghambile kuti, "Milungu ishiumbieyo lwingu na shi, neife. Neiaghe vigima mwe shi na shi ya lwingu."

12 Miya Zumbe Mulungu aumba shi kwa nguvu zakwe,

aitoghesha kwa viugho vyakwe,

kwa akii zakwe akaika kia kintu kwe lwingu sa akundievyo.

13 Akigumiya du, mazi ye kwe lwingu yataboha,

aaeta ngonono kia hantu mwe shi,

aaeka ubambaa utoe mwe mishi ya fua

na kueta mpeho kulawa uko iiko.

14 Kia mng'we wawe hana akii, vingi hana achetaila,

kia mweshongola vinyago agewa shoni ni ivyo vinyago vyakwe,

kwa kuti ivyo vinyago ni vya lufyo hevina ugima wowoshe.

15 Ivyo vinyago hevina chochoshe, vitashesha du.

Zumbe Mulungu akizaiza kwewalaha newafe woshe.

16 Miya Mulungu wa Yakobo, ye shiyo sa ivyo vinyago,

ye nee aghosholeye vintu vyoshe

na Izilaeli ni wantu wakwe ashaghulewo.

Zina jakwe ni Zumbe Mulungu mwena nguvu zoshe.

17 Shunganyai vintu vyenyu mulawe mwe inu shi, idenganyizwewo ni wankuu. 18 Kwa kuti ivi nee avyelonga Zumbe Mulungu, "Neniwalavye mwe inu shi, niwagee mwe ntogho kunga waone sungu."

19 Changu ndicho kwa mbuli ya kuumia kwangu!

Kionda changu ni kikulu hechiiva mzighi.

Miya nikaghamba,

"Izi ni ntogho, shuti nizizimize.

20 Kumbi jangu jizang'untwa,

ngoe zoshe zizadwishwa.

Wanangu wazanieka wazaita zawe,

hekuna ashighaeye wa kujikima katuhu kumbi jangu,

hekuna wa kunihoezeza mapazia."

21 Nee niheghamba, "Wagholokezi ni madashi,

hewamuombeze vinyanyi kwa Zumbe Mulungu.

Nee vyeleka wazahewa

na wantu wetu wazaasakana.

22 Teghelezai! Kuzaiza mbuli,

nkondo kuandukia wazu wa kasikazini,

iyo mbuli neieke,

mizi ya Yuda ighalushwe mahuzu

na umo nemuituke hemelo ja mbweha." 23 Wene Zumbe Mulungu, naataila kuti mtu hadaha kukiamuiya ng'wenye avyeishi,

hadaha kugholokela sia zakwe ng'wenye.

24 Iwe Zumbe Mulungu unishunde

kwa ukweli,

shiyo kwa maya,

ushezanikoma.

25 Maya yako yaighale na kwa wantu wa mbali washikuvikawo,

na kwa wantu washikutailawo.

Kwa kuti, wazawakoma wantu ywako,

wazatikoma vigima

na shi yeshu wazaighalusha mahuzu.