1 Zumbe Mulungu aghamba ivi, "Mwe iyo mishi, neniituke Mulungu wa makolwa yoshe ya Izilaeli, wohe newaituke wantu wangu. 2 Wantu washikomighwewo neniwaivile mbazi uko kwe ughongo. Neniize na kuwainka wantu wa Izilaeli hemelo." 3 Zumbe Mulungu aatilawiya aho kale akighamba, "Nizamikunda kwa lukundisho lwa kale na kale, kwa ivyoho nizahimba kuituka mkweli kwenyu. 4 Nenikuzenge uhya na iwe neuzengeke, iwe Izilaeli mwenivika imi du. Neuzighue vingi ngoma zako uvine kwa nyemi. 5 Neuhande vingi ubuwa wa mizabibu mwe vitui vya Samalia, waimi newahande mbeyu na kujitamiwa shumo jakwe. 6 Mishi yaaiza waghojo newabilikile mwe vitui vya Efulaimu wakighamba, ‘Gholokai, tikwee Yelusalemu tikamvike Zumbe Mulungu, Mulungu weshu.’ "

7 Zumbe Mulungu aghamba kuti,

"Muimbilei Yakobo kwa nyemi,

nitoeai nkeeghee imi mkulu wa shi.

Biikilai, togolai mukighamba,

‘Iwe Zumbe Mulungu wavunie wantu wako wa Izilaeli,

waja washikomighwewo.’

8 Nenimiuze kulawa shi ya kasikazini

na kumiunganyanya kulawa mwe bontokelo ja shi.

Mwe awo wantu nekuituke na matuntu na viema,

wavyele wena nda na waja wekishungua,

bumba ja wantu wangi nejiuye aha.

9 Newauye kunu waakema,

newaituke waavika nikiwauza.

Neniwazise nkanda ya vikoongo vya mazi,

newazinke mwe sia ntana wohe hewakitoe.

Kwa kuti imi ni tate wa Izilaeli

na Efulaimu ni mpaa yangu."

10 Imi Zumbe Mulungu naghamba ivi,

"Niteghelezai inywi wantu wa mbali,

biikiai mbuli zangu kwa wantu weikala shi za hale nkanda ya bahai,

awaasakanyeye Waizilaeli neawaunganyanye,

neawawelele sa mulishi avyewelela ngoto zakwe.

11 Imi Zumbe Mulungu nizamuambiza Yakobo,

nimvunile kulawa kwa wantu wena nguvu kuiko ye.

12 Newaize na kuimba kwa nyemi mwe kitui cha Sayuni

newatamiwe kwa vintu vitana ndivyo niwainke,

neniwainke nkande, divai mpya na mavuta ya mzaituni,

hang'we na maghoto na ng'ombe.

Newaituke sa ubuwa unyweshighwewo,

newaituke na kia kintu wachekunda.

13 Nee ndiho wandele wawe watamiwe na kuvina,

wabwanga kwa wadaa newatamiwe.

Sungu zawe nenizihitue ziituke nyemi,

neniwagee moyo na kuwainka nyemi na shiyo usoyoyo.

14 Neniwainke wavikizi nkande ntana

na kuwainka wantu wangu kia kintu wachekunda."

Ni miyo Zumbe Mulungu nilongiewo.

15 Zumbe Mulungu aghamba ivi,

"Kuzaivighwa sauti mwe mzi wa Lama,

kusigiia na kiiyo cha ukiwa.

Lahei atawakemea wanae,

hakunda kuhembeezwa,

kwa kuti wosheni wazafa.

16 Eka kuiya,

honoa meshozi yako,

nenikulihe kwa mbuli ya ndima yako,

ni miyo Zumbe Mulungu nilongiewo,

wanao newauye kulawa mwe shi ya wankuu.

17 Kuna kialilo mwe mishi yenyu yeiza,

wana wenyu newauye na mwe shi yawe."

Ni miyo Zumbe Mulungu nilongiewo.

18 "Nizaiva wantu wa Efulaimu wakisuumia na kughamba kuti,

‘Uzanitoa kwei sa kadama kashikundako kushungwa,

kwa ivyoho nizakunda kukuiva.

Unihitue,

naimi nenihituke,

kwa kuti iwe niweyo Zumbe Mulungu, Mulungu wangu.

19 Nihezakughoshoela uhuza,

naavoteka,

nihehinywa,

nikakiona ni dashi,

nikaingiwa ni shoni na kukibea,

kwa kuti naainua shoni ya ubwanga wangu.’ "

20 "Efulaimu ni ng'wanangu niyemkunda,

ni ng'wanangu mwenitamila.

Hata kati naamvaiya miya naamfukila.

Naamfanyanya kweli mwe moyo wangu,

naamuivila mbazi.

Ni miyo Zumbe Mulungu nilongiewo.

