1 Zumbe Mulungu mwena nguvu zoshe, Mulungu wa Izilaeli, aghamba ivi kwa mbuli ya Moabu,

"Chenyu ndicho inywi wantu wa Nebo,

kwa kuti mzi wenyu neubanighwe!

Wantu wa mzi wa Kiliasaimu newagewe shoni na kugwiwa,

ukando wakwe mkulu neukinywe,

na wantu wakwe weikala umo newagewe shoni.

2 Kutaikana kwa Moabu nekushie,

wankuu weuko Heshiboni wafanyanya kuukinya,

‘Haya, soi tiwakome awa wantu washetaikane vingi mwe shi!’

Inywi wantu wa mzi wa Madimena nemutongomazwe,

waghojo wa wankuu newamiizile.

3 Nkoo zaaivikana uko Holonaimu,

ziivikana kwa mbuli ya nkumbizi na ubanasi mkulu!"

4 "Shi ya Moabu neibanighwe,

kukema kwakwe nekuivikane mpaka uko Soali.

5 Wahoniewo kwe nkondo watakwea kuita Luhisi,

uku watoa nkoo.

Kwe sia yeita Holonaimu,

kwaaivikana nkoo kwa mbuli ya ubanasi.

6 Ghuukai muvunile ugima wenyu!

Ghuukai sa mpunda za tundui zivyeghuuka mwe ughongo!"

7 "Iwe Moabu, waalila nguvu zako na kiiko chako,

miya ushe hata iwe neugwiwe,

mulungu wako Kemoshi neaighawe kwe shi ya ugheni,

hang'we na wavikizi wakwe na wantu wemghoshoela ndima.

8 Mkomi neazinke kia hantu mwe mzi na hekuna mzi ndiwo uhone,

wantu weikala mwe koongo na waja we kwe vitui newakong'we.

Ni miyo Zumbe Mulungu nilongiewo.

9 Mfukiei Moabu mbiya,

kwa kuti kweli neakong'we,

mizi yakwe neiituke mahuzu,

hekuituke na mntu yoyoshe mweikala umo."

10 Ana ute mweghoshola ndima ya Zumbe Mulungu kwa uvizu, ana ute mntu mweemela uhamba wakwe ushekome!

11 Zumbe Mulungu aghamba ivi, "Wantu weikala mwe shi ya Moabu wazaikala kwa mpolele kuanduka shi yawe iyandushwe, hewataila kuighawa kwe shi ya ugheni. Waitongomale sa divai ye mwe igha, ishigeighweyo na mwe igha tuhu. Kwa ivyoho wakena muiye sa divai na mzingo wawe mtana sa ndivyo waivyo."

12 Zumbe Mulungu aghamba, "Mshi waaiza ndiho niighale wankuu ndiwo wawatoe wantu wa Moabu sa wantu wavyeitila divai. Newaiitie na kueka maigha bue, newayatue vibae bae. 13 Vikibinda wantu wa Moabu newamuone mulungu wawe Kemoshi hana uwambizi, sa via wantu wa Izilaeli wamuenevyo Baseli ashinavyo uwambizi, mulungu wamualileye."

14 "Mudaha zeze kughamba, ‘Ishwi ti waghojo tedaha nkondo,

wantu tena nguvu nyingi za kutoana nkondo?’

15 Wantu wa Moabu newabanighwe na mizi yawe neigwiwe,

wabwanga wakwe wekidaha newachinjwe.

Ni miyo zumbe, Zumbe Mulungu nena nguvu,

nilongiewo.

16 Kukina kwa wantu wa Moabu kuhehi,

kubanighwa kwawe nekufikizelawiya."

17 "Msininikiei Moabu inywi nyoshe mwe hehi naye,

na nyosheni mwemtaila vitana.

Mughambe, ‘Mgholokezi wakwe mkulu azakina,

ukulu wakwe na ufung'wa wakwe heviho vingi.’

18 Inywi wantu mweikala Diboni,

ikilai kulawa hantu henyu muhekikombea,

mukaikale mwe shanga.

Kwa kuti mkomi wa Moabu azabula kwemitoa,

azakinya pee nkando za mizi yenyu.

19 Inywi wantu mweikala Aloeli

gholokai nkanda ya sia kunu mukighoja,

mghoshi mweghuuka na mvyele mwenyiika,

mumuuze kuti, ‘Kulawiye mbwai?’

20 Newahise kuti, ‘Moabu izaingilwa ni shoni kwa kuti izabanighwa,’

kemai kwa ukiwa na kutoa nkoo,

Biikilai kwa kia mntu mweikala nkanda ya mto Alinoni,

kuti Moabu izabanighwa vigima."

21 "Mlaho uzabula kwe mizi ishinayo miima, Holoni na Yasa na Mefaasi, 22 Diboni na Nebo na Besi Dibulasaimu 23 na Kiliasaimu na Besigamuli na Besimeoni 24 na Keliosi na Bosila. Mlaho uzabula mwe mizi yoshe ya Moabu ye hehi na ye hale. 25 Nguvu za Moabu zizaushighwa na ufung'wa wakwe uzabanighwa." Ni miyo Zumbe Mulungu nilongiewo.