21 Ika ntangilo mwe sia zako,

ika vibaa vyekuonyesha,

ufukile vitana ija sia nkulu uzinkiieyo ukiita,

Uya na mwe mizi yako iwe Izilaeli mwenivika imi du.

22 Iwe Izilaeli neusangadike mpaka ini sa mndele ashiye mkweli?

Kwa kuti, imi Zumbe Mulungu nenighoshole mbuli mpya mwe shi,

wantu wa Izilaeli newaniuiye sa mvyele avyemuiya mghoshi wakwe."

23 Zumbe Mulungu mwena nguvu zoshe, Mulungu wa Izilaeli, aghamba ivi, "Nikiwauza vingi wantu wa Izilaeli kulawa mwe shi ya ugheni na mwe shi yawe, wo newaghambe mwe shi ya Yuda na mwe mizi yawe kuti,

‘Zumbe Mulungu akung'aze mesho iwe muima mng'azi wa Yelusalemu,

hantu hang'azi aheikala.’ 24 Wantu we mwe mzi wa Yuda na mizi yakwe yoshe, waimi na walishi weshamashama na mafyo yawe, newaikale hang'we kwa nyemi na mpolele. 25 Neniwainke hemelo watibukewo na waegheekewo neniwainke nguvu. 26 Mntu aadaha kughamba, ‘Niheita kwelala niheinuka nikataila kuti usisiiza wangu nee ni mtana kweli.’"

27 Zumbe Mulungu aghamba ivi, "Mishi yaaiza neniimemeeze wantu na vizama mwe shi ya Izilaeli na shi ya Yuda. 28 Savia niitukevyo mtanda kwe kuwausha na kuwaikiza, kuwakinya, kuwabana na kuwaetea ntogho, nee ndivyo niituke mtanda kunga niwatamize na kuwaika hantu hawe. Ni miyo Zumbe Mulungu nilongiewo. 29 Iyo mishi ikizabula wantu hewaghambe vingi kuti,

‘Wavyazi wawe waaja zabibu zekala,

miya meno ya wana wawe yaatozwa ni wizia.’ 30 Miya kia mng'we neafe kwa uhuza wakwe ng'wenye na uja ndiye aje zabibu zekala meno yakwe neyatozwe ni wizia."

31 Zumbe Mulungu aghamba ivi, "Mishi yaaiza neniike kilagha kihya na wantu wa Izilaeli na wantu wa Yuda. 32 Ichi kilagha hechiituke sa chia naikacho na baba zawe nihezawatoza kwa mkono wangu walawe mwe shi ya Misii. Icho kilagha waachibana, hata kati imi nee ni Zumbe wawe. Ni miyo Zumbe Mulungu nilongiewo. 33 Mishi iyo neniike kilagha kihya na wantu wa Izilaeli, neniike sheiya yangu mwe akii zawe na kuigonda mwe myoyo yawe. Imi neniituke Mulungu wawe, wohe newaituke wantu wangu. 34 Mntu heamhinye vingi nyiae wala mndughu wakwe kumtaila Zumbe Mulungu, kwa kuti wosheni newanitaile imi, kuanduka wadodo mpaka wakulu. Kwa kuti neniwaushiize ubada wawe na seniufukile vingi uhuza wawe."

35 Zumbe Mulungu nee aikileye zua jimuike mshii,

ng'wezi na ntondwe vimuike nakio.

Azaghoshola bahai iituke na mawimbi,

zina jakwe ni Zumbe Mulungu mwena nguvu zoshe.

36 Waona izo mbuli niikilezo mwe ngulu zauka mwe mesho yangu,

wavyawa wa Izilaeli hewaituke mbali mwe mesho yangu kale na kale.

37 Kati lwingu jaadaha kuighanywa

na andukio ja ngulu kuwelelwa,

nee ndivyo niwaashe hale wavyawa wa Izilaeli,

kwa mbuli zawe waghosholezo.

Ni miyo Zumbe Mulungu nilongiewo.

38 Zumbe Mulungu aghamba ivi, "Mishi yaaiza, unu mzi wa Yelusalemu neuzengwe uhya kwa mbuli yangu imi Zumbe Mulungu, kulawa kwe mnala wa Hananeli mpaka kwe zuvi ja nkandai. 39 Na ughoe wa kuighanyiiza mzi neuzinke kulawa kwe kitui cha Galebu, vikibinda newiite mpaka Goa. 40 Mwe koongo joshe wazikiiwejo wafiewo na kuashiizwa mazeu, mbuwa zoshe mpaka kikoongo cha Kidiloni, mpaka mwe mpembe za uvi wa Faashi wazu zua jikwelawiya, nehaituke hantu hang'azi kwa Zumbe Mulungu. Uwo mzi heubanighwe wala kugandulwa kale na kale."