26 Zumbe Mulungu aghamba kuti, "Mtengeezei Moabu kwa kuti, azakighalusha mkulu kunizinka imi Zumbe Mulungu. Kwa ivyoho Moabu neasaghane mwe matahika yakwe na wantu newamsheke. 27 Moabu, fukila via wawashekavyo wantu wa Izilaeli. Kwani watezagwiwa hang'we na wabavi mpaka ukakucha mtwi wako kwa ubeo kia uhelongea kwa mbuli zawe?"

28 "Inywi wantu mweikala Moabu, lawai mwe mizi yenyu mukaikale kwe mpanga! Itukai sa njiwa yeita kwezenga sasa jakwe he uvi wa mpanga. 29 Nizaiva utii wa wantu wa Moabu, waakikomba kweli. Nizaiva wavyekikomba na kukiiva kwa utii we mwe myoyo yawe. 30 Imi Zumbe Mulungu naataila wavyena utii na kukikomba kwawe hekuwaambize kintu chochoshe. 31 Kwa ivyoho, nenisininike kwa mbuli ya wantu woshe wa Moabu na kwa mbuli ya wantu wa Kili Helesi. 32 Inywi wantu wa Sibima muna mbuwa nyingi za mizabibu kuzinka wantu wa Yazeli. Inywi mu sa mzabibu wena matambi yativileyo mpaka sheja ya bahai ya munyu na kuita mpaka Yazeli, miya mnkuu azazubua matambi ya matunda yenyu ya mishi ya zua na zabibu zenyu. Kwa ivyoho, nenimisininikie inywi wantu wa Sibima kuzinka wantu wa Yazeli. 33 Nyemi na visheko vizaushighwa mwe shi ya Moabu yeozoka. Nizaeka divai ishelawe hantu wahekootea zabibu, hekuna mntu mwekoota zabibu na kutoa nkeeghee, hata kati kuna vuzo miya shiyo ja nyemi."

34 "Miya kuivikana kiiyo cha wantu wa Heshiboni uko Eleale na Yahazi, icho kiiyo chaavikana kulawa Soali mpaka Holonaimu na uko Egilasi Shelishiya. Na mazi ya Nimulimu yazahwa. 35 Nenimkome kia mntu mweikala Moabu mwelavya ntogoo kwe vitui na kuokea ubani mulungu yakwe."

36 "Kwa ivyoho moyo wangu utawakemea wantu wa Moabu na wantu wa Kili Helesi, sa mntu mweimba imbo ja ndiyo kwa fiimbi, kwa kuti hata viiko vyawe vyoshe waoneevyo vizabanighwa. 37 Kia mntu azamoa sui zakwe na ndezu zakwe wakisininika. Wazakishengashenga mikono na mwe vighwidi vyawe na waizwikie shuke za magunia. 38 Mwe nyumba za Moabu na mwe sia zawe hekuna cheivikana, miya kuivika viiyo du, kwa kuti nizamtoa Moabu sa igha jishakalejo jishikundwajo ni mntu. Ni miyo Zumbe Mulungu nilongiewo. 39 Shi ya Moabu neibanighwe! Welela ndivyo wantu wa Moabu wakeme kwa usoyoyo! Welela ndivyo wauye mghongo kwa shoni! Wantu wa Moabu newaituke wantu wa kushekwa na kimaka kwa wantu wawe wa hehi."

40 Zumbe Mulungu aghamba ivi, "Mnkuu neashee na kuitoa Moabu sa ngwiizi ikusueyo mawawa yakwe ivyesheea kweghua maunde. 41 Mizi yakwe neighuighwe na nkando zakwe nezigandulwe. Mwe iyo mishi, myoyo ya waghojo wa Moabu neiogohe sa mvyele mwekishungua. 42 Wamoabu newakong'we washetaikane vingi mwe shi kwa mbuli ya kukighalusha wakulu kunizinka imi Zumbe Mulungu. 43 Wogha, matubwi na mitegho vyaamighoja inywi wantu wa Moabu. Ni miyo Zumbe Mulungu nilongiewo. 44 Mwenyiika vyegea wogha neagongooke mwe tubwi, mwelawa mwe tubwi neagwiwe ni mtegho, kwa kuti neniete izo ntogho kwa Moabu mwe mishi yawe ya kulahwa. Ni miyo Zumbe Mulungu nilongiewo. 45 Waja wenyiika newaghuuke na mwe mzi wa Heshiboni kweondeeza mpolele, kwa kuti moto waaka uko Heshiboni, sheshe za moto kulawa kwe mzi wa zumbe wa Sihoni zikaoka mihaka ya Moabu, zikaoka vitui vya awa wantu wetamiwa ni nkumbizi. 46 Wantu wa Moabu chenyu ndicho! Wantu wa Kemoshi ushe muzakong'wa na wabwanga wenyu newagwiwe na wandee wenyu newaghuighwe waighawe na kwe shi ya ugheni.

47 "Miya mishi yeiza neniitamize vingi shi ya Moabu. Imi Zumbe Mulungu naghamba, iji nee bontokelo ja mlaho kwa wantu wa Moabu."